ޚަބަރު
ކުޑަގިރި ފަޅުތެރޭގައި ޑައިވް ރެކް ސައިޓެއް ތަރައްޤީކުރުމަށް ތައްޔާރުވެއްޖެ

ކުޑަގިރި ފަޅުތެރޭގައި ޑައިވް ރެކް ސައިޓް ތަރައްޤީކުރުމަށް ދެ މަތިންދާބޯޓު ގެންދިޔުމުގެ ތެރެއިން
ހުލާސާ
ކ. ކުޑަގިރި ފަޅު ތެރޭގައި ޑައިވް ރެކް ސައިޓެއް ތަރައްޤީކުރުމަށް ތައްޔާރުވެއްޖެ އެވެ. މި މަސައްކަތް ފެށުމަށްޓަކައި އެ ސަރަޙައްދަށް ބޭނުންވާ މަތިންދާ ބޯޓު ވަނީ އެމްޓީސީސީގެ ބާޖެއްގައި ކުޑަގިރިއަށް ގެންގޮސްފަ އެވެ.
މި ޑައިވް ރެކް ސައިޓަކީ، އެމްއެމްޕީއާރުސީ، އެމްޓީސީސީ، އަދި އެޗްޑީސީ އިން ގުޅިގެން ކުރިއަށް ގެންދާ މަސައްކަތެކެވެ. އެހެންކަމުން، މި މަޝްރޫޢުގައި ކުޑަގިރި ފަޅަށް ފައްތަނީ ކުރިން އެއާ މޯލްޑިވްސްގައި ބޭނުންކުރި ޑޯނިއާ ދެ މަތިންދާބޯޓެވެ. މި މަތިންދާބޯޓު ފެއްތުމުގެ ކުރިން ކުރަންޖެހޭ ކަންކަން ކުރަމުންދާއިރު ދެ މަތިންދާބޯޓު އޮޔަށް، ރާޅަށް ގުޑާގުޑުން ކުޑަކުރުމަށްޓަކައި ބަރު ކުރުމަށް ތައްޔާރުކޮށްފައިވާ ފައި ތަނބުތައް ތައްޔާރުކޮށް، ހަރުކޮށް، ފެއްތުމަށް ވަނީ މިހާރު ތައްޔާރުކޮށްފަ އެވެ.
މި މަޝްރޫޢުގެ އީއައިއޭ ރިޕޯޓުގައި، މަތިންދާބޯޓު ގެންގުޅުމާއި، އެއްތަނުން އަނެއް ތަނަށް ގެންދިއުމުގެ ތެރޭގައި ސިއްހީ، ޖިސްމާނީ ހާނިކައިގެ ނުރައްކާ ކުރިމަތިވެދާނެކަން ވަނީ ފާހަގަކޮށްފަ އެވެ. މީގެ އިތުރުން، ޑައިވް ސައިޓް ތަރައްޤީކުރުމުގެ ތެރޭގައި ވެސް ކަނޑުމަތީގައި މަސައްކަތް ކުރާ މީހުންނަށް ޖިސްމާނީ އަދި ސިއްހީ ހާނިކައިގެ ނުރައްކާތަކެއްވާކަން އީއައިއޭ ރިޕޯޓުގައި ވަނީ ފާހަގަކޮށްފައެވެ. އެހެންކަމުން، މި މަސައްކަތުގައި ބައިވެރިވާ މީހުންނަށް ސިއްހީ އަދި ޖިސްމާނީ ގޮތުން ކުރިމަތިވެދާނެ ގެއްލުމުގެ ނުރައްކާ ކުޑަކުރުމަށް ޒިންމާދާރު ފަރާތުން ބައިވެރީންނަށް ރައްކާތެރިކަމާއެކު މަސައްކަތް ކުރުމުގެ އުސޫލުތައް ކިޔައިދީ ތަމްރީނުކުރަންޖެހޭ ކަމަށް ރިޕޯޓްގައިވެއެވެ.
މި ޑައިވް ރެކް ސައިޓު ތަރައްޤީކުރުމުގެ ސަބަބުން، ކުޑަގިރިއަށް ޒިޔާރަތްކުރާ ރާއްޖޭގެ ރައްޔިތުންނަށާއި ފަތުރުވެރިންނަށް މުނިފޫހިފިލުވުމުގެ އިތުރު ފުރުސަތުތަކެއް ލިބިގެން ދާނެއެވެ. ހަމަ އެހެންމެ، މި މަޝްރޫޢުގެ ސަބަބުން ރާއްޖޭގެ ފަތުރުވެރިކަން އިޝްތިހާރުކުރުމަށް އިތުރު ކުރިއެރުމެއް ލިބިގެންދާނެ އެވެ.