ކޮލަމް
ރޯދަވީއްލުމަށްފަހު މާބޮޑަށް ލޮޑު ވަނީތަ؟ މިއީ ވަރުބަލިކަމާއި ނުތަނަވަސްކަން ދުރުކުރާނެ ގޮތް

މިއީ ވަރުބަލިކަމާއި ނުތަނަވަސްކަން ދުރުކުރާނެ ގޮތް ފޮޓޯ:އިންޓަނެޓް
ރަމަޟާން މަހު ރޯދަހިފުމަކީ ރޫޙާނީ ގޮތުން ފުރިހަމަކަން ލިބޭ ތަޖުރިބާއެކެވެ. ނަމަވެސް ގިނަ މީހުންނަށް ރޯދަވީއްލުމަށްފަހު ދިމާވާ ވަރުބަލިކަމާއި މާބޮޑަށް ބަނޑަށް އުނދަގޫވުމަކީ ދިމާވާ ދަތިކަމެކެވެ. ކާއެއްޗެއްސާއި ފެން ނުލިބި ގިނަ ވަގުތުތަކެއް ހޭދަކުރުމަށްފަހު، ގިނައިން ކެއުމަށް ޝައުޤުވެރިވެއެވެ. ނަމަވެސް މިކަމުގެ ސަބަބުން ހަކަތަ ލިބުމުގެ ބަދަލުގައި ވަރުބަލިވެ ލޮޑުވެއެވެ. ހަކަތަ ދެމެހެއްޓުމާއި ނުތަނަވަސްކަން ދުރުކުރުމުގެ މައިގަނޑު ސިއްރަކީ ރަނގަޅު ކާނާ ޚިޔާރުކުރުމާއި، ހަށިގަނޑަށް ފެން ފޯރުކޮށްދިނުމާއި، އަދި ކެއުން ރަނގަޅަށް ބެލެހެއްޓުމެވެ.
ދުރުހެލިވާންވީ ކަންތައްތައް
ރޯދަވީއްލުމަށްފަހު އިހުސާސްކުރެވޭ ވަރުބަލިކަމާއި ބަނޑުފުރުމުގެ މައިގަނޑު އެއް ސަބަބަކީ ގިނައިން ކެއުމެވެ. ގިނަ ވަގުތު ރޯދައަށް ހުރުމަށްފަހު ގިނައިން ކާނާ ކެއުމުން ހަޖަމުކުރާ ނިޒާމަށް ބުރަބޮޑުވެ، ނުތަނަވަސްކަމާއި ވަރުބަލިކަން އިހުސާސްކުރެވެއެވެ. މީގެ ބަދަލުގައި ކަދުރާއި ފެންފަދަ ލުއި އެއްޗެހިން ފަށައި، ދެން މެދުމިނުގެ ކެއުމަކަށް ބަދަލުކޮށްލާށެވެ.
ތެލުގައި ތެއްލި ކާނާއަކީވެސް މިފަދަ މައްސަލަތަކަށް މަގުފަހިވާ އެއްޗެކެވެ. މިފަދަ ތަކެތި ރޯދަވީއްލުމުގައި މަޤްބޫލުވި ނަމަވެސް، މީގެ ސަބަބުން ހަޖަމު ނުވެ ވަރުބަލިކަން އިތުރުވެއެވެ. މީގެ ބަދަލުގައި ގްރިލްކޮށްފައި ނުވަތަ އަވަން ބޭނުންކޮށްގެން ފިހެފައި ހުންނަ ކާނާ ޚިޔާރުކުރަންވާނެއެވެ. ހަމައެހެންމެ، ގޭސް އެކުލެވޭ ބުއިންތަކާއި ހަކުރު ގިނަ ޖޫސްތަކުގެ ސަބަބުން ބަނޑުފުރުމާއި ހަކަތަ ކުއްލިއަކަށް ދަށްވުންފަދަ ކަންކަން ދިމާވެއެވެ. އެހެންކަމުން އެންމެ ރަނގަޅީ ފެން ނުވަތަ މޭވާ އެކުލެވޭ ޠަބީޢީ ބުއިންތަކެވެ.
އާންމުކޮށް ކުރެވޭ އަނެއް ކުށަކީ ގިނައިން ކެފީން ބޭނުންކުރުމެވެ. ކޮފީއާއި ސައިފަދަ ތަކެތިން ހަކަތަ އިތުރުވާނެ ކަމަށް ހީވި ނަމަވެސް، މިފަދަ ތަކެތިން ހަށިގަނޑުން ފެން މަދުވެ، ނިދުމަށް ދަތިވެ، ޖެހިގެން އަންނަ ދުވަހު އިތުރަށް ވަރުބަލިވެއެވެ. އަވަސް އަވަހަށް ކެއުމަކީވެސް މައްސަލައެކެވެ. މިކަމުގެ ސަބަބުން ގިނައިން ކެވި، ހަޖަމުކުރުމަށް ދަތިވެއެވެ. ވަގުތު ނަގައިގެން ރަނގަޅަށް ކާނާ ހިޔާރުކޮށްގެން ކެއުމުން މިފަދަ މައްސަލަތައް ދުރުކުރެވޭނެއެވެ.
ހަކަތަ ދެމެހެއްޓުމުގެ ގޮތްތައް
ވަރުބަލިކަން ދުރުކުރުމަށް ފެން ބުއިމަކީ ވަރަށް މުހިންމު ކަމެކެވެ. ރޯދަވީއްލުމާއި ސުހޫރު ވަގުތާ ދެމެދު ގިނައިން ފެން ބުއިމުން ހަށިގަނޑުން ފެން މަދުވުން ހުއްޓުވޭނެއެވެ. ހަށިގަނޑުން ފެން މަދުވުމަކީ ވަރުބަލިކަން އިހުސާސްކުރެވުމުގެ މައިގަނޑު އެއް ސަބަބެވެ. އެއްފަހަރާ ގިނަ އަދަދަކަށް ފެން ބުއުމުގެ ބަދަލުގައި ރޭގަނޑުގެ ވަގުތުތަކުގައި މަޑުމަޑުން ފެން ބޯން މަސައްކަތްކުރަންވާނެއެވެ.
ހަކަތަ ދެމެހެއްޓުމަށް މެދުމިނުގެ ރޯދަވީއްލުމެއް ހިޔާރުކުރުމަކީ މުހިންމު ކަމެކެވެ. ބުރައުން ރައިސް ނުވަތަ ހޯލްވީޓް ބްރެޑްފަދަ ކޮމްޕްލެކްސް ކާބޯހައިޑްރޭޓްސްއާއި، ކުކުޅު، މަސް ނުވަތަ ބަރަބޯ ފަދަ ޕްރޮޓީން އަދި ފައިބަރ އެކުލެވޭ ކާނާއާއި، އަވަކާޑޯ އަދި ފަތްކެޔޮފަދަ ފައިދާހުރި ތަކެތި ހިމަނަންވާނެއެވެ. މިފަދަ ކާނާ ކެއުމުން ގިނަ ވަގުތުތަކަށް ހަކަތަ ލިބި، ގިނަ ވަގުތު ބަނޑުފުރިފައި ހުރެވޭނެއެވެ.
ރޯދަވީއްލުމަށްފަހު ހިނގާލުން ފަދަ ލުއި ޙަރަކާތެއް ކުރުމުން ހަޖަމުކުރުމަށް ފަސޭހަވެ، ބަނޑުފުރުން ކުޑަކުރެވޭނެއެވެ. ކެއުމަށްފަހު ވަގުތުން އަރާމުކުރަން ބޭނުންވި ނަމަވެސް، ކުޑަ ޙަރަކާތެއް ކުރުމުން އިހުސާސްކުރެވޭ ގޮތަށް ބޮޑު ބަދަލެއް އަންނާނެއެވެ.
ހާރުކާ ވަގުތަށް ޚިޔާރުކުރަންވާނީ ދުވަހުގެ ތެރޭގައި މަޑުމަޑުން ހަކަތަ ދޫކުރާ ކާނާއެވެ. އޯޓްސް، ބިސް، ޔޯގަޓް އަދި ހޯލްގްރެއިންފަދަ ތަކެއްޗަކީ ވަރަށް ރަނގަޅު ކާނާއެވެ. ލޮނުގަދަ ކާނާއިން ދުރުހެލިވާންވާނެއެވެ. އެއީ ރޯދައަށް ހުންނައިރު މާބޮޑަށް ފެންބޯން ބޭނުންވާނެތީއެވެ.
އެންމެ ފަހުކަމެއްގެ ގޮތުގައި، ފުދޭވަރަކަށް ނިދުމަކީ ވަރަށް މުހިންމު ކަމެކެވެ. އާދަވެގެން ނިދާ ވަގުތު ހިފަހައްޓައި، ހަމަނިދި ލިބޭތޯ މަސައްކަތްކުރަންވާނެއެވެ. އެއީ ނިދި މަދުވުމުން ރޯދަހިފުން އުނދަގޫވާނެތީއެވެ.
ރޯދަވީއްލުމާއި ހާރުކާ ވަގުތު ވިސްނުންތެރިކަމާއެކު ކާނާ ޚިޔާރު ކުރުމުން ބަނޑުފުރުމާއި، ވަރުބަލިކަން ދުރުކޮށް، ރަމަޟާން މަހުގެ ތެރޭގައި ހަކަތަ ދެމެހެއްޓިދާނެއެވެ. ހަށިގަނޑަށް ފެން ފޯރުކޮށްދިނުމާއި، މެދުމިނުގެ ކެއުމާއި، އަދި ރަނގަޅަށް ނިދުމަށް އަހައްމިއްޔަތުކަން ދިނުމުން ފަސޭހަކަމާއެކު ރޯދަހިފޭނެއެވެ. އިންސާނާގެ ހަށިގަނޑު ދުޅަހެޔޮކޮށް ހުރުމުން އަޅުކަން ކުރުމަށް ދެވޭ ވަގުތުގެ ބޭނުން މާފުރިހަމަވާނެއެވެ.