ރަމަޟާންމަހު މާލޭގައި ބަރު އުޅަނދު ދުއްވޭނެ ގަޑިތަކަށް ބަދަލުގެނެއްސި

މި އަހަރުގެ ރަމަޟާންމަހު ގްރޭޓަރ މާލެ ސަރަހައްދުގައި މުދާ އުފުލުމަށް ބޭނުންކުރާ ބަރު އުޅަނދުތައް ދުއްވުމާއި، އެ އުޅަނދުތަކުގައި މުދާ އުފުލޭނެ ގަޑިތަކަށް ދަތުރުފަތުރާއި މަދަނީ އުދުހުންތަކާ ބެހޭ ވުޒާރާއިން ވަނީ ބަދަލު ގެނެސްފައެވެ.

އެ ވުޒާރާއިން މިފަދައިން ބަދަލު ގެނެސްފައިވަނީ އޮފީސް ގަޑިތަކާ ދިމާކޮށް ޓްރެފިކް ބެލެހެއްޓުމަށް ފަސޭހަކުރުމަށާއި، މަގުތަކުގެ ޓްރެފިކް ކުޑަކުރުމަށެވެ. މި ބަދަލާއެކު މިއަދުން ފެށިގެން ރަމަޟާން މަހުގެ 19 ވަނަ ދުވަހާ ހަމައަށް މުދާ އުފުލުމަށް ހުއްދަކުރެވިފައިވަނީ ހެނދުނު 9:30 އިން ހަވީރު 16:30 އަށް އަދި ރޭގަނޑު 20:00 އިން ހެނދުނު 8:00 އަށެވެ. މި ގަޑިތައް ޝައްވާލު މަހުގެ ފުރަތަމަ ހަފްތާގައިވެސް ދެމިއޮންނާނެއެވެ.

ބަރު އުޅަނދުތައް ދުއްވުން މަނާ ގަޑިތަކަށްވެސް ބަދަލު ގެނެސްފައިވެއެވެ. އެގޮތުން ހެނދުނު 8:00 އިން 9:30 އަށް، އަދި ހަވީރު 16:30 އިން ރޭގަނޑު 20:00 އަށް ބަރު އުޅަނދު ދުއްވުމާއި މުދާ އުފުލުން މަނާވެއެވެ.

ރަމަޟާންމަހުގެ ފަހު 10 ދުވަހުގައި މުދާ އުފުލޭނީ ހެނދުނު 6:00 އިން ހަވީރު 16:30 އަށް އަދި ރޭގަނޑު 20:00 އިން ހެނދުނު 6:00 އަށެވެ. މި މުއްދަތުގައި ހަވީރު 16:30 އިން ރޭގަނޑު 20:00 އަށް މުދާ އުފުލުން މަނާވެއެވެ.

ދަތުރުފަތުރާ ބެހޭ ވުޒާރާއިން ވިދާޅުވެފައިވާ ގޮތުގައި، ހުއްދަ ދީފައިވާ ގަޑިތައް ފިޔަވައި އެހެން ގަޑިތަކުގައި މުދާ އުފުލާ ފަރާތްތައް 750 ރުފިޔާއިން ޖޫރިމަނާ ކުރެވޭނެއެވެ.