ރަށު ފަތުރުވެރިކަމުގައި ރޯދަމަހު ފަތުރުވެރިންނަށް ކާންދިނުމުގައި ގަވާއިދުތަކަށް ބޯލަނބަން އިލްތިމާސްކުރައްވައިފި

ރަށު ފަތުރުވެރިކަން ނުވަތަ ލޯކަލް ޓުއަރިޒަމް ހިންގާ ރަށްރަށުގައި ފަތުރުވެރިންނަށް ކެއުމުގެ އިންތިޒާމްތައް ހަމަޖެއްސުމުގައި އާންމު ގަވާއިދުތަކާ އެއްގޮތަށް ޢަމަލުކުރެއްވުމަށް ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވަޒީރު އާދަމް ޝަރީފް ޢުމަރު އިލްތިމާސްކުރައްވައިފިއެވެ.

އެކްސްގައި ހިއްސާކުރެއްވި ޕޯސްޓެއްގައި ވަޒީރު އާދަމް ޝަރީފް ވިދާޅުވެފައިވަނީ، ލޯކަލް ޓުއަރިޒަމާއި ލޯކަލް ގެސްޓްހައުސް ހިންގާ ރަށްރަށުގައި، ރަމަޟާން މަހު ފަތުރުވެރިންނަށް ކެއުމުގެ އިންތިޒާމްތައް ހަމަޖެއްސުމުގައި ސަރުކާރުން ކަނޑައަޅާފައިވާ އުސޫލުތަކާއި މިންގަނޑުތަކާ ޚިލާފުނުވާ ގޮތަށް، އެ ރަށެއްގައި ދިރިއުޅުއްވާ އާންމު ރައްޔިތުންނަށް ނުފެންނާނެ ގޮތަކަށް ޚިދުމަތް ދެއްވުމަށް ޚާއްޞަ ސަމާލުކަމެއް ދިނުން މުހިންމު ކަމަށެވެ.

ރަށު ފަތުރުވެރިކަން މުޅި ރާއްޖެއަށް އާންމުވެފައިވާ އިރު، ސަރުކާރުން އެކުލަވައިލައިފައިވާ އުސޫލުތަކާ އެއްގޮތަށް ފަތުރުވެރިންނަށް ފޯރުކޮށްދެއްވަމުން އަންނަ ޚިދުމަތްތައް ދިނުމަކީ ވަރަށް މުހިންމު ކަމެއްކަމަށް ވަޒީރު ފާހަގަކުރެއްވިއެވެ.

ސިޓީތަކާއި އިދާރީ ދާއިރާތައް ހިންގުމާއި އާންމު މަސައްކަތްތަކާބެހޭ ވުޒާރާއިން ވިދާޅުވެފައިވަނީ، ޚާއްޞަކޮށް ރޯދަ މަހު، މި ފަދަ ޝަކުވާތައް މަދުން ނަމަވެސް ފެންމަތިވުމަކީ އެ ރަށްރަށުގައި ދިރިއުޅޭ އާންމު ރައްޔިތުންގެ ވަރަށް ބޮޑު ކަންބޮޑުވުމެއްކަމަށެވެ.