މެޑަމް ސާޖިދާ ރަސްމީ ދަތުރުފުޅެއްގައި ހއ. އިހަވަންދުއަށް

ރައީސުލްޖުމްހޫރިއްޔާ ޑރ މުޙައްމަދު މުޢިއްޒުގެ އަނބިކަނބަލުން މެޑަމް ސާޖިދާ މުޙައްމަދު ރަސްމީ ދަތުރުފުޅެއްގައި ހއ. އިހަވަންދުއަށް ވަޑައިގެންފިއެވެ. އެކަމަނާ އިހަވަންދުއަށް ވަޑައިގަތުމުން ރަށުގެ ރައްޔިތުން ވަނީ ހޫނު މަރުހަބާއެއް ދަންނަވާފައެވެ.

ރައީސްގެ އަނބިކަނބަލުންނަށް އިހަވަންދޫން ރަސްމީކޮށް މަރުހަބާ ދެންނެވީ ސިއްޙީ ވަޒީރު ޢަބްދުﷲ ނާޡިމް އިބްރާހީމާއި ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު އަޙްމަދު ނަޞީރެވެ.

މެޑަމް ސާޖިދާގެ މި ދަތުރުފުޅަކީ އިހަވަންދޫ އާމިނާދިޔޯ ސިއްޙީ މަރުކަޒުގައި ޑައިލިސިސްގެ ޚިދުމަތް ރަސްމީކޮށް ފައްޓަވައިދެއްވުމަށް ކުރައްވާ ދަތުރުފުޅެކެވެ.  އިހަވަންދޫ ސްކޫލުގައި މިއަދު ހަވީރު ބާއްވާ ޚާއްސަ ރަސްމިއްޔާތުގައި މެޑަމް ސާޖިދާ ސިއްޚީ މަރުކަޒަށް ވަޑައިގެން ޑައިލިސިސް ޔުނިޓްގެ މަސައްކަތްތައް ބައްލަވާލައްވާނެއެވެ

މީގެ އިތުރުން، "ފުއްޓަރު އުފާ"ގެ ނަމުގައި މި ރަށުގައި ތަރައްޤީކުރާ ހިތްފަސޭހަ މައިޒާނުގެ ބިންގާވެސް މިދަތުރުފުޅުގެ ތެރެއިން އަޅުއްވައިދެއްވުމަށް ވަނީ ހަމަޖެހިފައެވެ. މި މައިޒާނަކީ އިހަވަންދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީއާއި އޭ.ކޭ.އެޗް ފައުންޑޭޝަން ގުޅިގެން ތަރައްޤީކުރާ މައިޒާނެކެވެ. 

ހއ. އިހަވަންދޫ ޞިއްޙީ މަރުކަޒުގައި ޑައިލިސިސްގެ ޚިދުމަތް ފެށުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެކެވެ. ރައީސުލްޖުމްހޫރިއްޔާ މިދިޔަ ޖެނުއަރީމަހު އުތުރުގެ އަތޮޅުތަކަށް ކުރެއްވި ދަތުރުފުޅުގެ ތެރެއިން އިހަވަންދޫގެ ރައްޔިތުންނާއެކު ބޭއްވެވި ބައްދަލުކުރެއްވުމުގައި އެމަނިކުފާނު ވަނީ ރަމަޟާންމަހުގެ ކުރިން މި ރަށުގައި ޑައިލިސިސްގެ ޚިދުމަތް ފަށްޓަވާނެކަމުގެ ޔަޤީންކަން އެރަށުގެ ރައްޔިތުންނަށް ދެއްވާފައެވެ.

ކިޑްނީ ބަލީގައި ޑައިލިސިސް ހަދަންޖެހޭ 10 ޕޭޝަންޓުން މިވަގުތުވެސް އިހަވަންދޫގައި އެބަތިއްބެވެ. މި ޚިދުމަތް ހޯދުމަށް އެ މީހުން ދާންޖެހެނީ ހއ. ދިއްދޫ ނުވަތަ ކުޅުދުއްފުށި ސިޓީއަށެވެ. މިއީ ރައްޔިތުންގެ އަތުން ބޮޑު ޚަރަދެއްވެސް ހިނގާކަމެކެވެ. އެހެންކަމުން ރަށުގައި ތިބެގެން މި ޚިދުމަތް ލިބުން ވެގެންދާނީ ރަށުގެ ރައްޔިތުންނަށް ލިބިގެންދާ ވަރަށް ބޮޑު ލުއިފަސޭހައެއްގެ ގޮތުގައި މި ރަށު ރައްޔިތުންވެސް ދެކެއެވެ.