ޚަބަރު
ނޫރުލް އަޛާން 1446 ގެ ފަޚުރުވެރި 1 ވަނަ ސުލައިމް މުޙައްމަދު ލަޠީފަށް

ނޫރުލް އަޛާން 1446 ގެ ފަޚުރުވެރި 1 ވަނަ ޙާސިލްކުރި ސުލައިމް މުޙައްމަދު ލަޠީފް/ފޮޓޯ: އިސްލާމިކް މިނިސްޓްރީ
ހުލާސާ
މި މުބާރާތުގެ ފަހު ބުރުގައި ވާދަކޮށްފައިވަނީ 6 ބައިވެރިން
އިސްލާމީ ކަންތައްތަކާ ބެހޭ ވުޒާރާއިން މި އަހަރު މުޅިން އަލަށް ބާއްވަން ފެށި "ނޫރުލް އަޛާން" މުބާރާތުގެ ފަޚުރުވެރި އެއްވަނަ ސުލައިމް މުޙައްމަދު ލަޠީފް ޙާސިލްކޮށްފިއެވެ.
މި މުބާރާތުގެ ފައިނަލް ބުރު މިރޭ ބާއްވާފައިވާއިރު، މި ބުރުގައި ޖުމްލަ 6 ބައިވެރިން ވަނީ ވާދަކޮށްފަ އެވެ. މި ބުރުގައި ބައިވެރިންނަށް ހަވާލުކުރެވުނު މަސައްކަތަކީ، ޙިޖާޒް ގެ ރާގަށް ބަންގި ގޮވުމާއި ޤަމަތް ދިނުމެވެ.
މި މުބާރާތުގެ އެއްވަނައަށް ދިޔަ ފަރާތަށް އަގުހުރި ޢިނާމުތަކެއް ވަނީ ދޫކޮށްފަ އެވެ. އެގޮތުން މުބާރާތުގެ އެއްވަނަ ޙާޞިލްކުރި ސުލައިމް މުޙައްމަދު ލަޠީފަށް ޓްރޮފީއާއި ހަނދާނީ ލިޔުމުގެ އިތުރުން ހާއްސަ އިނާމުތަކެއްގެ ގޮތުގައި 75 އިންޗީގެ ޓީވީއަކާއި، ދިގުފަރު އައިލެންޑް ރިޒޯޓުގެ ސްޓޭއަކާއި، އެސްޓީއޯގެ ހާއްސަ އިނާމެއްވެސް ވަނީ ދެއްވާފައެވެ. މި އިނާމުތައް ހަވާލުކޮށްދެއްވީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދުއެވެ.
މި މުބާރާތުގެ ފަހު ބުރުގައި ވާދަކުރި 6 ބައިވެރިންގެ ތެރެއިން ދެވަނަ ޙާސިލުކޮށްފައިވަނީ، ޙަމްޒާ ބިން ހަސަންއެވެ. އަދި ތިންވަނަ މުޙައްމަދު ހަނޫން ހުސައިން އަށް ލިބިފައި ވާއިރު، މުބާރާތުގެ ހަތަރުވަނަ ލިބިފައިވަނީ ހަނީޒް ހަނީފްއަށެވެ. މީގެ އިތުރުން ނޫރުލް އަޛާން މުބާރާތުގެ ފަސް ވަނަ އިސްމާޢިލް އިފްރާޙް އިބްރާހިމް އަލީ ވަނީ ޙާސިލުކޮށްފަ އެވެ. އަދި މުބާރާތުގެ ހަވަނައަށް ގޮސްފައިވަނީ، މާޠިޢު އަޙްމަދު ނާޒިމް އެވެ. މުބާރާތުގެ ފައިނަލް ބުރާއި ހަމައަށް ދަތުރުކޮށް ވަނަ ހޯދި މި 6 ބައިވެރިންނަށް ވެސް ވަނީ ޓްރޮފީއާއި ހަނދާނީ ލިޔުމާއި ޚާއްސަ އިނާމުތަކެއް ދެއްވާފައެވެ.
ނޫރުލް އަޛާން މުބާރާތުގެ އެންމެ ބޮޑު އެއް މަޤްސަދަކީ، ރީތި ރާޤުތަކަށް ޞައްޙަ މަގުން ހުނަރުވެރިކަމާއެކު ބަންގިދޭ ޒުވާނުންތަކެއް އުފެއްދުމާއި، ޒުވާނުންނާއި ކުދިބޮޑު އެންމެންގެ ހިތްތަކުގައި އެކަމަށް ޝައުޤުވެރިކަން އުފެއްދުމެވެ. އަދި މި ޤައުމުގައި އިސްލާމީ ޝަޚްސިއްޔަތު ވަރުގަދަ ކުރުމާއި، ރީތިކޮށް ބަންގިދޭ ޒުވާނުންގެ ޕޫލެއް އެކުލަވާލުމާއި، މި ފަންނުގެ ރޫޙު އާލާކުރުމާއި ދިރުވުމާއި ކުރިއެރުވުމާއި، އަދި މިއީ ދާއިރާއެއްގެ ގޮތުގައި ފާހަގަކޮށް މި ދާއިރާގައި އުޅުއްވާ ބޭފުޅުންގެ އަގުވަޒަންކުރުންވެސް ހިމެނެއެވެ.
މި މުބާރާތުގައި 1 ވަނަ ހާސިލްކުރު ސުލައިމް މުޙައްމަދު ލަޠީފް އަށް މިއަހަރުގެ ރަމަޟާން މަހު މާލޭގެ ބޮޑެތި މިސްކިތްތަކުގައި ހުކުރު ނަމާދުގެ ބަންގި ގޮވުމުގެ ފުރުސަތު ލިބިގެންދާނެ ކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއެވެ.