ފުރަތަމަ ފަހަރަށް ދިވެހިރާއްޖެއަށް ރިހި މެޑަލް ހޯދައިދިން ޤައުމީ އަންހެން ބާސްކެޓްބޯޅަ ޓީމަށް މަރުޙަބާ : ރައީސް މުޢިއްޒު

އިންޑިއާގެ ނިއު ދިއްލީގައި ބޭއްވުނު ތިންވަނަ ސައުތު އޭޝިއަން ބާސްކެޓްބޯލް އެސޯސިއޭޝަން (ސާބާ) ވިމެންސް ޗެމްޕިއަންޝިޕުން ދިވެހިރާއްޖެއަށް ތާރީޚީ ރިހި މެޑަލް ހޯދައިދިން ޤައުމީ އަންހެން ބާސްކެޓްބޯޅަ ޓީމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު މަރުޙަބާ ވިދާޅުވެއްޖެއެވެ.

ރައީސުލްޖުމްހޫރިއްޔާ ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައިވަނީ، މުބާރާތުގެ ފައިނަލުގައި ދިވެހިރާއްޖެއާއި އިންޑިއާ ވާދަކުރި މެޗުގައި، ދިވެހި ޤައުމީ ޓީމުން ދެއްކި ރީތި ކުޅުމާއި ކުރި ހިތްވަރަށް ސާބަސް ދަންނަވާ ކަމަށެވެ. މިއީ މި މުބާރާތުން ދިވެހިރާއްޖެއަށް ފުރަތަމަ ފަހަރަށް ރިހި މެޑަލް ލިބުނު ފަހަރެވެ.

3 ވަނަ 'ސާބާ އަންހެން ބާސްކެޓް ބޯޅަ' މުބާރާތުން، ފުރަތަމަ ފަހަރަށް ދިވެހިރާއްޖެއަށް ރިހި މެޑަލް ހޯދައިދިން ޤައުމީ އަންހެން ބާސްކެޓްބޯޅަ ޓީމަށް މަރުޙަބާ ދަންނަވަން.

އިންޑިއާގެ ނިއު ދިއްލީގައި ކުރިއަށްދިޔަ ސަރަޙައްދީ މި މުބާރާތުގެ ފައިނަލުގައި ދިވެހިރާއްޖެ އާއި އިންޑިއާ ވާދަކުރި… pic.twitter.com/BIeaCfsb7f

— Dr Mohamed Muizzu (@MMuizzu) February 27, 2025

ރައީސުލްޖުމްހޫރިއްޔާގެ ނައިބު އަލްއުސްތާޛު ޙުސައިން މުޙައްމަދު ލަޠީފްވެސް ވަނީ ޤައުމީ އަންހެން ބާސްކެޓްބޯޅަ ޓީމުން ހޯދި ކާމިޔާބީ ފާހަގަކުރައްވާ ޓީމަށް މަރުޙަބާ ވިދާޅުވެފައެވެ. ނައިބު ރައީސް ވިދާޅުވެފައިވަނީ މިއީ ޤައުމު ފަޚުރުވެރިވާ ކާމިޔާބީއެއް ކަމަށާއި، ޓީމުން ދެއްކީ ނަމޫނާ ކުޅުމެއްކަމަށެވެ.

A huge congratulations to our Women’s National Basketball Team for winning the silver medal at the 2025 Basketball SABA Women’s Championship! Your passion, dedication, and hard work have made the entire nation proud, setting a remarkable example for young girls across the… pic.twitter.com/yMszNeCoRN

— Hussain Mohamed Latheef (@HucenSembe) February 27, 2025

މުބާރާތުގެ ފައިނަލުގައި އިންޑިއާއިން ރާއްޖޭގެ މައްޗަށް ކުރިހޯދީ 107-32 ޕޮއިންޓުންނެވެ. ރާއްޖޭގެ ޓީމުން އެންމެ ގިނަ ޕޮއިންޓް ހޯދީ 7 ޕޮއިންޓް ހޯދި ރައިފާ އިބްރާހީމެވެ. އޭގެ ފަހުން އެންމެ ގިނަ ޕޮއިންޓް ހޯދީ 6 ޕޮއިންޓް ހޯދި އައިމިނަތު ޝިއުރާ އަބްދުލް ބާރީ އާއި އީހައު ޝަމީމެވެ.

މިއީ ރާއްޖޭގެ އަންހެން ބާސްކެޓްބޯޅަ ކުޅުމުގެ ތާރީޚުގައި މިހާތަނަށް ލިބުނު އެންމެ ބޮޑު ކާމިޔާބީއެވެ. މީގެކުރިން ރާއްޖެއިން ވަނީ މި މުބާރާތުން ލޯ މެޑަލް ހޯދާފައެވެ. މި ފަހަރުގެ މުބާރާތުގައި އިންޑިއާ، ނޭޕާލް އަދި ދިވެހިރާއްޖެ ވާދަކުރިއެވެ.