މާލޭގެ މަގުތަކުން ފެން ހިންދުމަށް ސިފައިން ނުކުމެއްޖެ

ބޯކޮށް ވާރޭ ވެހުމާ ގުޅިގެން މާލޭގެ ބައެއް މަގުތަކުގައި ފެންބޮޑުވެފައިވާތީ، ފެން ހިންދުމުގެ މަސައްކަތުގައި އެމްއެންޑީއެފްގެ ފަޔަރ އެންޑް ރެސްކިޔު ސަރވިސްއިން  ހަރަކާތްތެރިވާން ފަށައިފިއެވެ.

އެމްއެންޑީއެފުން މަޢުލޫމާތު ދެއްވިގޮތުގައި ސިފައިން މިވަގުތު ފެން ހިންދުމުގެ މަސައްކަތުގައި ހަރަކާތްތެރިވަމުން ދަނީ މާލޭގެ ތިން ސަރަހައްދެއްގައެވެ. އެއީ އައިޖީއެމްއެޗް، ވެސްޓްޕާކް އަދި މާފަންނު ފެރީ ޓާމިނަލް ސަރަހައްދެވެ. މީގެ އިތުރުން، ވެލިބަސްތާ ޖެހުމާއި އެހެނިހެން އެހީތެރިކަން ފޯރުކޮށްދިނުމުގައި މާލެ އޭރިއާ ކޮމާންޑްގެ ސިފައިން ވެސް ހަރަކާތްތެރިވަމުންދާ ކަމަށް އެމްއެންޑީއެފުން ވިދާޅުވިއެވެ.

ބޯކޮށް ވާރޭ ވެހި މާލޭގެ ބައެއް މަގުތަކުގައި ފެންބޮޑުވުމާ ގުޅިގެން، ފެންހިންދުމުގައާއި، ވެލި ބަސްތާ ޖެހުމުގައި އެހީތެރިކަން ފޯރުކޮށްދިނުމަށް ސިފައިން ދަނީ ހަރަކާތްތެރިވަމުން. pic.twitter.com/4QnSyGNfDE

— Maldives National Defence Force (@MNDF_Official) March 1, 2025

މޫސުމާ ބެހޭ ޤައުމީ އިދާރާއިން ވިދާޅުވެފައިވަނީ ކުރިއަށް އޮތް 24 ގަޑިއިރު ތެރޭގައި ރާއްޖޭގެ އެކި ހިސާބުތަކަށް ވިއްސާރަވެ، ގުގުރާނެ ކަމަށެވެ. އަދި ބައެއް ރަށްތަކަށް ބޯކޮށް ވާރޭވެހުން އެކަށީގެންވާ ކަމަށް އެ އިދާރާއިން ވަނީ އިންޒާރު ދެއްވާފައެވެ.  ވައި ޖެހޭނީ ހުޅަނގު އުތުރާއި އުތުރުން ގަޑިއަކު 10 މޭލާއި 20 މޭލާ ދެމެދުގެ ބާރުމިނުގައި ކަމަށާއި، ވިއްސާރަ ވިލާގަނޑުގައި ގާތްގަނޑަކަށް 40 މޭލަށް ވައި ގަދަވުން އެކަށީގެންވާ ކަމަށްވެސް އެ އިދާރާއިން ވަނީ ވިދާޅުވެފައެވެ.

މޫސުމާ ބެހޭ އިދާރާއިން އިތުރަށް ވިދާޅުވެފައިވަނީ ކަނޑުތައް އާދައިގެ ވަރަކަށް ގަދަވެފައި، ވިލާގަނޑުގައި ގަދަވާނެ ކަމަށެވެ. އަދި ރާއްޖެއަށް މިހާރު ކުރަމުންދާ ވިއްސާރަ ހޯމަ ދުވަހު އަލިވާނެ ކަމަށްވެސް އެ އިދާރާއިން ވަނީ ލަފާކުރައްވާފައެވެ.

މި ހާލަތާ ގުޅިގެން، ރައްޔިތުންނަށް ދަތުރުފަތުރު ކުރުމުގައި ފަރުވާތެރިވުމަށާއި، ކުއްލި ހާލަތެއްގައި އެހީތެރިކަމަށް އެދޭނަމަ 911 ނަންބަރަށް ގުޅުމަށް ކަމާބެހޭ އިދާރާތަކުން އިލްތިމާސްކުރައްވައެވެ.