Ads by Exprox

ޚަބަރު

ދިވެހި ޤައުމިއްޔަތުގެ ޢިލްމުތައް އަތޮޅުތަކަށް ތަޢާރަފުކުރަން ފަށައިފި

ދިވެހި ޤައުމިއްޔަތުގެ ޢިލްމުތައް އަތޮޅުތަކަށް ތަޢާރަފުކުރަން ފަށައިފި

ވަޒީރު އާދަމް ނަޞީރު އިބްރާހީމް ފޮޓޯ:ވުޒާރާ

އާމިނަތު ޔުމްނާ

އާމިނަތު ޔުމްނާ

27 ފެބްރުއަރީ 2025، 11:16

27 ފެބްރުއަރީ 2025، 11:16

ދިވެހިބަހާއި ސަގާފަތާއި ތަރިކައާ ބެހޭ ވުޒާރާއިން ދިވެހި ޤައުމިއްޔަތާ ގުޅުންހުރި ޢިލްމުތައް އަތޮޅުތަކަށް ތަޢާރަފުކުރުމުގެ މަސައްކަތް ފަށައިފިއެވެ. މި މަސައްކަތް ފެށުމުގެ ގޮތުން ހއ. އުތީމުގައި ޚާއްސަ ރަސްމިއްޔާތެއް ބޭއްވުނެވެ.

ދިވެހި ޤައުމިއްޔަތު އިޢާދަކުރުމުގެ މަޝްރޫޢުގެ ދަށުން އަތޮޅުތެރެއަށް ޤައުމިއްޔަތާ ގުޅުންހުރި ޢިލްމުތައް އެންމެ ފުރަތަމަ ތަޢާރަފުކުރަން ފަށާފައިވަނީ ހއ. އަތޮޅުގައެވެ. މި ރަސްމިއްޔާތުގައި ވާހަކަފުޅު ދައްކަވަމުން ދިވެހިބަހާއި ސަގާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހީމް ވިދާޅުވީ، މިހާތަނަށް އައިއިރު ޤައުމިއްޔަތު މަޝްރޫޢުގެ ދަށުން 2000 އަށްވުރެ ގިނަ ފަރާތްތަކަށް ޤައުމިއްޔަތާ ގުޅުންހުރި މަޢުލޫމާތު ފޯރުކޮށްދީފައިވާ ކަމަށެވެ.

ރާއްޖެއަކީ ދުވަސްވީ ޤަދީމީ ޤައުމެއް. ހޯދުންތަކުން ކަށަވަރުކުރެވިފައިވާ ގޮތުގައި ދިވެހި ދައުލަތެއް ހިނގަމުންދާތާ 4000 އެއްހާ އަަހަރު ވެއްޖެ. މި ގޮތުން އެކިފަހަރު ދިވެހިންގެ މިނިވަންކަމަށް ލޮޅުން އެރި. ނަމަވެސް ކޮންމެ ފަހަރަކުވެސް އަޅުވެތިކަމަކުން ސަލާމަތްވުމުގެ ތާރީޚެއް މި ޤައުމުގައި އޮތީ

ވަޒީރު އާދަމް ނަޞީރު އިބްރާހީމް 

މި ރަސްމިއްޔާތުގައި "ދިވެހި ތާރީޚަށް އައު އަލިކަމެއް" މި ފޮތް ދިވެހިބަހާ ބެހޭ ވުޒާރާގެ ވެބްސައިޓުގައި އިފްތިތާޙްކުރެވުނެވެ. މި ފޮތް އިފްތިތާޙުކޮށްދެއްވީ ދިވެހިބަހާއި އަދަބިއްޔާތުގެ ދާއިރާއިން ޝަރަފުވެރިކަމުގެ ޤައުމީ އިނާމް ލިބިވަޑައިގެންފައިވާ އާދަމް ޢަބްދުއްރަޙްމާން (އުތީމު އާދަމްބެ) އެވެ.

ރަސްމިއްޔާތަށްފަހު ދިވެހި ޤައުމިއްޔަތުގެ ޢިލްމުތައް ހއ. އަތޮޅުގެ ރައްޔިތުންނަށް އަރުވާފައިވެއެވެ. މި ޢިލްމުތައް ހުށައަޅައިދެއްވީ ދިވެހި ތަރިކަ ދިރާސާކުރާ ޤައުމީ މަރުކަޒުގެ ވިލަރެސްވެރިންނެވެ. ބައިވެރިންގެ ތެރެއިން ގިނަ ބަޔަކު މި މަސައްކަތަކީ ވަރަށް މުހިންމު މަސައްކަތެއްގެ ގޮތުގައި ފާހަގަކޮށްފައިވެއެވެ.



ދިވެހި ޤައުމިއްޔަތު އަލުން އިޢާދަކުރުމުގެ މަޝްރޫޢަކީ ދިވެހިންގެ އަސްލުތަކާއި ނަސްލާ ބެހޭ މަޢުލޫމާތާއި އިހު އުޅުނު ދިވެހިންގެ ރީތި އާދަކާދަތައް އަދުގެ މުޖުތަމަޢުގައި އަށަގެންނެވުމުގެ މަޝްރޫޢެކެވެ. އަދި ދިވެހިބަހާއި ސަގާފަތާއި ތަރިކައާއި ތާރީޚު ދަމަހައްޓައި އޭގެ މުހިންމުކަން ދިވެހިންނަށް ވިސްނައިދިނުމަކީވެސް މި މަޝްރޫޢުގެ ދަށުން ކުރާ މުހިންމު މަސައްކަތެކެވެ.
                    

މި ލިޔުން ކިޔާލުމުން

Ads by MSS