ޚަބަރު
އެމްއެންޑީއެފުން ދިވެހި ފުލުހުންނަށް ޓްރެއިނިންގ ސެޝަނެއް ކުރިއަށް ގެންގޮސްފި

އެމްއެންޑީއެފުން ދިވެހި ފުލުހުންނަށް ބޭއްވި ޓްރެއިނިންގ ސެޝަންގެ ތެރެއިން/ފޮޓޯ: އެމްއެންޑީއެފް
ހުލާސާ
މި ސެޝަނުގައި ދިވެހި ފުލުހުންގެ ޚިދުމަތުގެ ޖުމްލަ 45 މުވައްޒަފުން ބައިވެރިވި
މޯލްޑިވްސް ނޭޝަނަލް ޑިފެންސް ފޯސް، އެމްއެންޑީއެފުން ދިވެހި ފުލުހުންގެ ޚިދުމަތުގެ މުވައްޒަފުންނަށް ޓްރެއިނިންގ ސެޝަނެއް ކުރިއަށް ގެންގޮސްފި އެވެ.
މި ސެޝަން ކުރިއަށް ގެންގޮސްފައިވަނީ، މި މަހުގެ 25 އިން 26 ގެ ނިޔަލަށެވެ. އެމްއެންޑީއެފް ގެ މާލޭ އޭރިއާ ކޮމާންޑް، ކޯސްޓްގާޑް ސެކަންޑް ސްކޮޑްރަން އިން މި ސެޝަން ކުރިއަށް ގެންގޮސްފައިވަނީ، ހ.ފޯރވިންޑްސްގައި ހުންނަ ޕޮލިސް ކުލާސްރޫމުގަ އެވެ.
މި ޓްރެއިނިންގ ސެޝަނުގައި ދިވެހި ފުލުހުންގެ ޚިދުމަތުގެ ޖުމްލަ 45 މުވައްޒަފުން ބައިވެރިވެފައިވާކަމަށް އެމްއެންޑީއެފުން ވިދާޅުވިއެވެ. މީގެ އިތުރުން އެމްއެންޑީއެފުން ވިދާޅުވީ، މި ޓްރެއިނިންގ ސެޝަނުގައި ކަނޑުމަތީގައި ހިނގާ ހާދިސާތަކަށް އަހުލުވެރި ކުރުވުމާއި، ހާދިސާތަކުގައި ހޯދަންޖެހޭ މުހިންމު މަޢުލޫމާތުތަކުގެ އިތުރުން އެފަދަ ހާދިސާތަކުގައި އެހީ ބޭނުންވާ ފަރާތްތަކަށް ދޭނެ އެކަށޭނަ އިރުޝާދުތަކާއި ގުޅޭގޮތުން މަޢުލޫމާތު ފޯރުކޮށްދީފައިވާ ކަމަށެވެ.
މި ސެޝަންތަކުގައި މުދައްރިބުންގެ ގޮތުގައި ހަރަކާތްތެރިވީ އެމްއެންޑީއެފް ކޯސްޓްގާޑްގެ މުދައްރިބުންނެވެ.