އިންޑިއާގެ ފުޑް އެންޑް އެގްރިކަލްޗަރ ވަފުދާއެކު ބިޒްނަސް ނެޓްވޯކިންގ ސެޝަންއެއް ބާއްވައިފި

އިންޑިއާގެ ފުޑް އެންޑް އެގްރިކަލްޗަރ ދާއިރާގެ ވަފުދަކާއެކު ބޭއްވުނު ބިޒްނަސް ނެޓްވޯކިންގ ސެޝަނެއް އިޤްތިޞޯދީ ތަރައްޤީއާ ވިޔަފާރިއާ ބެހޭ ވަޒީރު މުޙައްމަދު ސަޢީދު  ޝަރަފުވެރިކޮށްދެއްވައިފިއެވެ. މި ސެޝަން އިންތިޒާމުކޮށްފައިވަނީ ފެޑެރޭޝަން އޮފް އިންޑިއަން އެކްސްޕޯޓް އޯގަނައިޒޭޝަން އާއި ދިވެހިރާއްޖޭގައި ހުންނަ އިންޑިއާ ހައިކޮމިޝަން ގުޅިގެންނެވެ.

މި ބިޒްނަސް ޓު ބިޒްނަސް ނެޓްވޯކިންގ ސެޝަނަކީ ރާއްޖޭގައި ހުންނަ އިންޑިއާ ހައިކޮމިޝަނާއި މިނިސްޓްރީ ގުޅިގެން ބޭއްވި ޚާއްޞަ ހަރަކާތެކެވެ. މި ހަފްލާގައި ވާހަކަފުޅު ދައްކަވަމުން މިނިސްޓަރ ސަޢީދު ވިދާޅުވީ އިންޑިއާ އާއި ދިވެހިރާއްޖެއާ ދެމެދު ވިޔަފާރިއާއި އިންވެސްޓްމަންޓްގެ ދާއިރާއިން އިތުރު ކުރިއެރުންތައް ހޯދުމުގެ ފުރުޞަތު އޮތްކަމަށެވެ.

މީގެއިތުރުން، މިނިސްޓަރ ސަޢީދު އިންޑިއާގެ ވަފުދަށް ހޫނު މަރުޙަބާއެއް ދެންނެވިއެވެ. އަދި ދެ ޤައުމުގެ ދެމެދުގައި އޮތް ޒަމާންވީ އެކުވެރިކަމުގެ ގުޅުމުގެ މައްޗަށް އަލިއަޅުއްވާލައްވައި ވާހަކަފުޅު ދެއްކެވިއެވެ.

މި ސެޝަނުގައި އިންޑިއާގެ ފުޑް އެންޑް އެގްރިކަލްޗަރ ދާއިރާގެ އިސް ފަރާތްތަކާއި ދިވެހިރާއްޖޭގެ ވިޔަފާރިވެރިން ބައިވެރިވެ ވަޑައިގެންނެވިއެވެ. މި ބައްދަލުވުމުގެ މަޤްޞަދަކީ ދެ ޤައުމުގެ ދެމެދުގައި ފުޑް އެންޑް އެގްރިކަލްޗަރ ދާއިރާއިން އޮތް ގުޅުން އިތުރަށް ބަދަހިކޮށް، އައު ވިޔަފާރީގެ ފުރުޞަތުތައް ހޯދުމެވެ.