ޚަބަރު
ލ. ބޮޑުމާބުޅަލި ދަނޑުވެރިކަމާއި ދަތުރުދިއުމަށް ޚާއްޞަކޮށް ތަރައްޤީކުރަނީ

ރާއްޖޭގެ ފަޅު ރަށެއް ފޮޓޯ:އިންޓަނެޓް
ލ. މާވަށު ކައުންސިލަށް ދޫކޮށްފައިވާ ލ. ބޮޑުމާބުޅަލި ، ދަނޑުވެރިކަމާއި ދަތުރުފަތުރަށް ޚާއްޞަ ރަށެއްގެ ގޮތުގައި ތަރައްޤީކުރުމަށް ވަނީ ނިންމާފައެވެ. މިއީ ރައީސް ޑޮކްޓަރ މުޙައްމަދު މުޢިއްޒުގެ ސަރުކާރުން ކައުންސިލްތައް މާލީގޮތުން ބާރުވެރިކުރުމަށް ފަޅުރަށްތައް ދޫކުރުމުގެ ސިޔާސަތުގެ ދަށުން މިހާތަނަށް ދޫކޮށްފައިވާ 4 ރަށުގެ ތެރެއިން އެއް ރަށެވެ.
މާވަށު ކައުންސިލުގެ ރައީސް އަޙްމަދު މޫސާ ވިދާޅުވި ގޮތުގައި ބޮޑުމާބުޅަލީގައި ރައްޔިތުންނަށް ދަތުރުދިޔުމަށް ޚާއްޞަ ސަރަޙައްދެއް ކަނޑައަޅާނެއެވެ. އަދި ދަނޑުވެރިކަމާއި ގެރިބަކަރި ގެންގުޅުމަށާއި ފައިބަރުގެ މަސައްކަތްތަކަށްވެސް ވަކި ސަރަޙައްދުތަކެއް ޚާއްޞަކުރެވޭނެއެވެ.
މި މަޝްރޫޢުތައް ކުރިއަށް ގެންދިއުމަށް އިންވެސްޓަރުން ހޯދުމުގެ މަސައްކަތް މިހާރު ވާނީ ފަށާފައި. މި ހަރަކާތްތަކުން ކައުންސިލަށް ވަރަށް ބޮޑު އާމްދަނީއެއް ލިބޭނެކަމަށް އަޅުގަނޑުމެން ޤަބޫލުކުރަން
އަޙްމަދު މޫސާ
މާވަށާ އެއްފަޅެއްގައި އޮންނަ ބޮޑުމާބުޅަލި ދޫކުރެވިފައިވަނީ، ބިން ކުޑަ ރަށްތަކަށް އިޤްތިޞާދީ މަސައްކަތްތައް ކުރެވޭނެ މަގު ފަހިކޮށްދިނުމަށާއި ކައުންސިލްތައް މާލީގޮތުން ބާރުވެރިކުރުމަށް ރައީސް މުޢިއްޒުގެ ސަރުކާރުން ގެންގުޅުއްވާ ވިސްނުމުގެ ދަށުންނެވެ. ލާމަރުކަޒީ ނިޒާމުގައި މިފަދަ މަސައްކަތެއް ކުރެވެނީ މިއީ ފުރަތަމަ ފަހަރެވެ.