ޚަބަރު
އޮޅުހިޔާގެ ނުނިމި ހުރި މަސައްކަތްތައް ނިންމުމަށް ޓާސްކްފޯސްއެއް އެކުލަވާލައިފި

އޮޅުހިޔާގެ ނުނިމި ހުރި މަސައްކަތްތައް ނިންމުމަށް އެކުލަވާލި ޓާސްކްފޯސް ގެ މަސައްކަތްތަކުގެ ތެރެއިން/ފޮޓޯ: ދަނޑުވެރިކަމާއި ދިރޭތަކެއްޗާއިބެހޭ ވުޒާރާ
މާލެ ސަރަޙައްދުގެ މަގުތަކުގައި އުޅޭ ބުޅާތައް ބަލަހައްޓަން ޤާއިމްކޮށްފައިވާ "އޮޅުހިޔާ" ގެ ނުނިމި ހުރި މަސައްކަތްތައް ނިންމުމަށްޓަކައި އެކަމަށް ޚާއްޞަ ޓާސްކޮފޯސްއެއް އެކުލަވާލާފައިވާކަމަށް ދަނޑުވެރިކަމާއި ދިރޭތަކެއްޗާއިބެހޭ ވުޒާރާއިން ވިދާޅުވެއްޖެއެވެ.
އޮޅުހިޔާ ފެސިލިޓީ ވަނީ ރަސްމީކޮށް ދަނޑުވެރިކަމާއި ދިރޭތަކެއްޗާއި ބެހޭ ވުޒާރާއާ ހަވާލުކޮށްފައެވެ. ނަމަވެސް، އެ ވުޒާރާއިން ވިދާޅުވީ، ފެސިލިޓީގެ މަސައްކަތްތައް ފަށައިގަތުމަށް ބޭނުންވާ ކަންކަން ފުރިހަމަވެފައި ނުވާ ކަމަށެވެ. އެހެންކަމުން، މި ފެސިލިޓީގެ ޚިދުމަތްތައް ވީހާވެސް އަވަހަށް ފެށުމަށްޓަކައި ޚާއްޞަ ޓާސްކްފޯސްއެއް އެކުލަވާލާފައިވާކަމަށް އެ ވުޒާރާއިން ވިދާޅުވިއެވެ. އަދި، މި ޓާސްކްފޯސްގެ މަސައްކަތްތައް ބާރު ސްޕީޑެއްގައި ކުރިއަށް ގޮސް މި ފެސިލިޓީގެ ޚިދުމަށް ވަރަށް އަވަހަށް ފެށިގެންދާނެކަމަށް ދަނޑުވެރިކަމާއި ދިރޭތަކެއްޗާއިބެހޭ ވުޒާރާއިން ވިދާޅުވެއެވެ.
ހުޅުމާލޭގައި ޤާއިމްކޮށްފައިވާ އޮޅުހިޔާގެ ރަސްމީ ހުރިހާ ލިޔެކިޔުންތަކާއި ލީގަލް އެސެޓްސް ޓްރާންސްފަރގެ މަސައްކަތް ނިންމުމަށްފަހު މާލެ ސިޓީ ކައުންސިލުން އެތަން ވަނީ ރަސްމީކޮށް ދިރޭތަކެއްޗާއިބެހޭ ވުޒާރާ އާއި ހަވާލުކޮށްފައެވެ. އޮޅުހިޔާގައި ބުޅާތައް ކަރަންޓީނު ކުރާނެ ސަރަޙައްދަކާއި، ކްލިނިކަކާއި، ލެބޯޓްރީއެއްގެ އިތުރުން، ބުޅާތަކަށް ދޭންޖެހޭ ބޭސްތައް ހުންނަ ފާމަސީއަކާއި، އެ ބުޅާތައް އުޅޭނެ ސަރަޙައްދެއްވެސް ވަނީ ހަދާފައެވެ.