ޚަބަރު
ހުޅުމާލޭގައި ސައިކަލަކުން ޖެހި 6 އަހަރުގެ ކުއްޖަކަށް އަނިޔާވެއްޖެ

ހުޅުމާލޭ ފޮޓޯ:އިންޓަނެޓް
ހުޅުމާލެ ފޭސް 1 ގެ ނިރޮޅުމަގުގައި ހިނގި ހިތާމަވެރި ހާދިސާއެއްގައި 6 އަހަރުގެ ކުޑަކުއްޖަކަށް ބޮޑެތި އަނިޔާތަކެއް ވެއްޖެއެވެ. މި ހާދިސާ ހިނގާފައިވަނީ 2025 ވަނަ އަހަރުގެ ފެބްރުއަރީ މަހުގެ 28 ވަނަ ދުވަހުގެ 15:50 ހާއިރުއެވެ.
ފުލުހުންގެ މަޢުލޫމާތު ދޭގޮތުގައި، މި ހާދިސާ ހިނގާފައިވަނީ އެލް މޮބައިލް 3 ކައިރިން މަގު ހުރަސްކުރި މީހަކާއި ކުއްޖެއްގެ ގައިގައި ސައިކަލަކުން ޖެހިގެންނެވެ. މި ހާދިސާގައި 6 އަހަރުގެ ކުޑަކުއްޖާގެ ކަކޫ މަޝައިގެން ގޮސް، ކަނާތްފަރާތު ތުންފައިމަތިން ބައި އިންޗި އެއްހާ ތަން ފަޅައިގެން ގޮސް، އަދި އިތުރު ކުދިކުދި އަނިޔާތަކެއްވެސް ވެފައިވާކަމަށް ބުނެއެވެ.
ފުލުހުން އިތުރަށް ހާމަކުރި ގޮތުގައި، މި ހާދިސާގައި ހިމެނޭ ސައިކަލު ދުއްވާފައިވަނީ އެ ކެޓަގަރީގެ އުޅަނދު ދުއްވުމުގެ ލައިސަންސް އޮންނަ މީހެކެވެ. މި މައްސަލަ ފުލުހުން ދަނީ ތަޙުޤީޤު ކުރަމުންނެވެ.