ޚަބަރު
މިދިޔަ ސަރުކާރުގެ ފަސް އަހަރު ދުވަސް ފާއިތުވެ ދިޔައީ ޢިއްޒުއްދީން ފާލަން އެއްވެސް ވަރަކަށް މަރާމާތުނުކޮށް: ވަޒީރު މުއްޠަލިބު

ޢިއްޒުއްދީން ފާލަން މަރާމާތުކުރުމަށް ފަހު/ފޮޓޯ: ސަން އޮންލައިން
މިދިޔަ ސަރުކާރުގެ ފަސް އަހަރު ދުވަސް ފާއިތުވެ ދިޔައީ ޢިއްޒުއްދީން ފާލަން އެއްވެސް ވަރަކަށް މަރާމާތުނުކޮށްކަމަށް އިމާރާތްކުރުމާއި ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
ވަޒީރު މިފަދައިން ވިދާޅުވީ، ޢިއްޒުއްދީން ފާލަން މަރާމާތުކުރުމަށްފަހު އަލުން ހުޅުވާލުމަށް މިރޭ ބޭއްވި ޚާއްޞަ ރަސްމިއްޔާތުގައި ވާހަކަފުޅުދައްކަވަމުންނެވެ. ވަޒީރު ވިދާޅުވީ، މި ސަރުކާރުން ވެރިކަމާއި ހަވާލުވެވަޑައިގެންނެވިއިރު އެ ފާލަން އޮތީ ޢާންމު ރައްޔިތުންނަށް ގެއްލުންވާ ވަރަށް ވީރާނެވެފައި ކަމަށެވެ. އެގޮތުން، ފާލަމުގައި ބޭނުންކޮށްފައިވާ ދަނގަޑުތައް ހުރީ ހަލާކުވެފައިކަމަށް ވަޒީރު ވަނީ ފާހހަގަކުރައްވާފަ އެވެ.
ވަޒީރު ވިދާޅުވީ، ފާލަމުގެ ޙާލަތު އޮތް ގޮތުން މި ސަރުކާރުން އެތަން ރޫޅާލުމަށް މޯލްޑިވްސް ޓްރާންސްޕޯޓް އެންޑް ކޮންސްޓްރަކްޓިންގ ކޮމްޕެނީ، އެމްޓީސީސީ އަށް އެންގިކަމަށެވެ. ނަމަވެސް، އޭރު ފާލަން ރޫޅާލި ނަމަވެސް އެތަން މަރާމާތުކުރުމުގެ މަސައްކަތް ފެށުމަށް ހަމަޖެހިފައި ނުވާ ކަމަށް ވަޒީރު ވިދާޅުވިއެވެ. އެހެންކަމުން، ރައީސުލްޖުމްހޫރިއްޔާ އޭގެ ފަހުން އެންގެވި ގޮތުގެ މަތިން ފާލަން ރޫޅާލައި، އެ ސަރަޙައްދު ބަންދުކުރުމަށް ފަހު، ކުރި ބުރަ މަސައްކަތުން މިހާރު ވަނީ މި ފާލަން އެންމެ ބޭނުންވާގޮތަށް ތަރައްޤީކުރެވިފައި ކަމަށް ވަޒީރު ވަނީ ވިދާޅުވެފައެވެ.
މީގެ އިތުރުން ވަޒީރު ވިދާޅުވީ، ޢިއްޒުއްދީން ފާލަން މަރާމާތުކުރުމުގެ މަސައްކަތަކީ ގާތްގަނޑަކަށް 11 މިލިއަން ރުފިޔާ ޚަރަދުވެފައިވާ މަޝްރޫޢެއް ކަމަށެވެ. އަދި މި މަސައްކަތުގައި ދިވެހި ސަރުކާރަށް އެންމެ ބޮޑު އެހީތެރިކަމަކާއި އެއްބާރުލުން ދެއްވި އެމްޓީސީސީ ގެ މުޅި ޓީމަށް ވަޒީރު ވަނީ ޝުކުރު ދަންނަވާފައެވެ. ވަޒީރު ވިދާޅުވީ، ޢިއްޒުއްދީން ފާލަމުގެ މަސައްކަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަރަށް ގާތުން ބެއްލެވި ކަމަށެވެ. އަދި އެމަނިކުފާނު ދެއްވެވި އެއްބާރުލުމާއި، ރާއްޖޭގެ ތަރައްޤީއަށް ރައީސް ގެންގުޅުއްވާ ދުރު ވިސްނުންފުޅު ވަޒީރުގެ ވާހަކާގައި ވަނީ ފާހަގަކުރައްވާފަ އެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަކީ، މާލޭގެ މަލަމަތީގެ ހިތްފަސޭހަކަން ކަށަވަރުކުރުމަށް ނުހަނު ބޭނުންފުޅުވާ ފަރާތެއްކަމަށް ވަޒީރު ވަނީ ވިދާޅުވެފަ އެވެ.