އައިޓީބީ ފެއަރގައި ބައިވެރިވެވަޑައިގަތުމަށް ފަތުރުވެރިކަމާ ބެހޭ ވަޒީރު ޖަރުމަނުވިލާތަށް!

"އައިޓީބީ ބަރލިން" ފެއަރގައި ބައިވެރިވެވަޑައިގަތުމަށް ފަތުރުވެރިކަމާއި ތިމާވެއްޓާ ބެހޭ ވަޒީރު ޠާރިޤު އިބްރާހީމް ޖަރުމަނުވިލާތަށް ފުރާވަޑައިގެންފިއެވެ. މިއީ ފަތުރުވެރިކަމުގެ ދާއިރާއިން ދުނިޔޭގައި ބާއްވާ އެންމެ ބޮޑު ފެއަރއެވެ. 
 
އައިޓީބީ ފެއަރ ކުރިއަށް ދިޔުމަށް ހަމަޖެހިފައިވަނީ މި ހިނގާ މާރިޗު މަހުގެ 4 އިން ފެށިގެން 6 ވަނަ ދުވަހުގެ ނިޔަލަށެވެ. މި ފެއަރ ކުރިއަށްދާނީ ޖަރުމަނުވިލާތުގެ ވެރިރަށް ބަރލިންގައި ހުންނަ ބަރލިން އެކްސްޕޯސިޓީ ސެންޓަރުގައެވެ. ފަތުރުވެރިކަމާ ބެހޭ ވުޒާރާއިން ވިދާޅުވީ، މި ދަތުރުފުޅުގައި ވަޒީރު ފަތުރުވެރިކަމުގެ ދާއިރާއިން ރާއްޖެއާއި ރާއްޖެއިން ބޭރުގެ އިންޑަސްޓްރީ ޕާޓްނަރުންނާއެކު މުހިންމު މަޝްވަރާތަކެއް ކުރެއްވުމަށް ހަމަޖެހިފައިވާކަމަށެވެ.  
 
ފަތުރުވެރިކަމާ ބެހޭ ވުޒާރާއިން ވިދާޅުވީ، އެހެން އަހަރުތަކެކޭ އެއްފަދައިން މިއަހަރުގެ ފެއަރގައި ވެސް ދުނިޔޭގެ އެންމެ މަޤުބޫލު މަންޒިލުގެ ގޮތުގައި ދިވެހިރާއްޖެ އިޝްތިހާރު ކުރުމަށް މަސައްކަތް ކުރައްވާނެ ކަމަށެވެ. އެހެންކަމުން،  އެހެން އަހަރުތަކެކޭ އެއްފަދައިން މިއަހަރުގެ ފެއަރ އަށް ވެސް ރާއްޖެއިން ވަނީ ވަރަށް ބޮޑަށް ތައްޔާރުވެފަ އެވެ. އެގޮތުން، މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯރޕަރޭޝަން، އެމްއެމްޕީއާރުސީ އިން ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކުގެ ބައިވެރިވުމާއި އެކު މި ފެއަރގައި ރާއްޖެ އިޝްތިހާރުކުރެއެވެ.
 
ދިވެހިރާއްޖޭގެ ފަތުރުވެރިކަން އިޝްތިހާރުކޮށް، ރާއްޖެއަކީ ފަތުރުވެރިންގެ މެދުގައި މަޤުބޫލު މަންޒިލަކަށް ހެދުމަށް ދިވެހި ސަރުކާރާއި ކަމާ ގުޅުންހުރި ވުޒާރާތަކުން އަންނަނީ ގިނަ މަސައްކަތްތަކެއް ކުރަމުންނެވެ. މިކަމުގެ ނަތީޖާއެއްގެ ގޮތުން، މިދިޔަ އަހަރު ރާއްޖެއަށް ވަނީ ފުރަތަމަ ފަހަރަށް 2 މިލިއަނަށް ވުރެ ފަތުރުވެރިން ޒިޔާރަތްކޮށްފައެވެ.