ރަމަޟާންމަހު މާލެ ސިޓީގެ 24 މިސްކިތެއްގައި ޙިފްޡްކޮށް ތަރާވީޙް ނަމާދު ކުރާނެ

ރަމަޟާން މަހު މާލޭ ސިޓީގެ 24 މިސްކިތެއްގައި ޙިފްޘްކޮށް ތަރާވީޙް ނަމާދު ކުރާނެކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއްޖެ އެވެ. 

އެ ވުޒާރާއިން ވިދާޅުވީ، މާލޭގެ ޖުމްލަ 16 މިސްކިތެއްގައި ޙިފްޘްކޮށް ތަރާވީޙް ނަމާދު ކުރުމަށް ހަމަޖެހިފައިވާ ކަމަށެވެ. އަދި ހުޅުމާލޭގެ 7 މިސްކިތެއްގައި މިކަން ހަމަޖެހިފާވާއިރު، ވިލިމާލޭގެ 1 މިސްކިތުގައި ޙިފްޘްކޮށް ތަރާވީޙް ނަމާދު ކުރާނެ ކަމަށް އިސްލާމީ ކަންތައްތަކާ ބެހޭ ވުޒާރާއިން ވިދާޅުވެއެވެ.

އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، މިއަހަރު ރަމަޟާން މަހު މާލޭގެ ގިނަ މިސްކިތްތަކެއްގައި އިމާވުވެ ތަރާވީޙް ނަމާދު ކުރާނީ ޒުވާން ޙާފިޘުން ކަމަށެވެ. އެގޮތުން، މާލޭގެ އެންމެ ބޮޑު މިސްކިތްކަމަށްވާ އިސްލާމީ މަރުކަޒުގައި ތަރާވީޙު ނަމާދު ކުރައްވާނީ، މަރުކަޒުގެ އިމާމު އައްޝައިޚު އަލްޙާފިޒު ސަލްމާން މުޙައްމަދު ލަޠީފާއި، އަލްޙާފިޒް ޢުވައިސް ބިން އިނާޒް، އަލްޙާފިޒް ޚިޟްރު ބިން ޢިމާދުގެ އިތުރުން އައްޝައިޚު އަލްޙާފިޒް ސުލްޠާން މުޙައްމަދު ލަޠީފްއެވެ. މީގެ އިތުރުން، ފަހު ދިހައިގައި ދަމު ނަމާދު އިމާމުވެ ކުރައްވާނީ އައްޝައިޚު އަލްޙާފިޒު ސަލްމާން މުޙައްމަދު ލަޠީފާއި އައްޝައިޚު އަލްޙާފިޒު ސުލްޠާން މުޙައްމަދު ލަޠީފް އެވެ.

މިއަހަރުގެ ރަމަޟާން މަހުގައި މާލޭގެ ސަލްމާނު މިސްކިތުގައި ތަރާވީޙު ނަމާދާއި ދަމު ނަމާދު ކުރެއްވުމަށް ހަމަޖެހިފައިވަނީ އަލްޙާފިޒް އާދަމް މިޝްއަލް ޝާމިން، އަލްޙާފިޒް މުޙައްމަދު މިޝްއަލް އާޡިމްގެ އިތުރުން އަލްޙާފިޒް އަބްދުﷲ އަޙްސަން ސަޢީދު އެވެ. 

މިއަަހަރުގެ ރަމަޟާން މަހު މާލެ ސިޓީގައި ޙިފްޘްކޮށް ތަރާވީޙް ނަމާދުކުރުމަށް ހަމަޖެހިފައިވާ މިސްކިތްތައް:
1. މަސްޖިދުއްސުލްޠާން މުޙައްމަދު ތަކުރުފާނުލް އަޢުޡަމް (އިސްލާމީ މަރުކަޒު) - މާލެ
2. މަސްޖިދު މަލިކި ސަލްމާން - މާލެ
3. މަސްޖިދުއްސުލްޠާން މުޙައްމަދު ބިން ޢަބްދިﷲ (ވިޔަފާރިވެރިންގެ މިސްކިތް) - މާލެ
4. މަސްޖިދުއްސުލްޠާން މުޙައްމަދު ފަރީދުލް އައްވަލު (ދުބުރި މިސްކިތް) - މާލެ
5. މަސްޖިދުއްސުލްޠާން ޙަސަން ޢިއްޒުއްދީން (ޠައިބާ މިސްކިތް) - މާލެ
6. މަސްޖިދު ޢަލީ ޙުސައިން (މާވެޔޮ މިސްކިތް) - މާލެ
7. މަސްޖިދު ޞަލާޙުއްދީން - މާލެ
8. މަސްޖިދުލް ފުރުޤާން - މާލެ
9. މަސްޖިދުއްނޫރު - މާލެ
10. މަސްޖިދު އިބްރާހީމް - މާލެ
11. މަސްޖިދުއް ޝަހީދު ޢަލީ - މާލެ
12. މަސްޖިދު އިސްކަންދަރު - މާލެ
13.މަސްޖިދު ޝަހީދު ޢަބްދުއްރަޙްމާން (ފަނޑިޔާރު މިސްކިތް) - މާލެ
14. މަސްޖިދުއްސުލްޠާން މުޙައްމަދު ޢިމާދުއްދީން (ރަން މިސްކިތް) - މާލެ
15. މަސްޖިދުއްޝައިޚް މުޙައްމަދު ޖަމީލް ދީދީ (ފައިފުހޭ މިސްކިތް) - މާލެ
16. މަސްޖިދުއް ޛިކުރާ - މާލެ
17. މަސްޖިދުލް އިޚްލާޞް - ވިލިމާލެ
18. މަސްޖިދުއް ޝައިޚް ޤާސިމް ބިން މުޙައްމަދު އާލްޘާނީ (ވައްގުއްބު މިސްކިތް)-ހުޅުމާލެ ފޭސް1
19. މަސްޖިދު ޢަޒީޒާ މޫސާ - ހުޅުމާލެ ފޭސް 1
20.މަސްޖިދުލް ވާލިދައިނި - ހުޅުމާލެ ފޭސް 1
21. މަސްޖިދު މުޙައްމަދު - ހުޅުމާލެ ފޭސް 1
22. މަސްޖިދުލް އަޞްދިޤާ - ހުޅުމާލެ ފޭސް 1
23. މަސްޖިދު ޙަސަން އާދަމް - ހުޅުމާލެ ފޭސް 2
24. މަސްޖިދު އަމީލު ޖަލީލު - ހުޅުމާލެ ފޭސް 2

ރާއްޖޭގެ އެންމެ ބޮޑު ދެ މިސްކިތުގައި ރަމަޟާން މަހު ޒުވާން އިމާމުންނަށް ފުރުސަތު ދެއްވާފައިމިވަނީ ރައީސުލްޖުމްހޫރިއްޔާ  ޑރ. މުޙައްމަދު މުޢިއްޒުގެ އިރުޝާދުގެ ދަށުން އިސްލާމީ ލީޑަރުން އުފެއްދެވުމަށް އިސްލާމީ ކަންތައްތަކާ ބެހޭ ވުޒާރާއިން ކުރިއަށް ގެންދާ މަސައްކަތްތަކުގެ ދަށުންނެވެ.