ހުޅުމާލޭ ބޮޑު މިސްކިތް މަރާމާތުކުރުމަށްފަހު ޢާންމުންނަށް އަލުން ހުޅުވާލައިފި

ހުޅުމާލޭ މަސްޖިދުލް ޝައިޚް ޤާސިމް ބިން އަލްޘާނީ މިސްކިތް މަރާމާތުކުރުމަށްފަހު ޢާންމުންނަށް އަލުން ހުޅުވާލާފި އެވެ. 

މި މިސްކިތުގެ މަސައްކަތަކީ، މާލެ ސިޓީ ކައުންސިލްގެ އެދިވަޑައިގަތުމުގެ މަތިން، އުރީދޫ މޯލްޑިވްސްގެ އިޖްތިމާޢީ ޒިންމާގެ ދަށުން އެ ކުންފުންޏާއި "ގަތަރު ޗެރިޓީ" އާއި ގުޅިގެން ކުރިއަށްގެންދިޔަ މަސައްކަތެކެވެ.

މަސްޖިދުލް ޝައިޚް ޤާސިމް ބިން އަލްޘާނީ މަރާމާތުކޮށް، އޭސީކުރުމުގެ މަސައްކަތް ފަށާފަނީ މިދިޔަ ޖެނުއަރީމަހުގެ ތެރޭގައެވެ. މި މިސްކިތް މަރާމާތުކޮށް ނިންމުމަށްފަހު އަލުން ޢާންމު ރައްޔިތުން ބޭނުންކުރުމަށް ހުޅުވާލުމަށް ވަނީ މިއަދު އެކަމަށް ޚާއްޞަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި، އުރީދޫ މޯލްޑިވްސްއާއި، ގަތަރު ޗެރިޓީއާއި، މާލެ ސިޓީ ކައުންސިލުގެ އިސްވެރިން ވަނީ ބައިވެރިވެވަޑައިގެންފަ އެވެ.

މި ރަސްމިއްޔާތުގައި ވާހަކަފުޅު ދައްކަވަމުން އުރީދޫ މޯލްޑިވްސްގެ މެނޭޖިންގ ޑިރެކްޓަރ އަދި ޗީފް އެގްޒެކެޓިވް އޮފިސަރ ޚާލިދު ޙަސަން އަލް ހަމާދީ ވިދާޅުވީ، ހުޅުމާލޭގައި މިވަގުތު ހުރި އެންމެ ބޮޑު އެއް މިސްކިތް މަރާމާތުކުތުމުގެ މަސައްކަތުގައި އެ ކުންފުނިން ބައިވެރިވުމަކީ އެ ކުންފުންޏަށް ލިބުނު ވަރަށް ބޮޑު އުފަލެއް ކަމަށެވެ. މީގެ އިތުރުން، އުރީދޫއަކީ ހަމައެކަނި ރާއްޖޭގައި ޓެލެކޮމިއުނިކޭޝަންގެ ވިޔަފާރީގައި ހަރަކާތްތެރިވާ ކުންފުންޏެއް ނޫންކަމަށް އޭނާ ވަނީ ވިދާޅުވެފަ އެވެ. އަދި އުރީދޫއިން ދަނީ ދިވެހި މުޖްތަމަޢަށް އެހީތެރިވުމަށް ގިނަ މަސައްކަތްތަކެއް ކުރައްވަމުން ކަމަށް އޭނާ ވިދާޅުވިއެވެ. 

މަސްޖިދުލް ޝައިޚް ޤާސިމް ބިން އަލްޘާނީ މިސްކިތް މަރާމާތުކުރުމުގެ މަސައްކަތުގެ ދަށުން ކުރިއަށްގެންދިޔަ އެންމެ މުހިންމު އެއް މަސައްކަތަކީ، މުޅި މިސްކިތް އެއަރ ކޮންޑިޝަންކުރުމެވެ. މީގެ އިތުރުން، މިސްކިތުގައި ކުލަ ލުމާއި، މިސްކިތުގެ ހުރިހާ ދޮރުތަކެއް ރީތި ކުރުމުގެ އިތުރުން، އިތުރު ފާޚާނަ ބަރިއެއް ތަރައްޤީކުރުންވެސް މި މަސައްކަތުގެ ދަށުން ވަނީ ކުރިއަށްގެންގޮސްފައެވެ. މި މިސްކިތަކީ 1800 އަށް ވުރެ ގިނަ މީހުންނަށް އެއްފަހަރާ ނަމާދުކުރެވޭ ގޮތަށް ބިނާކޮށްފައިވާ މި މިސްކިތުގެ ސީލިންގުގައި ރީތި ޖިއޯމެޓްރިކް ޑިޒައިނެއް ހުރެއެވެ. 

މަސްޖިދުލް ޝައިޚް ޤާސިމް ބިން އަލްޘާނީ މިސްކިތް އެންމެ ފުރަތަމަ ހުޅުވާފައިވަނި 2006 ވަނަ އަހަރު އެވެ. މި މިސްކިތަކީ ހުޅުމާލޭގައި އެންމެ ފުރަތަމަ ހުޅުވުނު މިސްކިތްތަކުގެ ތެރޭގައި ހިމެނޭ މިސްކިތެކެވެ.