މިރޭގެ އިޙްޔާ ފޯރަމް ގދ. ގައްދޫގައި، ތަޤުރީރު ކުރައްވާނީ އައްޝައިޚް ޢަބްދުﷲ ސަޢުދާން

1446 ވަނަ އަހަރުގެ ރަމަޟާން މަހުގެ ރޭތައް އިޙްޔާކުރުމަށް ބާއްވާ އިޙްޔާ ފޯރަމް ސިލްސިލާގެ ތެރެއިން އަތޮޅުތެރޭގައި ބާއްވާ ފުރަތަމަ ފޯރަމް މިރޭ ގދ. ގައްދޫގައި ބޭއްވުމަށް ހަމަޖެހިފައިވާ ކަމަށް އިސްލާމީ ކަންތައްތަކާ ބެހޭ ވުޒާރައިން ވިދާޅެވެއްޖެއެވެ.    
 
އިސްލާމީ ކަންތައްތަކާ ބެހޭ ވުޒާރާއިން ވިދާޅުވީ، މިރޭގެ އިޙްޔާ ފޯރަމަކީ އެ ވުޒާރާއާއި ގދ. ގައްދޫ ކައުންސިލާއި ގުޅިގެން ކުރިއަށް ގެންދާ ފޯރަމެއް ކަމަށެވެ.  
 
މިރޭގެ ފޯރަމްގައި ތަޤުރީރު ކުރައްވާނީ އިސްލާމީ ކަންތައްތަކާ ބެހޭ ވުޒާރާގެ ސްޓޭޓް މިނިސްޓަރު އައްޝައިޚް އަބްދުﷲ ސަޢުދާންއެވެ. މިރޭގެ އިިޙްޔާ ފޯރަމްގައި އެ ވުޒާރާގެ ސްޓޭޓް މިނިސްޓަރު ތަޤުރީރު ކުރައްވާނީ، "ނުރަނގަޅު އާދަތައް ދޫކުރުން" މި މަޢުޟޫގެ މައްޗަށް ކަމަށް އެ ވުޒާރާއިން މަޢުލޫމާތުދެއެވެ.
 
މިއަހަރުގެ ރަމަޟާން މަހު މާލޭގައި 8 އިޙްޔާ ފޯރަމް ބޭއްވުމަށް ވަނީ ހަމަޖެހިފަ އެވެ. ހަމަ އެހެންމެ، އަތޮޅުތެރޭގެ 7 ރަށެއްގައި އިޙްޔާ ފޯރަމް ކުރިއަށް ގެންދިޔުމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ނިންމަވާފަ އެވެ. އެގޮތުން، އަތޮޅުތެރޭގެ އިޙްޔާ ފޯރަމް އޮންނާނީ ގައްދޫގެ އިތުރުން ހދ. ނާވައިދޫ، ތ. ގުރައިދޫ، ފުވައްމުލަކު ސިޓީ، ހއ. ބާރަށް، ނ. މަނަދޫ، އަދި ރ. މީދޫގައެވެ. މީގެ އިތުރުން، 6 ސްކޫލަކާއި އެކު ދަރިވަރުންގެ އިޙްޔާ ފޯރަމެއް ވެސް މި ރަމަޟާން މަހު އޮންނާނެ ކަމަށް އެ ވުޒާރާއިން ވިދާޅުވެއެވެ.    
 
ފާއިތުވި އަހަރުތަކެކޭ އެއްގޮތަށް މިއަހަރު ވެސް  އިޙްޔާ ފޯރަމްއަށް ވަޑައިގަންނަވާ ބޭފުޅުންގެ ތެރެއިން ގުރުއަތުން ހޮވޭ ބޭފުޅުންނަށް ހާއްސަ އިނާމުތަކެއް ދިނުމަށް ވަނީ ހަމަޖެހިފައެވެވެ