ނޫރުލް އަޛާން މުބާރާތް މިއަންނަ އަހަރު އިތުރަށް ފުޅާކޮށް ބޮޑުކޮށް ބާއްވަނީ

ނޫރުލް އަޛާން މުބާރާތް މިއަންނަ 2026 ވަނަ އަހަރު އިތުރަށް ފުޅާކޮށް ބޮޑުކޮށް ބާއްވާނެކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.

މި މުބާރާތް ނިންމުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ވިދާޅުވީ، މިއަންނަ އަހަރު މުބާރާތް އިތުރަށް ފުޅާކޮށް، ރާއްޖޭގެ އެކި ރަށްރަށުގެ ބައިވެރިންނަށްވެސް ވާދަކުރެވޭ ގޮތަށް މުބާރާތް ފުޅާކުރުމުގެ ވިސްނުން ގެންގުޅުއްވާކަމަށެވެ. އަދި މި އަހަރުގެ މުބާރާތުގެ ރަންވަނަތައް ހާސިލްކުރާ ބައިވެރިންނަށްނަށް ރަމަޟާން މަހު މާލޭގެ އެންމެ ބޮޑު ދެ މިސްކިތްކަމަށްވާ އިސްލާމީ މަރުކަޒާއި ސަލްމާން މިސްކިތުގައި ބަންގި ގޮވުމުގެ ފުރުސަތު ފަހިކޮށްދެއްވާނެކަމަށް ވަޒީރު ވަނީ ވިދާޅުވެފައެވެ.

މީގެ އިތުރުން އިސްލާމީ ކަންތައްތަކާ ބެހޭ ވަޒީރު ވިދާޅުވީ، މި މުބާރާތް ބޭއްވިގެންދާކަމީ އިސްލާމީ ކަންތައްތަކާ ބެހޭ ވުޒާރާއަށް ލިބޭ ބޮޑު އުފަލެއްކަމަށެވެ. ވަޒީރު ވިދާޅުވީ، މި މުބާރާތުގެ ސަބަބުން މިފަދަ ދީނީ ކަންކަމަށް ކުދިންގެ ހުނަރުތައް އިތުރުކޮށް ކުރިއެރުވުމުގެ ފުރުޞަތު ފަހިވެގެންދާކަމަށެވެ. ހަމަ އެހެންމެ، މުޖްތަމަޢުގައި ބޮޑުވަމުން އަންނަ ޒުވާން ކުދިން މިފަދަ ރޮނގުތަކުން ޙަރަކާތްތެރިވެ ކުރިއަށްދާ މަންޒަރު ފެނުމަކީ އިސްލާމީ މުޖްތަމަޢަށް ލިބިގެންދާ ނުހަނު އުފާވެރި ކަމެއް ކަމަށް ވަޒީރު ވަނީ ފާހަގަކުރައްވާފައެވެ. އަދި އެފަދަ ކުދިން ޚިޔާރުކޮށްފައި އެވަނީ ހެޔޮ މަގެއްކަމަށްވެސް ވަޒީރު ވިދާޅުވިއެވެ.

"ނޫރުލް އަޛާން 1446" މުބާރަތުގެ ފަޚުރުވެރި އެއް ވަނަ ޙާސިލުކޮށްފައިވަނީ ސުލައިމް މުޙައްމަދު ލަޠީފްއެވެ. މުބާރާތުގެ ފައިނަލް ބުރުގައި ޖުމްލަ 6 ބައިވެރިން ވާދަކޮށްފާ ވާއިރު، މިއިން  ކޮންމެ ބައިވެރިއަކަށް ވެސް ވަނީ ޓްރޮފީއާއި، ހަނދާނީ ލިޔުމާއެކު ޙާއްސަ އެކި އިނާމުތަކެއް ދީފައެވެ.