ރަމަޟާން މަހުގެ ފުރަތަމަ އިޙްޔާ ފޯރަމް މިރޭ: ތަޤުރީރު ކުރައްވާނީ ވަޒީރު ޑރ. ޝަހީމް

1446 ވަނަ އަހަރުގެ ރަމަޟާން މަހުގެ ރޭތައް އިޙްޔާ ކުރުމަށް ބާއްވާ އިޙްޔާ ފޯރަމް ސިލްސިލާގެ  ފުރަތަމަ ފޯރަމް މިރޭ ބޭއްވުމަށް ހަމަޖެހިފައިވާ ކަމަށް އިސްލާމީ ކަންތައްތަކާ ބެހޭ ވުޒާރައިން ވިދާޅެވެއްޖެ އެވެ.  
 
އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، އިޙްޔާ ފޯރަމް ސިލްސިލާގެ ފުރަތަމަ ފޯރަމް އޮންނާނީ މިރޭ އިސްލާމީ މަރުކަޒުގެ ޖަލްސާ ކުރާ މާލަމުގައި ކަމަށެވެ. 
 
މިރޭގެ ފޯރަމްގައި ތަޤުރީރު ކުރައްވާނީ އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު އެވެ. އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، އިޙްޔާ ފޯރަމް ފެށުމަށް ހަމަޖެހިފައިވަނީ މިރޭ 21:30 ގައި ކަމަށެވެ. އަދި މިރޭގެ ފޯރަމްގައި ވަޒީރު ތަޤުރީރު  ކުރައްވާނީ "ހެޔޮ ގޮތުގައި މުދާ ހޯދުމާއި ބޭނުން ކުރުން" މި މަޢުޟޫގެ މައްޗަށް ކަމަށް އެ ވުޒާރާއިން މަޢުލޫމާތުދެއެވެ.  
 
މިއަހަރުގެ ރަމަޟާން މަހު މާލޭގައި 8 އިޙްޔާ ފޯރަމް ބޭއްވުމަށް ވަނީ ހަމަޖެހިފަ އެވެ. މީގެ އިތުރުން، އަތޮޅުތެރޭގެ 7 ރަށެއްގައި އިޙްޔާ ފޯރަމް ކުރިއަށް ގެންދިޔުމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ނިންމަވާފަ އެވެ. މީގެ އިތުރުން 6 ސްކޫލަކާއި އެކު ދަރިވަރުންގެ އިޙްޔާ ފޯރަމެއް ވެސް މި ރަމަޟާން މަހު އޮންނާނެ ކަމަށް އެ ވުޒާރާއިން ވިދާޅުވެއެވެ.  
 
ފާއިތުވި އަހަރުތަކެކޭ އެއްގޮތަށް މިއަހަރު ވެސް  އިޙްޔާ ފޯރަމްއަށް ވަޑައިގަންނަވާ ބޭފުޅުންގެ ތެރެއިން ގުރުއަތުން ހޮވޭ ބޭފުޅުންނަށް ހާއްސަ އިނާމުތަކެއް ދިނުމަށް ވަނީ ހަމަޖެހިފައެވެވެ.