ދެ ޓަނަށް ވުރެ ގިނަ ބޭހާއެކު އިންޑިއާގެ ކޯސްޓްގާޑް ޝިޕެއް ސޫދާނަށް

ދެ ޓަނަށް ވުރެ ގިނަ ބޭހާއެކު އިންޑިއާގެ ކޯސްޓްގާޑް ޝިޕް ސަޗެޓް މިދިޔަ ހުކުރު ދުވަހު ސޫދާނަށް ފުރައިފިއެވެ.

އިންޑިއާގެ އެކްސްޓަރނަލް އެފެއާޒް މިނިސްޓްރީން ނެރުނު ބަޔާނެއްގައި ބުނީ، ސޫދާނުގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް މި ޝިޕް ސޫދާނަށް ފުރާފައިވަނީ، ކެންސަރުން ދިފާއުވުމަށް ބޭނުންކުރާ ބޭހުގެ އިތުރުން ފުރާނަ ސަލާމަތްކޮށްދޭ ދެ ޓަނަށް ވުރެ ގިނަ ބޭހާއެކު ކަމަށެވެ.

ސޫދާނުގެ އަސްކަރިއްޔާއާއި ރެޕިޑް ސަޕޯޓް ފޯސަސް، އާރްއެސްއެފް އާ ދެމެދު ހިނގަމުންދާ ހަމަނުޖެހުންތަކަށް ގާތްގަނޑަކަށް 2 އަހަރު ވެފައިވާއިރު، މިކަމުގެ ސަބަބުން ދެކުނު ސޫދާން އަދި ޗާޑްގެ 25 މިލިއަނަށްވުރެ ގިނަ މީހުން ވަނީ ކާބޯތަކެތީގެ ރައްކާތެރިކަން ނެތުމުގެ ސަބަބުން ހާލުގައި ޖެހިފައެވެ. އޭގެ ތެރޭގައި، ސޫދާނުގައި މަދުވެގެން 17 މިލިއަން މީހުން ހިމެނެއެވެ. ދުނިޔޭގެ ކާބޯތަކެތީގެ ޕްރޮގްރާމްގެ ތަފާސް ހިސާބުތައް ދައްކާގޮތުން މި ހަނގުރާމައިގެ ސަބަބުން އެ ސަރަހައްދުގައި ދުނިޔޭގެ އެންމެ ބޮޑު ބަނޑުހައިހޫނުކަމުގެ މައްސަލަ އުފެދުމުގެ ނުރައްކާ އެބައޮތެވެ.

އިންޑިއާ އަކީ ހާލުގައި ޖެހިފައިވާ އެކި ޤަައުމުތަކުގެ މީހުންނަށް އެހީތެރިކަން ފޯރުކޮށްދެމުންދާ ޤައުމެކެވެ. އެގޮތުން، މީގެ ކުރިން އިންޑިއާ އިން ވަނީ އެފްރިކާގެ ގައުމެއް ކަމަށްވާ ޖިބޫޓީއަށް 20 ހެމޯޑައިލިސިސް މެޝިނާއި އެއް ރިވާސް އޮސްމޯސިސް (އާރްއޯ) ޕްލާންޓް ހިމެނޭ މެޑިކަލް އެހީ ފޯރުކޮށްދީފައެވެ.