3 ކޮޓަރީގެ ފްލެޓަށް 1423 މީހުން ޝަރުތު ހަމަވިއިރު 2 ކޮޓަރީގެ ފްލެޓް ލިބެނީ 397 މީހުންނަށް

ގެދޮރުވެރިޔާ ސްކީމްގެ ދަށުން ޢިމާރާތްކޮށްފައިވާ ފްލްޓްތަކަށް ޝަރުތުހަމަވެފައިވަނީ ޖުމްލަ 1820 މީހުން ކަމަށް ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެ އެވެ.

ވަޒީރު މިފަދައިން ވިދާޅުވީ، ކުރީ ސަރުކާރުން ޢާންމުކުރި 4000 ފްލެޓު ލިބޭ މީހުންގެ ލިސްޓު އާންމުކުރުމުގެ ކުރިން އެ ވުޒާރާއިން ބޭއްވި ޕްރެސް ކޮންފަރެންސްގައި ވާހަކަފުޅު ދައްކަވަމުންނެވެ.

ވަޒީރު ވިދާޅުވީ، ކުރީ ސަރުކާރުން އިޢުލާނުކޮށްފައިވާ ގޮތުން ނަމަ 3 ކޮޓަރީގެ ފްލެޓްތައް ލިބޭނީ 76 ޕޮއިންޓުން މަތިން ލިބޭ މީހުންނަށް ކަމަށެވެ. އަދި 3 ކޮޓަރީގެ ބާކީ ފްލެޓްތައް ގުރުއަތުލުމަށް ފަހު ހޮވޭ ފަރާތްތަކަށް ދެވޭނެ ކަމަށް އޭރު ވަނީ ނިންމަވާފައެވެ. އެގޮތުން، އޭރު ވަނީ 75 ޕޮއިންޓަށްވުރެ މަތިން ފްލެޓު ލިބޭނެކަމަށް 3721 މީހުން ހިމަނުއްވާފައެވެ. ނަމަވެސް، 3 ކޮޓަރީގެ ފްލެޓްތައް ގޮތުގައި ޢިމާރާތްކުރަމުން ދަނީ 2750 ފްލެޓުކަމަށް ވަޒީރު މުއްޠަލިބު ވަނީ ފާހަގަކުރައްވާފަ އެވެ.

މީގެ އިތުރުން ވަޒީރު ވިދާޅުވީ، ކުރީ ސަރުކާރުން ވަނީ 2 ކޮޓަރީގެ ފްލެޓްތައް 73 ޕޮއިންޓުން މަތިން ލިބޭ މީހުންނަށް ދިނުމަށް ނިންމާފައި ކަމަށެވެ. އަދި އެ ޢަދަދަށް ޕޮއިންޓު ލިބިފައިވާ 1218 މީހުން ލިސްޓުގައި ތިބިކަމަށް ވަޒީރު ފާހަގަކުރެއްވިއެވެ. ނަމަވެސް، ޢިމާރާތްކުރަމުންދަނީ 2 ކޮޓަރީގެ 1250 ފްލެޓެވެ. އެހެންކަމުން، ވެރިފައިކުރި ލިސްޓުގައި ހިމެނެނީ ޖުމްލަ 4930 މީހުންކަމަށް ވަޒީރު ވިދާޅުވިއެވެ.

ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވީ، އެ ވުޒާރާއިން ކުރިއަށްގެންދިޔަ ވެރިފިކޭޝަން މަރުޙަލާގެ ނަތީޖާއަށް ބަލާއިރު، 3 ކޮޓަރީގެ ލިސްޓުގައި ހިމެނޭ 3721 މީހުންގެތެރެއިން ޝަރުތު ހަމަވެ 75 ޕޮއިންޓު ލިބިފައިވަނީ 1423 މީހުންނަށްކަމަށެވެ. އަދި 2 ކޮޓަރީގެ ލިސްޓުގައިވާ 1218 މީހުންގެ ތެރެއިން ޝަރުތުހަމަވެ 73 ޕޮއިންޓު ލިބިފައިވަނީ 397 މީހުންނަށްކަމަށެވެ.

ވަޒީރު ވިދާޅުވީ، ލިސްޓުގައި ހިމަނާފައިވާ މީހުން ފިޔަވާ އިތުރު ބައެއްގެ ފޯމު ބަލާފައިނުވާކަމަށާއި، ޝަރުތު ހަމަނުވާ ފަރާތްތަކާއި ކަނޑައަޅާފައިވާ މިންވަރަށްވުރެ ދަށުން ޕޮއިންޓު ލިބުނު މީހުން، ފްލެޓު ނުލިބޭ މީހުންގެގޮތުގައި ކަނޑައަޅާފައިވާކަމަށެވެ.