ކުޅިވަރު
އަލްވަރޭޒްގެ ގޯލާއެކު އެތުލެޓިކޯ މެޑްރިޑު ސްޕެނިޝް ލީގުގެ އެއްވަނައަށް އަރައިފި

މެޗުގައި ލީޑު ނެގުމަށްފަހު އަލްވަރޭޒް އުފާފާޅުކުރަނީ، ފޮޓޯ: ގެޓީ އިމޭޖަސް
ސްޕެނިޝް ލަ ލީގާގައި ހޫލިއަން އަލްވަރޭޒްގެ ގޯލަކުން އެތުލެޓިކޯ މެޑްރިޑުން އެތުލެޓިކް ކްލަބް ބަލިކުރުމަށްފަހު، ލީގުގެ އެއްވަނައަށް އަރައިފިއެވެ.
އެތުލެޓިކޯއިން މި މެޗަށް ނިކުތީ، ތިން ޕޮއިންޓާއެކު އެ ޓީމަށް ލީގުގެ އެއްވަނައަށް އެރޭނެކަން އެނގިތިބެ، އެކަން ހާސިލުކުރުމަށެވެ. ސަބަބަކީ ރޭ އިރާކޮޅު ރެއާލް ބެޓިސްއާ ބައްދަލުކުރިމެޗުން ރެއާލް މެޑްރިޑް 2-1 އިން ބަލިވެފައިވުމެވެ.
އެހެންކަމުން އެތުލެޓިކޯއަށް މިވަނީ ލީގުގެ އެއްވަނައިގައި ދެ ޕޮއިންޓުގެ ލީޑެއް ލިބިފައެވެ. ނަމަވެސް މިރޭ ބާސެލޯނާއާއި ރެއާލް ސޮސިއެދާދު ބައްދަލުކުރާ މެޗުން ބާސެލޯނާ މޮޅުވެއްޖެނަމަ، އެއް ޕޮއިންޓުގެ ލީޑަކާއެކު އެ ޓީމުން ލީގުގެ އެއްވަނައަށް ކުރިޔަށް ޖެހިލާނެއެވެ.
އެތުލެޓިކޯ މެޑްރިޑުގެ މެޓްރޮޕޮލިޓާނޯ ސްޓޭޑިއަމްގައި ރޭ ކުޅުނު މެޗުގައި އެ ޓީމަށް އަލްވަރޭޒް ލީޑު ނަގައިދިނީ މެޗުގެ 66ވަނަ މިނެޓުގައެވެ. އިދިކޮޅު ޓީމުގެ ޑިފެންސް ރޫޅާލައި މާކޮސް ލޮރެންޓޭ، އަލްވަރޭޒްއަށް ކުޅުނު ބޯޅަ އޭނާ ގޯލަށް ފޮނުވާލީ ހަމަޖެހިލާފައެވެ. މިއީ އަލްވަރޭޒް މި ސީޒަނުގައި ކާމިޔާބުކުރި 10ވަނަ ގޯލެވެ.
މި ގޯލަށްފަހު އެތުލެޓިކުން ވަނީ ގޯލު ޖެހުމަށް ރަނގަޅު ފުރުސަތެއް ތަނަވަސްކޮށްފައެވެ. އެގޮތުން އެ ޓީމުގެ ބެރެޓް ޕްރެޑޯސް ބޮލުން ފޮނުވާލި ބޯޅަ ހުރަސް ދަނޑީގައި ޖެހުނުއިރު، އެ ބޯޅައިގެ ރީބައުންޑް އިނާކީ ވިލިއަމްސްއަށް ވަނީ ގޯލަށް އަމާޒުނުކުރެވިފައެވެ.