މީރާގެ ވާރުޕޭ މެދުވެރިކޮށް ހެޔޮ ކަންކަމަށް ހޭދަކުރުމުގެ ފުރުޞަތު ހުޅުވާލައިފި

މޯލްޑިސްވް އިންލެންޑް ރެވެނިއު އޮތޯރިޓީ، މީރާގެ އޮންލައިން ޕޯޓަލް "ވާރުޕޭ" މެދުވެރިކޮށް ހެޔޮކަންކަމަށް ހޭދަކުރުމުގެ ފުރުޞަތު ހުޅުވާލައިފިއެވެ. 

މިއަދު ބޭއްވެވި ޚާއްޞަ ރަސްމިއްޔާތެއްގައި މިކަން އިފްތިތާޙުކޮށްދެއްވީ، އިސްލާމީ ކަންތައްތަކާ ބެހޭ ވަޒީރު، ޑރ. މުޙައްމަދު ޝަހީމް ޢަލީ ސަޢީދާއި، ކޮމިޝަނަރ ޖެނެރަލް އޮފް ޓެކްސްޒޭޝަން، ހަސަން ޒަރީރެވެ. 

މި ރަސްމިއްޔާތުގައި ވާހަކަފުޅު ދައްކަވަމުން އިސްލާމީ ކަންތައްތަކާ ބެހޭ ވަޒީރު ވިދާޅުވީ، ދިވެހިންނަކީ ހެޔޮކަންކަމަށް ހޭދަކުރުމަށް ޝައުޤުވެރިކަން ހުރި ބައެއްކަމަށާއި، ދުނިޔޭގެ އެކިކަންކޮޅުތަކުގައި ތިބި މުސްލިމުންނަށް އެހީތެރިވުމަށް ދިވެހިން ކުރަމުން ގެންދަވަނީ ނަމޫނާ މަސައްކަތްތަކެއް ކަމަށެވެ. އަދި ރާއްޖެއިން ބޭރުގެ އެކިކަންކަމަށް އެހީތެރިވާ ފަދައިން، ރާއްޖޭގައި ހުރި އެކި ހެޔޮ ކަންކަމަށް ވެސް ހޭދަކުރުމަކީ މުހިންމު ކަމެއްކަމަށް ވަޒީރު ވަނީ ފާހަގަކުރައްވާފައެވެ. އެގޮތުން، ރާއްޖޭގެ އެކި ރަށްރަށުގައި މިސްކިތްތައް ބިނާ ކުރުމާއި، ޤުރުއާން ކުލާސްތަކާއި، ލައިބްރަރީތައް ޤާއިމް ކުރުންފަދަ މުހިންމު ކަންކަން ކުރަން ޖެހިފައި އެބަހުރިކަމަށް ވަޒީރު ވިދާޅުވިއެވެ. 

މީގެ އިތުރުން ވަޒީރު ޑރ. ޝަހީމް ވިދާޅުވީ، ފާއިތުވެދިޔަ ހަފްތާގައި ބޭއްވުނު މަޝްވަރާ ބައްދަލުވުމެއްގައި ހުށައެޅުއްވިކަމެއް ކުޑަ މުއްދަތެއްގެ ތެރޭގައި ނިންމަވާ ހަޤީޤަތަކަށް ހެއްދެވީތީ މީރާގެ ވެރިންނަށާއި މުވައްޒަފުންނަށް ނުހަނު ޝުކުރުވެރިވާ ކަމަށެވެ.

ވާރުޕޭ މެދުވެރިކޮށް ހެޔޮކަންކަމަށް ހޭދަކުރުމަށް އަލަށް ތަޢާރަފްކުރި ކަންތަކުގެ ތެރޭގައި މިސްކިތް ބިނާކުރުމާއި، މިސްކިތްތައް މަރާމާތު ކުރުމާއި، ޤުރުއާން މަރުކަޒުތައް ޤާއިމްކުރުމާއި، ހެޔޮ އެކި ކަންކަމަށް ޙައިރާތުގެ ގޮތުގައި ޞަދަޤާތް ކުރުމުގެ ފުރުސަތު ހިމެނެއެވެ.

މި ރަސްމިއްޔާތުގައި ވާހަކަފުޅު ދައްކަވަމުން ކޮމިޝަނަރ ޖެނެރަލް އޮފް ޓެކްސްޒޭޝަން ހަސަން ޒަރީރު ވިދާޅުވީ، މި މަސައްކަތަކީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދުގެ ދުރުވިސްނުންފުޅާއިއެކު ކުރިއަށް ގެންދެވުނު މުހިންމު މަސައްކަތެއް ކަމަށެވެ. އަދި ވަރަށް ކުރުމުއްދަތެއްގެ ތެރޭގައި މިކަން ޙަޤީޤަތަކަށް ހެދިގެންދިޔުމަކީ ވަރަށް އުފާކުރާ ކަމެއްކަމަށް ހަސަން ޒަރީރު ވަނީ ވިދާޅުވެފައެވެ.

މި މަސައްކަތް ޙަޤީޤަތަކަށް ހެއްދެވުމަށްޓަކައި މީރާއާއި އިސްލާމީ ކަންތައްތަކާ ބެހޭ ވުޒާރާގެ ކަމާއި ގުޅުންހުރި މުވައްޒަފުން ކުރެއްވި މަސައްކަތަކަށްޓަކައި ކޮމިޝަނަރ ޖެނެރަލް އޮފް ޓެކްސްޒޭޝަން ހަސަން ޒަރީރު ވަނީ ޝުކުރު އަދާކުރައްވާފައެވެ.