ރޯދައިގެ މައިގަނޑު މަޤްޞަދަކީ ތަޤުވާވެރިވުން: ޚުޠުބާ

ރޯދައިގެ މައިގަނޑު މަޤްޞަދަކީ ތަޤުވާވެރިވުން ކަމުގައި މިއަދުގެ ހުކުރު ޚުޠުބާގައި ބުނެފިއެވެ. މި ތަޤްވާވެރިކަން ހޯދާނީ ހެޔޮޢަމަލުކޮށްގެންނާއި، ދީނުގައި ނަހީކުރައްވާފައިވާ ކަންކަމުން ދުރުހެލިވެގެނެވެ.

ރޯދައިގެ މައިގަނޑު މަޤްޞަދަކީ ތަޤުވާވެރިވުން ކަމުގައިވީނަމަވެސް، މި މާތް މައްސަރަކީ ގިނަގުނަ ފައިދާތަކެއް ލިއްބައިދޭ މައްސަރެކެވެ. އެގޮތުން މިއީ ކެތްތެރިކަމުގެ މަތިވެރި ތަމްރީނެއްކަމަށް ވެސް ޚުޠުބާގައި ބުންޏެވެ. 

މީގެ އިތުރުން، މުޅި ދުވަހު ކެއިންބުއިމުން އެއްކިބާވެ ހުރުމުގެ ސަބަބުން، ރޫހާނީ ގިނަ ފައިދާތަކެއް ވެސް ލިބެއެވެ. އޭގެ ތެރޭގައި ދުނިޔޭގެ އެދުންތަކާއި ދުރުވުމާއި، ދަހިވެތިކަން ކުޑަވުމާއި އަދި ރޫޙާނީ ބާރު އިތުރުވުން ހިމެނެއެވެ.

ރޯދަވެރިޔާ ހިފާ ރޯދައިގެ ދަރުމަ އެންމެ ފުރިހަމައަށް ހޯދުމަށް، ރޯދަވެރިޔާ ދުރުހެލިވާންޖެހޭ ބައެއް ކަންކަން ވެސް ހުރެއެވެ. އެގޮތުން، ނުބައި ބަސްތައް ބުނުމާއި، ނުބައި ކަންކަމުން އެއްކިބާވެ ދުރުހެލިވުން ހިމެނެއެވެ. އަދި ޒުވާބުކުރުމާއި އަރައިރުންވުމުން ވެސް ދުރުހެލިވާންޖެހެއެވެ. އެހެންނޫންނަމަ، އެމީހާ ހިފާ ރޯދައިން ބަނޑުހައި ހޫނުކަން ނޫން އިތުރުކަމެއް ނުލިބޭނެކަމަށް ކީރިތި ރަސޫލާ ވެސް ވެސް ވަނީ ހަދީޘްކުރައްވާފައެވެ.

އަދި ދޮގުހެދުމާއި، ދެބައޮޑުވުމާއި، ނެތިމޮށުމާއި، މަކަރުހެދުން ފަދަ ޢަމަލުތައްކުރާ މީހުންގެ ރޯދަ ނުގެއްލުނަސް، އެމީހުންގެ ރޯދައިން ލިބޭނެ މާބޮޑު ފައިދާއެއް ނޯންނާނެކަމަށް ވެސް ހުކުރު ޚުޠުބާގައި ހާމަކޮށްފައިވެއެވެ. 

އިސްލާމީ ޝަރީޢަތުގައި ރޯދަ ގެއްލޭނެކަންކަންކަމަށް ބުނެފައިވާ ބައެއް އާންމު ކަންކަމަކީ، ގަދަކަމުން ހޮޑުލުމާއި، ކެއިންބުއިމާއި، ޖިމާޢުވުމާއި، މިފަދަ ކަންކަމުގެ ދަރަޖައިގައި ހިމެނޭ ކަންކަމެވެ. މީގެ އިތުރުން މުޅި ދުވަހު މަސްތުގެ ހާލުގައި ހުންނަ މީހާގެ ރޯދަ ވެސް ގެއްލޭނެއެވެ. 

ނަމަވެސް، ހަނދާންނެތިގެން ކުރެވޭ ބައެއް ކަންކަމުން ރޯދަ ގެއްލިގެނެއް ނުދާނެއެވެ. އެގޮތުން ހަނދާންނެތިގެން އެއްޗެއް ކެވުމަކުން، ނޫނީ ފެންފޮދެއް ބޮވުމަކުން މީހެއްގެ ރޯދައެއް ނުގެއްލޭނެއެވެ. 

ތިމާގެ އަމިއްލަ ބާރެއް ނެތި ރޯދަ ގެއްލޭ ކަންކަމުގެ ތެރޭގައި ހިމެނެނީ މުޅި ދުވަހު ހޭނެތިފައި އޮތުމާއި، ޙައިޟުވެރިކަމާއި ނިފާސްވެރިކަމެވެ.