އިރާންގައި މައިނެއް ގޮވައި 50 އެއްހާ މީހުން މަރުވެއްޖެ!

އިރާންގައި މައިނެއް ގޮވައި 50 އެއްހާ މީހުން މަރުވެއްޖެއެވެ. 

އީރާނުގެ އިރުމަތީ ސަރަހައްދުގައި ހިނގި މި ހާދިސާގައި 51 މީހަކު މަރުވެ 20 މީހަކަށް އެކިވަރުގެ އަނިޔާ ލިބިފައިވާ ކަމަށް އަލްޖަޒީރާގައި ރިޕޯޓް ކޮށްފައިވެއެވެ. މީގެއިތުރުން ގޮވައިގެން އުޅޭ މައިނުގެ ތެރޭގައި އިތުރު މަސައްކަތް ތެރިންތަކެއް ތާށިވެފައިވާކަމަށްވެސް ވަނީ ބުނެފައެވެ. 

މިހާދިސާ ހިނގާފައިވަނީ ކޯލް މައިނެއްގެ ތެރޭގައި މަސައްކަތް ކުރަމުންދަނިކޮށް މީތަން ގޭސް ލީކްވެގެން ކަމަށް ބުނެފައިވެއެވެ. މި ހާދިސާ ހިނގާފައިވަނީ މަދަންޖޫ ކުންފުނީގެ ބެލުމުގެ ދަށުގައިވާ މައިނެއްގައި ކަމަށް އަލްޖަޒީރާގައި ވަނީ ރިޕޯޓް ކޮށްފައެވެ. 

މިހާދިސާ ހިނގި ވަގުތު އެމައިނުގެ "ބީ" ބްލޮކާއި "ސީ" ބްލޮކްގައި 69 މީހަކު މަސައްކަތް ކުރަމުންދިޔައެވެ. މިކަން ހިނގާފައިވަނީ ހޮނިހިރު ދުވަހުގެ 9:00 ހާއިރު އެވެ. 

މީހުން ސަލާމަތް ކުރާ ރެސްކިޔު ޓީމުން ކުރިއަށް ގެންދިޔަ މަސައްކަތުން "ބީ" ބްލޮކްގައި ތިބި 47 މީހުން ނެރެވިފައިވެއެވެ. އޭގެ ތެރެއިން 30 މީހަކު މަރުވެފައިވާ އިރު 17 މީހަކު ވަނީ ވަރަށް ބޮޑަށް ޒަޚަމްވެފައި ކަމަށް އިރާންގެ ޚުރާސާން ޕްރޮވިންސްގެ ގަވަރނަރ ޢަލީ އަކްބަރް ރަޙީމީ އެޤައުމުގެ ޓީވީ އަކަށް ބުނެފައިވެއެވެ.

މިހާރު ރެސްކިޔު ޓީމުން ދަނީ ބްލޮކް "ސީ"ގެ ތެރެއިން މީހުން ނެރުމުގެ މަސައްކަތް ކުރަމުންނެވެ. އަދި މިމަސައްކަތަށް ހަތަރު ވަރަކަށް ގަޑިއިރު ނަގާނެ ކަމަށް ރަޙީމީ ވަނީ ބުނެފައެވެ. 

މީގެއިތުރުން ރަޙީމީ ބުނެފައިވަނީ އިރާނަށް ބޭނުންވާ 76 ޕަސެންޓްގެ ކޯލް ފޯރުކޮށްދެނީ އެމައިން ހުރި ސަރަހައްދުން ކަމަށެވެ. އެސަރަހައްދުގައި ކޯލް މައިން ތަކުގެ މަސައްކަތް ކުރާ 10 ވަރަކަށް ބޮޑު ކުންފުނި މަސައްކަތް ކުރާ ކަމަށްވެސް ބުނެފައިވެއެވެ.