ބަލްގޭރިއާގެ މިނިވަން ދުވަހުގެ ތަހުނިޔާ ދިވެހިރާއްޖޭގެ ޚާރިޖީ ވަޒީރު ފޮނުއްވައިފި

ބަލްގޭރިއާގެ މިނިވަން ދުވަހުގެ މުނާސަބަތުގައި އެ ޤައުމުގެ ޚާރިޖީ ވަޒީރު، ޖޯޖް ޑެނިއަލޮވް ޖޯޖިއެވްއަށް ދިވެހިރާއްޖޭގެ ޚާރިޖީ ވަޒީރު ޑރ.  ޢަބްދުﷲ ޚަލީލް ތަހުނިޔާގެ މެސެޖެއް ފޮނުއްވައިފިއެވެ. 

‏‎މި މެސެޖުގައި ވަޒީރު ވިދާޅުވީ، ދިވެހި ސަރުކާރާއި ދިވެހި ރައްޔިތުންގެ ނަމުގައާއި، އަދި އެ މަނިކުފާނުގެ އަމިއްލަ ނަމުގައި އެ ޤައުމުގެ ޚާރިޖީ ވަޒީރު ޖޯޖް ޑެނިއަލޮވް ޖޯޖިއެވްއަށާއި ބަލްގޭރިއާގެ ސަރުކާރަށާއި، އެ ޤައުމުގެ އެންމެހާ ރައްޔިތުންނަށް ބަލްގޭރިއާގެ ލިބަރޭޝަން ޑޭ ގެ މުނާސަބަތުގައި ތަހުނިޔާ އާއި ހެޔޮއެދުންތައް އަރިސްކުރާ ކަމަށެވެ. މީގެ އިތުރުން ވަޒީރު ވިދާޅުވީ، ކުރިއަށް އޮތް ދުވަސްތަކުގައި ދިވެހިރާއްޖެއާއި ބަލްގޭރިއާ އާއި ދެމެދު އޮތް ގުޅުން އިތުރަށް ހަރުދަނާ ކުރުމަށްޓަކައި އެ ޤައުމުގެ ޚާރިޖީ ވަޒީރާއި ގުޅިގެން އެކި ދާއިރާތަކުން މަސައްކަތް ކުރައްވާނެ ކަމަށެވެ. 

ވަޒީރު ޑރ.  ޢަބްދުﷲ ޚަލީލް ވިދާޅުވީ، ބަލްގޭރިއާގެ ޚާރިޖީ ވަޒީރު ޖޯޖް ޑެނިއަލޮވް ޖޯޖިއެވް އަކީ އެމަނިކުފާނު ނުހަނު ޤަދަރުކުރައްވާ ބޭފުޅެއް ކަމަށެވެ. އެހެންކަމުން، ކުރިއަށް އޮތް ދުވަސްތަކުގައި ދެ ބޭފުޅުން ގުޅިގެން ގިނަ މަސައްކަތްތަކެއް ކުރައްވަން އުންމީދު ކުރައްވާކަމަށް ވަޒީރު ވަނީ ވިދާޅުވެފައެވެ.