އިހަވަންދޫގައި ތަރައްޤީކުރާ "ފުއްޓަރު އުފާ" މައިޒާނުގެ ބިންގާ އަޅުއްވައިދެއްވައިފި

ހއ. އިހަވަންދޫގައި ތަރައްޤީކުރާ "ފުއްޓަރު އުފާ" މައިޒާނުގެ ބިންގާ އަޅައްވައިދެއްވައިފިއެވެ. 

މި މައިޒާނުގެ ބިންގާ އަޅުއްވައިދެއްވީ އެކަމަށްޓަކާ މިއަދު އިހަވަންދޫގައި ބޭއްވި ޚާއްޞަ ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެ އަނބިކަނބަލުން މެޑަމް ސާޖިދާ މުޙައްމަދު އެވެ. މި ރަސްމިއްޔާތުގައި، ޞިއްޙީ ވަޒީރު ޢަބްދުﷲ ނާޡިމް އިބްރާހީމާއި ރައްޔިތުންގެ މަޖިލީހުގެ އިހަވަންދޫ ދާއިރާގެ މެންބަރު އަޙްމަދު ނަޞީރުވެސް ވަނީ ބައިވެރިވެވަޑައިގެންފައެވެ.

މި މައިޒާނަކީ، އިހަވަންދޫ އަންހެނުންގެ ތަރައްޤީއަށް މަސައްކަތްކުރާ ކޮމެޓީއާއި އޭ.ކޭ.އެޗް ފައުންޑޭޝަން ގުޅިގެން ތަރައްޤީކުރާ ތަނެކެވެ. މި މައިޒާން ޤާއިމްކުރަނީ، އިހަވަންދޫ އާމިނާދިޔޯ ސިއްޙީ މަރުކަޒުކައިރީގައި އޮންނަ ރަށުގެ ފުއްޓަރު ފަރާތުގައެވެ. މިއީ އެރަށުގައި އަލަށް މީހުން އާބާދުވާން ފަށާފައިވާ ސަރަޙައްދެކެވެ. 

އިހަވަންދޫ ކައުންސިލުން ވިދާޅުވީ، މިފަދަ ތަންތަން ޤާއިމްކުރުމުގެ އެންމެ ބޮޑު އެއް މަޤްސަދަކީ ރަށުގެ ރައްޔިތުންނަށް އާއިލާއާއެކު ހިތްހަމަޖެހޭ އުފާވެރި މާހައުލެއްގައި ވަގުތު ހޭދަކޮށްލުމުގެ ފުރުޞަތު ފަހިކޮށްދިނުން ކަމަށެވެ. އެހެންކަމުން، މިފަދަ މާޙައުލުތަކުގައި އެކި ޢުމުރުގެ ކުދިންނަށް ކުޅިވަރު ކުޅެވޭނެ ތަފާތު ވަޞީލަތްތަކާއި، އިށީންދެވޭނެހެން ހަޓްތަކާއި އަށިތައް ހެދިގެންދާނެކަމަށްވެސް ކައުންސިލުން ވިދާޅުވެއެވެ. 

ފުއްޓަރު އުފާ މައިޒާން ޑިޒައިންކޮށްފައިވަނީ، ތަފާތު އެކި ހަރަކާތްތަކާއި އިވެންޓްތަކަށްވެސް މިތަން ބޭނުންކުރެވޭނެ ގޮތަށެވެ. އަދި މިތަނުގެ މަސައްކަތް މިއަހަރުގެ ތެރޭގައި ނިންމާ ބޭނުންކުރަން ފެށޭނެކަމަށް އިހަވަންދޫ ކައުންސިލުން ވިދާޅުވިއެވެ.