''ސުވެނިއަރ 34'' ލޯންޗު ދިޔަވަމުންދާތީ އެމްއެންޑީއެފުން އެހީތެެރިކަން ފޯރުކޮށްދީފި

ތިލަފުއްޓާއި ދިމާ ބޭރުން ދަތުރުކުރަމުންދިޔަ "ސުވެނިއަރ 34" ނަމަކަށް ކިޔާ ލޯންޗެއް ފަޅައިގެންގޮސް ދިޔަވަމުންދާތީ ކޯސްޓްގާޑުން އެހީތެރިކަން ފޯރކޮށްދީފިއެވެ.  
 
މޯލްޑިވްސް ނެޝަނަލް ޑިފެންސް ފޯސް، އެމްއެންޑީއެފުން ވިދާޅުވީ، ލޯންޗު ފަޅައިގެން ގޮސް ދިޔަވަމުން ދާތީ، މާލެ އޭރިއާގެ ކޯސްޓްގާޑް ސެކަންޑް ސްކޮޑްރަންއިން އެ އުޅަދަށް އެހީތެރިކަން ފޯރުކޮށްދީފައިވާ ކަމަށެވެ. އަދި މި އުޅަނދުގައި، 38 މީހުން ތިބި ކަމަށާއި އޭގެ ތެރޭގައި ހިމެނެނީ 34 ޓޫރިސްޓުންނާއި 4 ކްރޫއިންކަމަށް އެމްއެންޑީއެފުން ވިދާޅުވިއެވެ.  
 
އެމްއެންޑީއެފުން ވިދާޅުވީ، "ސުވެނިއަރ 34" ލޯންޗު ކޯސްޓުގާޑުގެ އެހީތެރިކަމާއިއެކު މިއަދު މެންދުރު 14:00 ކަންހާއިރު ތިލަފުށީ ފަޅަށް ވައްދާފައިވާ ކަމަށެވެ. އަދި މި ޙާދިސާގައި އެއްވެސް މީހަކަށް އަނިޔާވެފައިވާކަމުގެ މަޢުލޫމާތު ލިބިފައިނުވާކަމަށް އެމްއެންޑީއެފުން ވަނީ ވިދާޅުވެފައެވެ.  
 
މި ދުވަސްވަރަކީ މުޅި ރާއްޖެއަށް ވިއްސާރަ ދުވަސްވަރެއްކަމުން، ކަނޑުދަތުރުކުރާ ފަރާތްތަކުން މޫސުމަށް ސަވާލުވުމަށް މޫސުމާ ބެހޭ ޤައުމީ އިދާރާއިން ވަނީ އިލްތިމާސްކުރައްވާފައެވެ.