ހުވަން ލޯންޗު އަޑިއަށް ދިޔުމުން ފުލުހުން ދެއްކީ ޤައުމު އިސްކުރުމުގެ ނަމޫނާ: ވަޒީރު އަލީ އިޙްސާން

އދ. ދިގުރަށުން މާލެއަށް ދަތުރުކުރަމުން ދިޔަ "ހުވަން" ލޯންޗު އަޑިއަށްދިޔަ ހާދިސާގައި އެ ލޯންޗުގައި ދަތުރުކުރި މީހުން ސަލާމަތްކުރުމުގައި ފުލުހުން ދެއްކީ ނަފްސަށްވުރެ ޤައުމު އިސްކުރުމުގެ ނަމޫނާކަމަށް ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙްސާން ވިދާޅުވެއްޖެއެވެ.

އިއްޔެ ހެނދުނުގެ ވަގުތެއްގައި ހިނގި މި ހާދިސާގެ ރިޕޯޓް ފުލުހުންނަށް ލިބިފައިވަނީ ހެނދުނު 7:57ގައެވެ. މައުލޫމާތު ލިބުމާއެކު ފުލުހުންގެ އިމަރޖެންސީ ރެސްޕޮންސް ޓީމުން ވަނީ ވަގުތުން ހަރަކާތްތެރިވެފައެވެ.

48 މީހުން ދަތުރުކުރި ” ހުވަން“ ލޯންޗު އަޑިއަށްދިޔަ ހާދިސާގައި ގަދަ ކަނޑުގެ ބިޔަ ރާޅުތަކުގެ ތެރޭގައި މީހުން ސަލާމަތްކުރުމުގައި އަމިއްލަ ފުރާނައަށް ބެލުމެއްނެތި ދިވެހި ފުލުން ދެއްކެވި ހިއްވަރާއި ކެރުމާއި ސާބިތުކަމަކީ ފުލުހުންގެ މުއައްސަސާއަށް ޒިއްމާވާ ވަޒީރުގެ ހައިސިއްޔަތުން… pic.twitter.com/zSde58jJgw

— Minister of Homeland Security & Technology (@min_mohst) March 3, 2025

ހާދިސާ ހިނގިއިރު ލޯންޗުގައި ތިބީ ހަތަރު ކުޑަކުދިން ހިމެނޭ ގޮތަށް 45 ފަސިންޖަރުންނާއި 3 ފަޅުވެރިންނެވެ. ލޯންޗުގައި ދަތުރުކުރަމުންދިޔަ އެންމެން ސަލާމަތްކޮށް، އދ. ދިގުރަށަށް ވަނީ ގެންގޮސްފައެވެ.

މި ހާދިސާއާ ގުޅޭގޮތުން އެކްސްގައި ކުރެއްވި ޕޯސްޓެއްގައި ވަޒީރު ޢަލީ އިޙްސާން ވިދާޅުވެފައިވަނީ، ގަދަ ކަނޑުގެ ބިޔަ ރާޅުތަކުގެ ތެރޭގައި މީހުން ސަލާމަތްކުރުމުގައި އަމިއްލަ ފުރާނައަށް ބެލުމެއް ނެތި ދިވެހި ފުލުހުން ދެއްކެވީ ހިތްވަރާއި ކެރުމާއި ސާބިތުކަން ކަމަށެވެ. އަދި މިއީ ޤައުމީ ޚިދުމަތުގައި ނަފްސަށްވުރެ ދިވެހި ޤައުމު އިސްކުރުމުގެ ފުރިހަމަ ނަމޫނާއެއް ކަމަށްވެސް ވަޒީރު ފާހަގަކުރެއްވިއެވެ.

ހުވަން ލޯންޗުން ދަތުރުކުރި މީހުން ސަލާމަތްކުރުމަށް ހިންގި އޮޕަރޭޝަންގައި ބައިވެރިވި ފުލުހުންނަށް ކޮމިޝަނަރ އޮފް ޕޮލިސް އަލީ ޝުޖާޢުވެސް ވަނީ ގުޅުއްވައި ޝުކުރު އަދާކުރައްވާފައެވެ. ރަމަޟާން މަހުގެ ދުވަހެއްގެ ހެނދުނުގެ ވަގުތުގައި މި މަސައްކަތް ކުރިއަށް ގެންދިއުމުގައި އޮފިސަރުން ދެއްކެވި ނަމޫނާއަށް ކޮމިޝަނަރ ޝުކުރު އަދާކުރައްވައި، އެ މަސައްކަތާމެދު ފަޚުރުވެރިވާ ކަމަށް ވިދާޅުވިއެވެ.