ފްލެޓު ލިބޭނެ ކަމަށް ޝަރުތު ހަމަވެފައިވަނީ 1،820 މީހުން: ހައުސިންގ މިނިސްޓަރ

'ގެދޮރިވެރިޔާ' ސްކީމުގެ ދަށުން ފްލެޓު ލިބޭ މީހުންގެ ލިސްޓުގެ ވެރިފިކޭޝަން މަސައްކަތް ނިންމާލުމަށްފަހު، ފްލެޓު ލިބޭނެ ކަމަށް ޝަރުތު ހަމަވެފައިވަނީ 1،820 މީހުން ކަމަށް ހައުސިންގ މިނިސްޓަރު ޑރ. އަބްދުﷲ މުއްތޮލިބު މިއަދު ވިދާޅުވެއްޖެއެވެ.

މިނިސްޓަރު މުއްތޮލިބު ވިދާޅުވި ގޮތުގައި، ފްލެޓަށް އެދި ފޯމު ހުށަހެޅި 4،939 މީހުންގެ ތެރެއިން 45 އިންސައްތަ މީހުން ޝަރުތު ހަމަވެފައިވާ ކަމަށް ފާހަގަކުރެވުނެވެ. އެ މީހުން ހުށަހަޅާފައިވާ ލިޔެކިޔުންތަކާއި ސަރުކާރުގެ ޑޭޓާބޭސްގައި ހުރި މަޢުލޫމާތުތައް ސައްޙަތޯ ބަލާފައިވާނެ ކަމަށްވެސް އެމަނިކުފާނު ވިދާޅުވިއެވެ.

ވަޒީރު މިހެން ވިދާޅުވީ، ކުރީ ސަރުކާރުން ޢާންމުކުރި 4000 ފްލެޓު ލިބޭ މީހުންގެ ލިސްޓު އާންމުކުރުމަށް ބޭއްވި ޕްރެސްކޮންފަރެންސްގައި ވާހަކަފުޅު ދައްކަވަމުންނެވެ. މި ވެރިފިކޭޝަން ކުރިއަށްގެންދިޔައީ 26 ޖޫން 2022ގައި ޢާންމުކޮށް ގެޒެޓުކުރި ގެދޮރުވެރިޔާ އުސޫލަށާއި، ގެދޮރުވެރިޔާ ޕޯޓަލްގައި ހިމަނާފައިވާ އިރުޝާދުތަކަށް މައިގަނޑުގޮތެއްގައި ބަލައިގެންކަމަށް ވަޒީރު ވިދާޅުވިއެވެ.

ވަޒީރުގެ ވާހަކަފުޅުގައި، 3 ކޮޓަރީގެ ފްލެޓުތަކަށް 75 ޕޮއިންޓު ލިބިފައިވާ 3721 މީހުންގެ ތެރެއިން ޝަރުތު ހަމަވަނީ 1423 މީހުންނަށްކަމަށާއި، 2 ކޮޓަރީގެ ފްލެޓުތަކަށް 73 ޕޮއިންޓު ލިބިފައިވާ 1218 މީހުންގެ ތެރެއިން ޝަރުތު ހަމަވަނީ 397 މީހުންނަށްކަމަށް ވިދާޅުވިއެވެ.

ވެރިފިކޭޝަން މަރުހަލާ ކުރިއަށްދިޔައީ ޕޯޓަލްގެ ތެރެއިންކަމަށާއި، ޕޯޓަލްއިން ހުށައަޅާފައިވާ އެއްވެސް ފޯމަކަށް ނުވަތަ ލިޔެކިޔުމަކަށް ބަދަލުގެނައުމުގެ ފުރުޞަތު އެއްވެސް މީހަކަށް ލިބިފައިނުވާނެކަމުގެ ޔަޤީންކަން ވަޒީރު ދެއްވިއެވެ. އަދި ފްލެޓު ލިސްޓާމެދު އެއްވެސް ޝަކުވާއެއް އޮތްނަމަ ސިޓީ ނުވަތަ އީމެއިލުން އެ ވުޒާރާއަށް ހުށައެޅޭނެކަމަށްވެސް ވަޒީރު ވިދާޅުވިއެވެ.
                   

މާލޭގައި 15 އަހަރު ދިރިއުޅެފައިވާ ކަމުގެ ލިޔުން ހުށަނާޅާ ފަރާތްތައްވެސް ފްލެޓް ލިބޭ މީހުންގެ ލިސްޓްގައި ހިމަނާފައިވާކަން ފާހަގަކުރެވިފައިވެއެވެ. މީގެއިތުރުން ފްލެޓް ނުލިބޭ ކަމަށް ފާހަގަކުރެވޭ ފަރާތްތަކަށް ޝަކުވާ ހުށަހެޅުމަށް 1 މަސްދުވަހުގެ މުއްދަތެއް ދީފައިވާ ކަމަށް މިނިސްޓަރު މުއްތޮލިބު ވިދާޅުވިއެވެ.