ކުޅިވަރު
ވޯލްޑް އެތުލެޓިކްސް އިންޑޯ ޗެމްޕިއަންޝިޕްގައި ރާއްޖެ ތަމްސީލްކުރުމުގެ ފުރުސަތު ސާއިދުއަށް

ރާއްޖޭގެ އެންމެ ބާރު ދުވުންތެރިޔާ ޙަސަން ސާއިދު---
ހުލާސާ
ޓައިމް ޓްރަޔަލްގެ 60 މީޓަރު ރޭސް ސާއިދު ކާމިޔާބުކުރީ 6.83 ސިކުންތުން
މި މަހު ޗައިނާގައި ބޭއްވުމަށް ނިންމާފައިވާ ވޯލްޑް އެތުލެޓިކްސް އިންޑޯ ޗެމްޕިއަންޝިޕްގައި ރާއްޖެ ތަމްސީލްކުރުމުގެ ފުރުސަތު ރާއްޖޭގެ އެންމެ ބާރު ދުވުންތެރިޔާ، ހަސަން ސާއިދުއަށް ލިބިއްޖެއެވެ.
މި މަހުގެ 21-23 އަށް ބާއްވާ މި މުބާރާތުން ސާއިދު ފުރުސަތު ހޯދީ، މި މުބާރާތުގައި ވާދަކުރާނެ އެތުލީޓަކު ހޮވުމަށް އެތުލެޓިކްސް އެސޯސިއޭޝަން އޮފް މޯލްޑިވްސް އިން ބޭއްވި ޓައިމް ޓްރަޔަލް ކާމިޔާބުކޮށްގެންނެވެ.
އެގޮތުން ސާއިދުއާ ވާދަކޮށްފައިވަނީ ޖެމެއިކާގައި ޓްރެއިނިން ފުރިހަމަ ކުރަމުން އަންނަ ގައުމީ ޓީމުގެ އިބާދުﷲ އާދަމްއެވެ.
ޓައިމް ޓްރަޔަލްގެ 60 މީޓަރު ރޭސް 6.83 ސިކުންތުން ސާއިދު ނިންމިއިރު، މިދިޔަ އަހަރު ޕެރިސް އޮލިމްޕިކްސްގައި ވެސް ވާދަކޮށްފައިވާ، އިބާދުﷲއަށް މި ރޭސް ނިންމުނީ 6.90 ސިކުންތުންނެވެ.
މި ކާމިޔާބާއެކު، މި މަހު ޗައިނާއަށް ސާއިދު ދަތުރުކުރާނީ އޭނާގެ ތިންވަނަ ވޯލްޑް އެތުލެޓިކްސް އިންޑޯ ޗެމްޕިއަންޝިޕަށެވެ. އޭނާ ވަނީ 2022 ވަނަ އަހަރު ސާބިއާގައި ބޭއްވި ވޯލްޑް އިންޑޯ އެތުލެޓިކްސް ޗެމްޕިއަންޝިޕްގެ އިތުރުން، މިދިޔަ އަހަރު ސްކޮޓްލެންޑްގައި ބޭއްވި ވޯލްޑް އިންޑޯ އެތުލެޓިކްސް ޗެމްޕިއަންޝިޕްގައި ވެސް ވާދަކޮށްފައެވެ.
އަދި މިދިޔަ އަހަރު އިރާނުގައި ބޭއްވި އޭޝިއާގެ އިންޑޯ މުބާރާތުގައި ވެސް ސާއިދު ވަނީ ވާދަކޮށްފައެވެ.