މަޖިލީހުގެ ދުވަހުގެ މަސައްކަތްތައް ޖަލްސާގައި އިއުލާންކުރަން ނިންމަވައިފި

ރައްޔިތުންގެ މަޖިލީހުގެ ކޮންމެ ދުވަހެއްގެ މަސައްކަތްތަކުގެ ތަފްސީލް އެ ދުވަހެއްގެ ޖަލްސާގައި އިއުލާންކުރުމަށް މަޖިލީހުގެ ރައީސް ޢަބްދުއްރަޙީމް ޢަބްދުﷲ  ނިންމަވައިފިއެވެ.

މިގޮތަށް ނިންމެވީ މަޖިލީހުގެ މެންބަރުން ޖަލްސާތަކަށް ހާޒިރުވެވަޑައިނުގެން މުސާރަ ނަންގަވާކަމަށް ދެކެވޭ ވާހަކަތަކާ ގުޅިގެންނެވެ. އިއްޔެގެ ޖަލްސާގައި ވާހަކަފުޅު ދައްކަވަމުން މަޖިލީހުގެ ރައީސް ވިދާޅުވީ ޖަލްސާގެ އިތުރުންވެސް މަޖިލީހުގައި މެންބަރުންގެ އިތުރު މަސައްކަތްތައް ކުރިއަށްދާ ކަމަށެވެ.

މިހާތަނަށް މަޖިލީހުގެ ޖަލްސާ ފެށުމުގެ ގޮތުން ކޮންމެ ދުވަހަކުވެސް ރިޔާސަތުން އިއުލާންކުރައްވަނީ އެ ދުވަހެއްގެ ޖަލްސާގެ އެޖެންޑާ އެކަންޏެވެ. އެ ދުވަހަކު މަޖިލީހުގެ ކޮމިޓީތަކުގެ މަސައްކަތްތަކާ ގުޅޭ މައުލޫމާތު މިހާތަނަށް ޖަލްސާތަކުގައި ރިޔާސަތުން ހާމަ ނުކުރައްވައެވެ.

މަޖިލީހުގެ ރައީސް ވިދާޅުވީ ރައްޔިތުންގެ މަޖިލީހުގެ މަސައްކަތްތައް ކުރިއަށްދާގޮތް ރައްޔިތުންނަށް ހާމަވެފައި އޮތުމަކީ ކޮންމެހެން މުހިންމު ކަމެއް ކަމަށް ގަބޫލުކުރައްވާ ކަމަށެވެ. އަދި އެކަން ހާމަކުރުމަކީ މަޖިލީހުގެ ރިޔާސަތުގެ ޒިންމާއެއް ކަމަށާއި މީގެފަހުން އެ ދުވަހެއްގެ މަސައްކަތްތައް ތަރުތީބުވެފައި އޮންނަ ގޮތް ޖަލްސާގައި ހާމަކުރައްވާނެ ކަމަށް އެމަނިކުފާނު ވިދާޅުވިއެވެ.

ޖަލްސާތައް ވަގުތުން ދައްކާއިރު މަޖިލީހުގެ ތަޅުމުން މަދު މެންބަރުންތަކެއް ފެނުނުމުން ޖަލްސާއަށް ވަޑައިނުގެން މެންބަރުން މުސާރަނަންގަވާކަމަށް ހީވެދާނެ ކަމަށް ޢަބްދުއްރަހީމް ވިދާޅުވިއެވެ. ނަމަވެސް ޖަލްސާ ކުރިއަށްދާ ވަގުތުވެސް ކޮމިޓީ މަސައްކަތްތަކުގައި މެންބަރުން ހަރަކާތްތެރިވެވަޑައިގަންނަވާ ކަމަށް އެމަނިކުފާނު ފާހަގަކުރެއްވިއެވެ.