ނިމިދިޔަ ހަފްތާގައި 302 ދޯންޏަކުން ކިރުވި މަހަށް ދޫކުރި ފައިސާގެ ޢަދަދު 26 މިލިއަނަށް!

ނިމިދިޔަ ހަފްތާގައި 302 މަސް ދޯންޏަކުން ކިރުވި މަހަށް ދޫކުރި ފައިސާގެ އަދަދު 26 މިލިއަނަށް އަރާކަމަށް ސަރުކާރުގެ މަސް ކުންފުނި، މިފްކޯގެ ތަފާސްހިސާބުތަކުން ދައްކައިިފ އެވެ.  
 
މިފްކޯގެ ތަފާސްހިސާބުތަކުން ދައްކާ ގޮތުގައި، މިދިޔަ ހަފްތާގައި އެ ކުންފުނިން ވަނީ 302 މަސް ދޯންޏެއްގެ މަސް ކިރުވާފަ އެވެ. އަދި އެ ދޯނިތަކަށް މިފްކޯ އިން ވަނީ 26،014،249 ރުފިޔާ ދޫކޮށްފަ އެވެ. 
 
އެ ކުންފުނީގެ ތަފާސްހިސާބުތަކުން ދައްކާ ގޮތުގައި، ނިމިދިޔަ ޖަނަވަރީ މަހު މިފްކޯ އިން ވަނީ މަސްވެރިން ކިރުވާފައިވާ މަހަށް ޖުމްލަ 117 މިލިއަން ރުފިޔާ ދޫކޮށްފައެވެ. މިއީ 2025 ވަނަ އަހަރުގެ ޑިސެމްބަރު މަހާއި އަޅާބަލާއިރު 122 އިންސައްތައިގެ އިތުރުވުމެކެވެ. މިދިޔަ އަހަރުގެ ޑިސެންބަރު މަހު މިފްކޯއިން ވަނީ މަސްވެރިންނަށް 52 މިލިއަން ރުފިޔާ ދޫކޮށްފައެވެ.  
 
ރައީސުލްޖޖުމްހޫރިއްޔާ ޑރ. މުޙައްމަދު މުޢިއްޒު ވަނީ، މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާ ދޫކުރަމުން ގެންދަވާނެ ކަމަށް ވަޢުދުވެވަޑައިގެންފަ އެވެ. އަދި މި ވަޢުދު މިދިޔަ އަހަރުގެ މަސްވެރިންގެ ދުވަހުން ފެށިގެން ތަންފީީޒުކުރަން ފަށާފައިވާއިރު، މިކަމާއި ގުޅިގެން މަސްވެރިކަމަށް ނިކުންނަ ދޯނިތަކުގެ އަދަދު އިތުރުވެފައިވާކަމަށް މިފްކޯ އިން މަޢޫލޫމާތު ދެއްވައެވެ. މީގެ އިތުރުން މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަހުމަދު ޝިޔާމް ވިދާޅުވީ، މަސްވެރިންނަށް ޤަވާއިފދުން ފައިސާ ދޭން ފެށުމުގެ ސަބަބުން ދޯނިތަކުން ފޭބި ޒުވާން މަސްވެރިން އަނބުރާ ދޯނިތަކަށް އަންނަން ފަށާފައިވާ ކަމަށެވެ.  
 
ދިވެހިރާއްޖޭގެ މަސްވެރިކަމުގެ ސިނާޢަތް ތަރައްޤީކޮށް ކުރިއެރުވުމަށްޓަކައި، ސަރުކާރުން ދަނީ މިފްކޯގެ ހިންގުމަށް ބަދަލުގެނެސް، މިފްކޯއަކީ ފައިދާވާ ދެމެހެއްޓެނިވި ވިޔަފާރިއަކަށް ބަދަލުކުރުމަށް މަސައްކަތް ކުރަމުންނެވެ.