ޕީއެންސީގެ ވިޕްލައިނާ ޚިލާފުވުމުން އަޒާން މަޖިލީހުގެ މުހިންމު ދެ ކޮމިޓީން ވަކިކޮށްފި

ރައްޔިތުންގެ މަޖިލީހުގެ މުހިންމު ދެ ކޮމިޓީއަކުން ހިތަދޫ މެދު ދާއިރާގެ މެންބަރު އަހުމަދު އަޒާން ވަކިކޮށްފިއެވެ. މި ފިޔަވަޅު އަޅާފައިވަނީ ސަރުކާރު ހިންގާ ޕީއެންސީގެ ވިޕްލައިނާ ޚިލާފަށް ވޯޓު ދިނުމުގެ މައްސަލަ ފެންމަތިވުމާ ގުޅިގެންނެވެ.

މިއަދު ބޭއްވުނު މަޖިލީހުގެ ޖަލްސާގައި މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވި ގޮތުގައި، މާލިއްޔަތު ކޮމިޓީއާއި ސަލާމަތީ ޚިދުމަތްތަކާ ބެހޭ (241) ކޮމިޓީއަށް ބަދަލު ގެނައުމަށް ޕީއެންސީގެ ޕާލިމެންޓަރީ ގްރޫޕުން ނިންމާފައިވެއެވެ. އަޒާންގެ ބަދަލުގައި މާލިއްޔަތު ކޮމިޓީއަށް ހަމަޖައްސާފައިވަނީ ހެންވޭރު އުތުރު ދާއިރާގެ މެންބަރު އަހުމަދު އައިފާން އެވެ. އަދި 241 ކޮމިޓީއަށް އައްޔަންކޮށްފައިވަނީ ވިލިމާލޭ ދާއިރާގެ މެންބަރު މުހައްމަދު އިސްމާއީލެވެ.

މި ބަދަލާ ގުޅިގެން އަޒާން ވިދާޅުވެފައިވަނީ، މިއީ ބައެއް ބާރުގަދަ ފަރާތްތަކުގެ މަސްލަހަތު އޮންނަ ކޮރަޕްޝަންގެ މައްސަލަތައް ބެލުމަށް މަސައްކަތްކުރަމުން އައުމާ ގުޅިގެން ގެނެވުނު ބަދަލެއް ކަމަށް ބެލެވޭ ކަމަށެވެ. އޭނާ ވިދާޅުވި ގޮތުގައި، ސަރުކާރު ކުންފުނިތަކުގެ ޕްރޮކިއުމެންޓުތައް ދިރާސާކުރަމުން އަންނަ ކަމަށާއި، ވެމްކޯއިން ފާއިތުވި އަހަރު އެކަނި ކުއްޔަށް ތަކެތި ނެގުމަށް 65 މިލިއަން ރުފިޔާ ޚަރަދުކޮށްފައިވާކަން ހާމަވެފައިވާ ކަމަށެވެ.

އަޒާން އިތުރަށް ވިދާޅުވެފައިވަނީ، މަޖިލީހުގެ މުހިންމު ދެ ކޮމިޓީން ވަކިކުރި ނަމަވެސް، މައްސަލަތައް ބެލުމުގައި ފަސްނުޖެހޭނެ ކަމަށާއި، މެންބަރުގެ ހައިސިއްޔަތުން މިފަދަ ކަންކަން ބަލައި ޒިންމާދާރުކުރުވާނެ ކަމަށެވެ.

ޕީއެންސީގެ ޕީޖީ ލީޑަރު އަހުމަދު ފަލާހު ވިދާޅުވެފައިވަނީ ޕާޓީގެ ވިޕާ ޚިލާފުވި ފަރާތްތަކަށް ފިޔަވަޅު އަޅުއްވާނެ ކަމަށެވެ. އަދި ރައީސް ޑރ. މުހައްމަދު މުއިއްޒު ވެސް ވަނީ ވިޕްލައިނާ ޚިލާފުވުމަކީ އެއްވެސް އިރެއްގައި ކޮށްގެންވާނެ ކަމެއް ނޫން ކަމަށް ވިދާޅުވެފައެވެ.

މިކަމާ ގުޅިގެން، އަޒާން ވަނީ ޕީއެންސީގެ ޕީޖީ ވަޓްސްއެޕް ގްރޫޕުން ވެސް ބޭރުކޮށްފައެވެ.