ބާޒާރުގައި އަގުހެޔޮކޮށް ތަކެތި ލިބޭ ފިހާރަތައް އެނގޭނެ "އަގުމަގު ޕޯޓަލް" ލޯންޗުކޮށްފި

ރަމަޟާން މަހު ބާޒާރުގައި އަގުހެޔޮކޮށް ތަކެތި ލިބޭނެ ފިހާރަތައް ބަލާލެވޭނެ "އަގުމަގު ޕޯޓަލް" ލޯންޗުކޮށްފިއެވެ. މި ޕޯޓަލް ލޯންޗުކޮށްދެއްވީ އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު އެވެ.

އިޤްތިޞާދީ ތަރައްޤީއާއި ވިޔަފާރިއާ ބެހޭ ވުޒާރާއިން ވިދާޅުވީ، މި ޕޯޓަލް ގެ އެންމެ ބޮޑު އެއް ބޭނުމަކީ ރައްޔިތުންނަށް ބޭނުންވާ އަސާސީ ކާބޯތަކެތި އަގޮހެޔޮކޮށް ފޯރުކޮށްދިނުން ކަމަށެވެ. މި ޕޯޓަލް މެދުވެރިކޮށް އަސާސީ ކާބޯތަކެތީގެ އަގު އެއްތަނަކުން ބަލާލެވޭނެ އެވެ. އެ ވުޒާރާއިން ވިދާޅުވީ، މި ޕޯޓަލުން ތަކެތީގެ އަގުތައް ފެންނަން ހުންނާނީ އެ ވުޒާރާގެ އިންސްޕެކްޝަން ޓީމްތަކުން ކޮންމެ ހަފްތާއަކު ފިހާރަތަކަށާއި ބާޒާރުތަކަށްގޮސް އެއްކުރާ މައުލޫމާތުގެ މައްޗަށް ކަމަށެވެ.

އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވީ، މި ޕޯޓަލްގެ ބޭނުމަކީ ރައްޔިތުންނަށް ލުއިފަސޭހަކަމާއި އެކު ގޭތެރޭގައި ކެއިންބުއިމަށް ބޭނުންކުރާ ކާބޯތަކެތި ލިބޭނެމަގު ފަހިކޮށްދިނުން ކަމަށެވެ. އަދި އަސާސީ ކާބޯތަކެތި ކަމަށް ކަނޑައަޅުއްވާފައި ވަނީ ބައިނަލްއަޤްވާމީ މިންގަނޑުތަކުންވެސް ކަނޑައަޅާ ބާވަތްތައްކަމަށް ވަޒީރު ވިދާޅުވިއެވެ. މީގެ އިތުރުން ވަޒީރު ވިދާޅުވީ، މި ޕޯޓަލްގައި ވިޔަފާރިވެރިންނަށް އެމީހުން އަމިއްލައަށް ޕޯޓަލްގައި ތަކެތީގެ އަގު ޕޯސްޓްކުރުމުގެ ފުރުޞަތު ލިބޭނެ ކަމަށެވެ.

އިޤްތިޞާދީ ތަރައްޤީއާއި ވިޔަފާރިއާއި ބެހޭ ވުޒާރާއިން ވިދާޅުވީ، މި ވަގުތު މު ޕޯޓަލްގައި ހިމަނުއްވާފައިވަނީ މާލެ އަދި ހުޅުމާލޭގެ ފިހާރަތަކުން އަސާސީ ކާބޯތަކެތި ލިބެންހުރި އަގުތަށް ކަމަށެވެ. ނަމަވެސް، ކުރިއަށް އޮތް ތަނުގައި އަތޮޅުތަކުގެ ރަށްތަކުގެ އަގުތައްވެސް މި ޕޯޓަލްގައި ހިމަނާނެކަމަށް އެ ވުޒާރާއިން ވިދާޅުވެއެވެ.