ގޭގެއަށް ފެންވަންނާތީ ބަރު އުޅަނދު ނުދުއްވަން ފުލުހުން އިލްތިމާސްކޮށްފި

ރާއްޖެއަށް ކުރަމުން އަންނަ ވިއްސާރައިގެ  ސަބަބުން މަގުތަކުގައި ފެންބޮޑުވެ، ބައެއް ގޭގެއަށް އަދި ފިހާރަތަކަށް ފެން ވަންނަމުންދާތީ، ބަރު އުޅަނދުތައް މާލޭގެ މަގުތަކުގައި ނުދުއްވުމަށް މޯލްޑިވްސް ޕޮލިސް ސަރވިސްއިން ވަނީ އިލްތިމާސްކޮށްފައެވެ.

ފުލުހުން  ބުނެފައިވަނީ، މިފަދަ ހާލަތެއްގައި ބަރު އުޅަނދުތައް ދުއްވުމުން މަގުތަކުގައި ހުރި ފެން އެކި ގޭގެއާއި ފިހާރަތަކަށް ވަދެ ގެއްލުންވުން އެކަށީގެންވާކަމަށެވެ. އަދި ހަމައެއާއެކު، ހަތަރު ފުރޮޅުލީ އުޅަނދުތައްވެސް ޒަރޫރީ ބޭނުންތަކުގައި މެނުވީ ނުދުއްވުމަށް ފުލުހުން ވަނީ އެދިފައެވެ.

މިފަދަ ހާލަތްތަކުގައި ރައްޔިތުންގެ ފަރާތުން ލިބެމުންދާ އެއްބާރުލުމާއި އެހީތެރިކަމަށް  އިޚްލާސްތެރިކަމާއެކު ޝުކުރު އަދާކުރާކަމަށް ފުލުހުން ސޯޝަލް މީޑިއާގައި ކޮށްފައިވާ ޕޯސްޓުގައި ވަނީ ބުނެފައެވެ.

މޫސުމާބެހޭ އިދާރާއިން ދީފައިވާ މަޢުލޫމާތުގެ މައްޗަށް ބިނާކޮށް، މިރޭ ކުރިއަށް އޮތް ގަޑިތަކުގައިވެސް ދެމިގެންދާނެ ކަމަށް ލަފާކުރެވޭތީ، ރައްޔިތުންނަށް ވީހާވެސް ބޮޑަށް ރައްކާތެރިވުމަށް ފުލުހުން އިރުޝާދު ދީފައިވެއެވެ. އަދި ކުއްލި ހާލަތެއްގައި އެހީތެރިކަން ބޭނުންވެއްޖެނަމަ 119 އަށް ގުޅުމަށް ވަނީ އަންގާފައެވެ.

ފުލުހުން މިހާރުވެސް ގެންދަނީ މާލޭގައި ފެންބޮޑުވެފައިވާ ސަރަޚައްދުތަކުން ފެން ހިންދުމުގެ މަސައްކަތް ކުރަމުންނެވެ. މީގެއިތުރުން  ފެންބޮޑުވުމުގެ ސަބަބުން ފެން ވަންނަމުންދާ ތަންތަނުގައި ވެލިބަސްތާ ޖެހުމުގެ މަސައްކަތްވެސް އަންނަނީ ކުރަމުންނެވެ.