ލީޑު ފުޅާކުރިޔަނުދީ ނަޕޯލީއިން އިންޓަ މިލާން ހިފަހައްޓައިފި

އިޓާލިއަން ސިރީ އޭގެ އެއްވަނައިގައި އޮތް އިންޓަ މިލާން އާއި ދެވަނަގައި އޮތް ނަޕޯލީ ބައްދަލުކުރި މެޗު 1-1 އިން އެއްވަރުވެ، ލީޑު ފުޅާ ކުރުމަށް އިންޓަ މިލާނަށް ލިބުނު ފުރުސަތު ގެއްލިއްޖެއެވެ.

ނަޕޯލީގެ ޑިއެގޯ އަރުމަންޑާ މެރެޑޯނާ ސްޓޭޑިއަމްގައި އިންޓަ މިލާނާއި ދެކޮޅަށް ކުޅުނު މެޗުގައި އިންޓަ މިލާނުން ލީޑު ނެގީ މެޗުގެ 22 ވަނަ މިނެޓުގައި ފެޑެރިކޯ ޑިމާކޯގެ ރީތި ހިލޭޖެހުމަކުންނެވެ. ޕެނަލްޓީ އޭރިއާގެ ބޭރުން ސެމީ-ސަރކަލް ކައިރިން ލިބުނު މި ހިލޭ ޖެހުން ޑިމާކޯ ފޮނުވާލީ ގޯލުގެ މަތީ ކަނަކަށެވެ.

މެޗުގެ ފުރަތަމަ ހާފުގައި އިންޓަ މިލާނުން ލީޑު ނަގާފައިވަނިކޮށް، ނަޕޯލީއަށް މެޗުގެ ނަތީޖާ ހަމަހަމަކޮށްދިނީ ބަދަލު ކުޅުންތެރިއެއްގެ ގޮތުގައި ނިކުތް ފިލިޕް ބިލިންއެވެ. 

ނަޕޯލީއަށް ބިލިން މެޗުގެ ނަތީޖާ ހަމަހަމަކޮށްދިނީ، މެޗު ނިމެން ތިން މިނެޓަށް ވެފައިވަނިކޮށެވެ. އަދި މި ގޯލާއެކު ލީގުގެ އެންމެ ފަހުގެ ޗެމްޕިއަނުންނަށް، ލީގު ތަށި ދިފާއުކުރުމާ ގާތަށް އަޅަން އުޅުނު ފިޔަވަޅަށް ނަޕޯލީއިން މިވަނީ ހުރަސްއަޅާފައެވެ.

މެޗަށްފަހު ވާހަކަ ދައްކަމުން ބިލިން ބުނީ، އެ ގޯލަކީ އޭނާ އުއްމީދުކުރި ގޯލެއް ނޫންކަމަށާއި، ނަމަވެސް އެއީ ދެކުނު ހުވަފެނެއް ކަމަށެވެ. މިއީ ބޯނެމައުތުން ލޯނު އެއްބަސްވުމެއްގެ ދަށުން ނަޕޯލީއަށް ބަދަލުވުމަށްފަހު އޭނާ ކުޅުނު ދެވަނަ މެޗެވެ.

ނަޕޯލީއަށް ފެބުރުވަރީ މަހަކީ ވަރަށް ދެރަކޮށް ދިޔަ މަހެކެވެ. އެ މަހުގައި ލީގު އެއްވެސް މެޗަކުން އެ ޓީމު މޮޅުވެފައިނުވާއިރު، ކޮމޯއާ ދެކޮޅަށް ކުޅުނު މެޗުން ވަނީ މިދިޔަ ހަފްތާގައި ބަލިވެފައެވެ. 

އަނެއްކޮޅުން ފެބުރުވަރީ މަހު އިންޓަ މިލާން ވެސް ދެ މެޗުން ބަލިވެފައިވެއެވެ. އެއީ ފިއޮރެންޓީނާ އާއި ޔުވެންޓަސް އާ ދެކޮޅަށް ކުޅުނު މެޗުންނެވެ.