ސްރީލަންކާގެ އައު ރައީސް އަނޫރާ މަޤާމުގެ ހުވާ ކުރައްވައިފި!

ސްރީލަންކާގެ އައު ރައީސް އަނޫރާ ކުމާރާ ދިސާނަޔަކް މަޤާމުގެ ހުވާ ކުރައްވައިފިއެވެ.

އަނޫރާ މަޤާމުގެ ހުވާ ކުރެއްވީ ސްރީލަންކާގެ ވެރިރަށް ކޮލަމްބޯގައި ހުންނަ ޕްރެސިޑެންޑަލް ސްކްރެޓިއޭޓް ބިލްޑިންގ ގައި މިއަދު ހެނދުނުގެ ވަގުތެއްގައެވެ.

މަޤާމުގެ ހުވާކުރެއްވުމަށްފަހު އަނޫރާ ދެއްކެވި ވާހަކަފުޅުގައި ވިދާޅުވީ ޤައުމަށް ދިމާވެފައިވާ ޙުޠޫރަތްތެރި ޙާލަތު އެމަނިކުފާނު ދެނެވަޑައިގަންނަވާ ކަމަށާއި، ރައްޔިތުންގެ އުންމީދުތައް ހަޤީޤަތަކަށް ހަދައިދީ ހުރިހާ ރައްޔިތުންގެ އިތުބާރު ހޯއްދެވުމަށް ބުރަ މަސައްކަތްތަކެއް ކުރައްވާނެކަމަށެވެ. 

ސިޔާސީ ފަރާތްތަކާއި މެދު ރައްޔިތުންގެ ގެއްލިފައިވާ އިތުބާރު އަލުން ހޯދައި ޤާއިމް ކުރުމަށް ކުރެވެން އޮތް ހުރިހާ ކަމެއް ކުރާނަން - އަނޫރާ މަޤާމުގެ ހުވާ ކުރެއްވުމަށްފަހު ދެއްކެވި ވާހަކަފުޅުގައި ވިދާޅުވިއެވެ. 

އަނޫރާ ވިދާޅުވީ އޭނާއަކީ ޖާދޫ ހަދާ މީހެއް ނޫން ކަމަށާއި ހުރިހާ ކަމެއް ދަންނަ މީހެއްވެސް ނޫން ކަމަށެވެ. އަދި އެނގޭ ކަންކަމާއި ނޭނގޭ ކަންކަން އެބަހުރި ކަމަށާއި، ކޮންމެ ކަމެއްގައިވެސް އެންމެ ރަނގަޅު ލަފާ ހޯދައިގެން ކުރެވެން އޮތް ހުރިހާ މަސައްކަތެއް ކުރައްވާނެ ކަމަށެވެ. އަދި އެކަމުގައި ހުރިހާ ރައްޔިތުންގެ އެއްބާރުލުންވެސް ބޭނުންވާކަން އަނޫރާ ފާހަގަކުރެއްވެވިއެވެ.

55 އަހަރުގެ އަނޫރާ ސްރީލަންކާގެ ރިޔާސީ އިންތިޚާބުގައި ވާދަކުރެއްވެވީ ޕީޕަލްސް ލިބަރެޝަން ފްރޮންޓް އަދި ނޭޝަނަލް ޕީޕަލްސް ޕަވަރ މި ދެޕާޓީގެ އިއްތިހާދުގެ ތެރެއިންނެވެ. އިންތިޚާބުގައި އެންމެ ގިނަ ވޯޓު އަނޫރާ އަށް ލިބިވަޑައިގެންނެވިއިރު ލަންކާގެ ކުރީގެ ރައީސް ރަނިލް ވިކްރަމަ ސިންހް އަށް ލިބިވަޑައިގަތީ ރޭހުގެ ތިންވަނައެވެ.