ޖެނުއަރީމަހު 5.2 ބިލިއަން ރުފިޔާގެ ތަކެތި ރާއްޖެ އެތެރެކުރި

މި އަހަރުގެ ފުރަތަމަ މަހު 5.2 ބިލިއަން ރުފިޔާގެ ތަކެތި ރާއްޖެ އެތެރެކޮށްފިއެވެ. މި އަދަދުން ތެޔޮ އުނިކޮށްފިނަމަ، ރާއްޖެ އެތެރެކޮށްފައިވާ ތަކެތީގެ އަގަކީ 4.4 ބިލިއަން ރުފިޔާއެވެ.

މޯލްޑިވްސް ކަސްޓަމްސް ސާރވިސްގެ ތަފާސް ހިސާބުތައް ދައްކާގޮތުން، ޖެނުއަރީ މަހު ކަސްޓަމްސްއަށް ލިބިފައިވަނީ 287 މިލިއަން ރުފިޔާގެ އާމްދަނީއެކެވެ. އެއީ އިމްޕޯޓާއި އެކްސްޕޯޓު ހިމެނޭހެންނެވެ.

އެ މަހު 5.2 ބިލިއަން ރުފިޔާގެ މުދާ އެތެރެކޮށްފައިވާއިރު، މިދިޔަ އަހަރުގެ ޖެނުއަރީ މަހު ރާއްޖެ އެތެރެކޮށްފައިވަނީ 5.1 ބިލިއަން ރުފިޔާގެ މުދަލެވެ. އަދި މިދިޔަ ޖެނުއަރީމަހު 144 މިލިޔަން ރުފިޔާގެ މުދާ އެކްސްޕޯޓްކޮށްފައިވާއިރު، އޭގެ ކުރީ ޖެނުއަރީމަހު 173 މިލިޔަން ރުފިޔާގެ މުދާ ވަނީ އެކްސްޕޯޓްކޮށްފައެވެ.

Monthly Statistics - January 2025
⛴️ Imports MVR 5.2B
⛴️ Exports MVR 144M
💰Revenue MVR 287M
In addition;
🔹Major Importing categories
🔸Exporting commodities
🔹top 5 importing / exporting countries

🔗 https://t.co/IPKp2lOpg8 pic.twitter.com/03g4qt7QOb

— Maldives Customs Service (@CustomsMv) March 3, 2025

މިއަހަރުގެ ޖެނުއަރީގައި ރާއްޖެ އެތެރެކުރުމަށް އެންމެ ގިނައިން ފައިސާ ޚަރަދުކޮށްފައިވާ ބާވަތްތަކަށް ބަލާލާއިރު، އެންމެ ކުރީގައި އުޅެނީ އިލެކްޓްރިކަލް މެޝިނަރީ އަދި މެކޭނިކަލް ތަކެއްޗާއި، ކާބޯތަކެތި އެތެރެކުރުމަށް ކޮށްފައިވާ ޚަރަދެވެ. އެގޮތުން މި ދެކަމަށް ވެސް 960 މިލިއަން ރުފިޔާ ޚަރަދުކޮށްފައިވެއެވެ. ދެވަނައަށް އުޅެނީ އެކި ބާވަތްތަކުގެ ތެޔޮ އެތެރެކުރުމަށް ކޮށްފައިވާ ޚަރަދެވެ. އެގޮތުން ތެޔޮ އެތެރެކުރުމަށް 728 މިލިއަން ހޭދަކޮށްފައިވެއެވެ.

ރާއްޖެއިން އެކްސްޕޯޓު ކޮށްފައިވަނީ މަހުގެ އެކި ބާވަތްތައް އެކަންޏެވެ. އޭގެތެރޭގައި މަސް ދަޅާއި، ކަންނެލީގެ ބާވަތްތައް ހިމެނެއެވެ.

އަދި ރާއްޖެއިން އެންމެ ގިނަ މުދާ އެކްސްޕޯޓުކޮށްފައިވަނީ ތައިލެންޑަށެވެ. އެގޮތުން ރާއްޖެއިން ބޭރުކުރި ތަކެތީގެ %47 އެކްސްޕޯޓުކޮށްފައިވަނީ އެ ގައުމަށެވެ.

ރާއްޖެއިން އެންމެ ގިނައިން އެކްސްޕޯޓުކޮށްފައިވާ ޤައުމުތައް:

• ތައިލެންޑް - 68 މިލިޔަން ރުފިޔާ
• އިނގިރޭސިވިލާތް - 25 މިލިޔަން ރުފިޔާ
• ވިއެޓްނާމް - 15 މިލިޔަން ރުފިޔާ
• ބަންގްލަދޭޝް - 5 މިލިޔަން ރުފިޔާ
• އިންޑިޔާ - 4 މިލިޔަން ރުފިޔާ

ކަސްޓަމްސްގެ ތަފާސް ހިސާބުތައް ދައްކާ ގޮތުން، އެންމެ ގިނަ މުދާ އެތެރެކޮށްފައިވަނީ އިންޑިއާއިންނެވެ. އެގޮތުން އިންޑިއާއިން 1،045 މިލިއަން ރުފިޔާގެ މުދާ އެތެރެކޮށްފައިވެއެވެ.

ރާއްޖެއަށް އެންމެ ގިނައިން މުދާ އެތެރެކުރި ޤައުމުތައް:

• އިންޑިޔާ - 1045 މިލިޔަން ރުފިޔާ
• ޗައިނާ - 1043 މިލިޔަން ރުފިޔާ
• ޔޫއޭއީ - 1006 މިލިޔަން ރުފިޔާ
• މެލޭޝިޔާ - 421 މިލިޔަން ރުފިޔާ
• ސިންގަޕޫރު - 332 މިލިޔަން ރުފިޔާ