އެއްވެސް ފަރާތެއް އިސްތިސްނާ ނުކޮށް މައްސަލަތައް ތަހުޤީޤުކުރުމަކީ ޤާނޫނީ ޒިންމާއެއް: އޭސީސީ

އެއްވެސް ފަރާތެއް އިސްތިސްނާ ކުރުމެއް ނެތި މައްސަލަތައް ތަހުޤީޤުކޮށް ނިންމެވުމަކީ އެ ކޮމިޝަނުގެ މައްޗަށް އޮތް ޤާނޫނީ ޒިންމާއެއް ކަމަށް އެންޓި-ކޮރަޕްޝަން ކޮމިޝަން، އޭސީސީ އިން ވިދާޅުވެއްޖެއެވެ. 

އޭސީސީ އިން މިފަދައިން ވިދާޅުވެފައި ވަނީ، އެ ކޮމިޝަނުން ނެރުއްވެވި ނޫސް ބަޔާނެއްގަ އެވެ. އޭސީސީ އިން ވިދާޅުވީ، އެ ކޮމިޝަނުގެ ޤާނޫނުގައި ބުނާ ކޮރަޕްޝަން އާއި ގުޅޭ އެއްވެސް މައްސަލައެއް އެ ކޮމިޝަނަށް ހުށައަޅައިފި ނަމަ، އެއްވެސް ފަރާތެއް އިސްތިސްނާ ކުރުމަކާއި ނުލައި އެ މައްސަލަތައް ތަޙުޤާޤުކޮށް ނިންމައި، ވަކި ކޮޅެއްގައި ޖެއްސުމަކީ އެ ކޮމިޝަނުގެ މައްޗަށް އޮތް ޤާނޫނީ ޒިންމާއެއް ކަމަށެވެ. 

އެންޓި-ކޮރަޕްޝަން ކޮމިޝަން، އޭސީސީއިން މިފަދައިން ވިދާޅުވެފައި ވަނީ، ސުޕްރީމް ކޯޓުގެ ބައެއް ފަނޑިޔާރުންނަށް ތުހުމަތުކޮށް ހުށަހަޅާފައިވާ މައްސަލައަކާއި ގުޅިގެންނެވެ. އޭސީސީ އިން ވިދާޅުވީ، ދިވެހިރާއްޖޭގެ ޖުމްހޫރިއްޔާގެ ޤާނޫނު އަސާސީގެ 202 ވަނަ މާއްދާއާއި، އެންޓި-ކޮރަޕްޝަން ކޮމިޝަނުގެ ޤާނޫނުގެ 21 އަދި 22 ވަނަ މާއްދާގައި ބަޔާންކޮށްފައިވާ ގޮތުގެ މަތިން، މިފަދަ މައްސަލަތައް ބެލުމުގައި ޖިނާއީ ޢަދުލުގެ ނިޒާމުގައި ހިމެނޭ ޤާނޫނުތަކާއި ގަވާއިދުތަކުން ކޮމިޝަނަށް މަތިކޮށްފައިވާ ބާރުތަކުގެ ތެރެއިން މައްސަލަތައް ބަލަމުންގެންދާނެ ކަމަށެވެ. އަދި އެ ކޮމިޝަނުން ތަޙުޤީޤުކުރަމުންދާ މައްސަލަތަކުގައި އެއްވެސް ފަރާތެއްގެ ނުފޫޒަކަށް ލެނބުމެއްނެތި، ވަކި ފަރާތަކަށް ބުރަ ނުވެ ތަޙުޤީޤު ކުރިއަށް ގެންދާނެކަމުގެ ފުރިހަމަ ޔަޤީންކަން ދެއްވާކަމަށް އެ ކޮމިޝަނުން ވަނީ ވިދާޅުވެފަ އެވެ.

ދިވެހިރާއްޖޭގެ ސުޕްރީމްކޯޓުގެ ފަނޑިޔާރުންގެ ތެރޭގައި ހިމެނޭ ތިން ފަނޑިޔާރުން ވަނީ ސަސްޕެންޑުކޮށްފަ އެވެ. އޭގެ ތެރޭގައި ހިމެނެނީ އަލްއުސްތާޛު ޙުސްނުއްސުޢޫދު އާއި، ފަނޑިޔާރު ޑޮކްޓަރ އަޒްމިރާލްދާ ޒާހިރު، އަދި ފަނޑިޔާރު އަލްއުސްތާޛު މަޙާޒު ޢަލީ ޒާހިރުއެވެ. އެ ފަނޑިޔާރުން ސަސްޕެންޑް ކޮށްފައިވަނީ އޭސީސީ އިން ކުރަމުންދާ ޖިނާޢީ ތަޙްޤީގަކާ ގުޅިގެންނެވެ.