ޚަބަރު
އައްޑޫސިޓީ ބްރިޖުގެ މަސައްކަތަށް ފަންނީ ލަފާ ދޭނެ ބަޔަކު ހޯދަން އިޢުލާނުކޮށްފި

އައްޑޫސިޓީ ބްރިޖުގެ މަސައްކަތަށް ހަދާ ފުރަތަމަ ސަރވޭގެ ތެރެއިން/ފޮޓޯ: އެމްވީ ޕްލަސް
ހުލާސާ
އައްޑޫސިޓީގެ ހިތަދޫއާއި ހުޅުމީދޫ ގުޅުވައިދޭ ބްރިޖުގެ މަސައްކަތައް ފެށުމަށް ބޭނުންވާ ފަންނީ ލަފާ ދޭނެ ބަޔަކު ހޯދުމަށް އިޢުލާންކޮށްފިއެވެ.
މާލީ ވުޒާރާއިން ވިދާޅުވީ، މި ބްރިޖުގެ މަސައްކަތްކުރުމަށް ހަދަންޖެހޭ ސާރވޭ، ޑިޒައިން އަދި ޓެންޑަރ ޑޮކިއުމަންޓް، ޓެކްނިކަލް ސްޕެސިފިކޭޝަން ހިމެނޭ ގޮތަށް ކޮންސަލްޓަންސީ ސާރވިސް ދޭނެ ފާރމެއް ހޯދުމަށް އިޢުލާންކޮށްފައިވާކަމަށެވެ. އަދި މި މަސައްކަތަށް ޝައުގުވެރިވެލައްވާ ފަރާތްތަކުން މިމަހުގެ 24 އާ ހަމައަށް "އެކްސްޕްރެޝަން އޮފް އިންޓްރެސްޓް" ހުށަހެޅުމުގެ ފުރުޞަތު ހުޅުވާލާފައިވާކަމަަށް އެ ވުޒާރާއިން ވަނީ ވިދާޅުވެފަ އެވެ.
މި އިޢުލާނުގައިވާ ގޮތުން، މި މަސައްކަތަށް ޝައުޤުވެރިކަން ފާޅުކުރާ ފަރާތްތަކުން އެ މަސައްކަތަށް ކުރިމަތިލާ ކުންފުނީގެ ޤާބިލުކަން ސާބިތުކޮށް ލިޔުންތައް ހުށައަޅަން ޖެހޭނެއެވެ. އެގޮތުން، ކުންފުނީގެ ފަންނީ ޤާބިލުކަން، ދާއިރާއިން ކޮށްފައިވާ މަސައްކަތްތަކުގެ ތަފްސީލް މަސައްކަތްތަކުގެ އަގު އެނގޭނޭހެން، ކުންފުނީގެ މުވައްޒަފުންގެ މިފަދަ މަސައްކަތްތަކުގެ ހުނަރާއި ޤާބިލުކަން އަދި ކުންފުނީގެ މިފަދަ މަސައްކަތުގެ މަޢުލޫމާތު ހުށައަޅަންޖެހޭނެ ކަަމަށް އެ އިޢުލާނުގައި ބަޔާންކޮށްފައިވެއެވެ.
މާލީ ވުޒާރާއިން ވިދާޅުވީ، މި މަސައްކަތަށްޝައުގުވެރިކަން ފާޅުކުރާ ފަރާތްތަކުގެ ތެރެއިން ހޮވާލެވޭ ފަރާތްތަކަށް ބީލަން ހުށަހެޅުމުގެ ދައުވަތުދޭނެ ކަމަށެވެ. ހިތަދޫއާއި ހުޅުމީދޫ ގުޅުވަިއދޭ ބްރިޖަކީ ކޯޒްވޭ ހިމެނޭހެން 14-15 ކިލޯމިޓަރުގެ ބްރިޖެކެވެ. ސަރުކާރުގެ ޢަމާޒަކީ މިދަޢުރުގެ ތެރޭގައި މުޅި މަޝްރޫޢު ނިންމުމެވެ.