ރަމަޟާންމަހު އެމްޓީސީސީގެ ފެރީ އަދި ބަހުގެ ޚިދުމަތްދޭ ގަޑިތަށް ބަދަލުކޮށްފި

މިރަމަޟާންމަހު އެމްޓީސީސީގެ ފެރީ އަދި ބަހުގެ ޚިދުމަތް ދޭ ގަޑިތަކަށް ބަދަލު ގެނެސްފައިވާ ކަމަށް އެ ކުންފުނިން މިއަދު ހާމަކޮށްފިއެވެ.

އެމްޓީސީސީން މަޢުލޫމާތު ދެއްވިގޮތުގައި، ގްރޭޓަރ މާލޭ ސަރަޙައްދުގައި، މާލެއިން ހުޅުމާލެ ފިޔަވަހި 1 އަދި 2 އަށް ދަތުރުކުރާ ބަސްތަކުގެ ޚިދުމަތް ފެށުމަށް ހަމަޖެހިފައިވަނީ ހެނދުނު 7:00 ގައެވެ. ރޯދަ ވީއްލާ ގަޑިއަށް ދަތުރުތައް މެދުކަނޑާލުމަށްފަހު، ދެން ދަތުރުތައް ފަށާނީ ރޭގަނޑު 7:20 ގައި ކަމަށާއި، މި ދަތުރުތައް ރޭގަނޑު 12:00 އާ ހަމައަށް ކުރިއަށްގެންދާނެ ކަމަށް އެ ކުންފުނިން ބުނެފައިވެއެވެ.

މާލޭތެރޭގައި ފޯރުކޮށްދޭ ބަހުގެ ޚިދުމަތަށް ބަލާއިރު، އޯކިޑް، އަމީނީ އަދި ސޯސަން ރޫޓުގެ ދަތުރުތައް ފަށާނީ ހެނދުނު 7:00 ގައެވެ. އިރުއޮއްސި 6:00 އަށް ދަތުރުތައް މެދުކަނޑާލުމަށްފަހު، ދެން ދަތުރުތައް ފަށާނީ ރޭގަނޑު 9:00 ގައި ކަމަށާއި، މި ރޫޓުތަކުގެ ދަތުރުތައްވެސް ރޭގަނޑު 12:00 އާ ހަމައަށް ކުރިއަށްދާނެ ކަމަށް އެމްޓީސީސީން ހާމަކޮށްފައިވެއެވެ.

ފެރީގެ ޚިދުމަތަށް ގެނެސްފައިވާ ބަދަލުތަކާ ގުޅޭގޮތުން އެމްޓީސީސީން ބުނެފައިވަނީ، 20 އަތޮޅު 6 ޒޯނަކަށް ބަހާލައިގެން 68 ރޫޓުން ދަތުރުތައް ކުރަމުންދާ ކަމަށެވެ. އަދި ފެރީގެ ޚިދުމަތަކީ ރައްޔިތުންގެ ޒަރޫރީ ބޭނުންތަކަށާއި މުދާ އުފުލުމަށް ބޭނުންކުރާ ޚިދުމަތަކަށް ވާތީ، މި ރަމަޟާންމަހު ދަތުރުތައް ރާވާފައިވަނީ ވީހާވެސް ބޮޑަށް ރައްޔިތުންނަށް ލުއިފަސޭހަ ވާނޭގޮތަށް ކަމަށް އެ ކުންފުނިން ފާހަގަކޮށްފައިވެއެވެ.

އާރްޓީއެލް ފެރީ ދަތުރުތަކަށް ގެނެސްފައިވާ މައިގަނޑު ބަދަލުތަކުގެ ތެރޭގައި، ކޮންމެ ރޫޓެއްގެވެސް އެންމެ ފަހު ދަތުރު އިރުއޮއްސުމުގެ ކުރިއަށް ނިމޭގޮތަށް ތާވަލުކުރެވިފައިވާނެ ކަމަށާއި، ރަމަޟާން މަހުގެ ހުކުރު ދުވަހު އާރްޓީއެލް ފެރީ ދަތުރުތައް ނުކުރާނެ ކަމަށްވެސް އެމްޓީސީސީން ހާމަކޮށްފައިވެއެވެ.

އެމްޓީސީސީގެ އަމާޒަކީ ރައްޔިތުންނަށް އިތުބާރު ހިފޭ، ލުއިފަސޭހަ އާންމު ދަތުރުފަތުރުގެ ޚިދުމަތެއް ފޯރުކޮށްދޭ ކުންފުންޏެއްގެ ގޮތުގައި އަބަދުވެސް ދެމިއޮތުން ކަމަށް އެ ކުންފުނިން ބުނެފައިވެއެވެ.