ޔޫތު މިނިސްޓްރީގެ ފަރާތުން އިސްރަށްވެހިންނަށް ޚާއްސަ ސެޝަނެއް ބާއްވައިފި

ޒުވާނުން ބާރުވެރިކުރުވުމާއި، މަޢުލޫމާތާއި ފަންނާ ބެހޭ ވުޒާރާގެ ފަރާތުން އިސްރަށްވެހިންނަށް ޚާއްޞަ ސެޝަނެއް ބާއްވައިފިއެވެ. 

މި ސެޝަނަކީ މިއަދު އިސްރަށްވެހިންގެ ނާދީގައި އެ މިނިސްޓްރީގެ ފަރާތުން ބާއްވާފައިވާ ސެޝަނެކެވެ. އިސްރަށްވެހީންނަށް ޚާއްސަކޮށް، ނަފްސާނީ ދުޅަހެޔޮކަމާއި، މަޢާފުކުރުމާއި، ހިތްހަމަޖެހުމާއި ގުޅޭގޮތުން މަޢުލޫމާތު ދިނުމަށް ކުރިއަށް ގެންދިޔަ މި ސެޝަން ބާއްވާފައި ވަނީ މިއަދު ހަވީރު 16:00 އިން 17:30 އާއި ހަމައަށެވެ. 

"މަޢާފްކުރުމާއި ހިތްހަމަޖެހުން" ގެ ނަމުގައި ކުރިއަށް ގެންދެވުނު މި މަޢުލޫމާތު ދިނުމުގެ ސެޝަންގައި ގިނަ އަދަދެއްގެ އިސްރަށްވެހިން ވަނީ ބައިވެރިވެފަ އެވެ. މިއީ މި މަހުގެ ތެރޭގައި އިސްރަށްވެހިންނަށް އަމާޒުކޮށް މަޢުލޫމާތު ދިނުމުގެ ގޮތުން ނަގައިދެވޭ ދެވަނަ ސެޝަނެވެ. މިދިޔަ އަހަރު ވެސް އިސްރަށްވެހިންނަށް އަމާޒުކޮށްގެން މަޢުލޫމާތު ދިނުމުގެ ސެޝަނެއް ވަނީ ކުރިއަށް ގެންގޮސްފައެވެ. އިޖްތިމާޢީ އަދި ޢާއިލީ ތަރައްޤީއާއި ބެހޭ ވުޒާރާއިން ވިދާޅުވީ، މި ސެޝަންތަކުގެ ސަބަބުން ޢާއިލީ ގުޅުންތައް ދެމެހެއްޓުމުގެ މުހިންމުކަމާއި، ކަނުލާ އަޑުއެހުމާއި، މުޢާމަލާތުކުރުމުގެ މުހިންމުކަން ބާއިވެރިންނަށް ބުނެދެވި، މަޝްވަރާކުރެވިގެން ދާނެ ކަމަށެވެ.

މި ސެޝަންތަކަކީ އިޖްތިމާޢީ އަދި ޢާއިލީ ތަރައްޤީއާއި ބެހޭ ވުޒާރާގެ އިސްނެންގެވުމުގެ މަތިން ހިންގަވަމުން ގެންދަވާ ސެޝަންތަކެކެވެ.