އަޅުކަމުގައި ކޮންމެހެން ވެސް ފުރިހަމަވާންޖެހޭ ދެ ޝަރުތެއް އެނގިލައްވައިތޯ؟

ޝައްކެއްނެތެވެ. އިންސާނުން ދުނިޔެއަށް ފޮނުއްވީ، ﷲ ސުބްޙާނަހޫ ވަތަޢާލާއަށް އަޅުކަން އަދާކުރުމަށްޓަކައެވެ. 

އަދި އަޅުކަންތައް އަދާކުރުމުގައި އަހަރެމެން ކޮންމެހެން ވެސް ފުރިހަމަވާންޖެހޭ ކަންތައްތަކެއް ހުރެއެވެ. އޭގެ ތެރެއިން ވެސް ދެ ކަމެއް އަދާވުމުން މެނުވީ، އަޅުކަމުގެ ހެޔޮ ދަރުމަ އާއި ޘަވާބުން އަހަރެމެން މަޙްރޫމް ވާނެކަމަށް، ފަރުދުން މީޑިއާގެ "ބަރަކާތް" ޕްރޮގްރާމުގައި އައްޝައިޙާ މަރްޔަމް ޝަބާނާ ވަނީ ވިދާޅުވެފައެވެ.

މި ކަންކަމަކީ، ރަމަޟާން މަސް ފަދަ މާތް އަދި ގިނަގިނައިން އަޅުކަންތައް އަދާކުރުމުގައި އަހަރެމެން ޝާމިލުވާ މައްސަރެއްގައި، ކޮންމެހެން ހަނދާނުގައި ބަހައްޓައިގެން ފަރުވާތެރިވެ އަދާކުރުން މުހިންމު ކަންތައްތަކެކެވެ. 

އެގޮތުން އަޅުކަންތައް އަދާކުރުމުގައި އަހަރެމެން ރައްކާތެރިވާންޖެހޭ ފުރަތަމަ ކަމަކީ އިޙްލާސްތެރިކަމެވެ. އިޙްލާސްތެރިކަމާއެކު އަދާކުރާ އަޅުކަމަކީ، މީހެއްގެ ތަޢުރީފާއި ސަނާ އާއި، މީހެއްގެ ފަރާތުން އެކަމަށް ބަދަލަކަށް އެދިގެން ކުރެވޭ އަޅުކަމަށް ވެގެން ނުވާނެކަމަށް އައްޝައިޙާ މަރްޔަމް ޝަބާނާ ވަނީ ވިދާޅުވެފައެވެ. އަދި އަޅުކަން އަދާކުރަންޖެހެނީ ﷲއަށް ޓަކައެވެ. 

ﷲ ސުބްޙާނަހޫ ވަތަޢާލާއަށް އިޙްލާސްތެރިވެގެން އަޅުކަންކުރަން މެނުވީ އެކަލާނގެ އަމުރެއް ނުކުރައްވާ.

ކީރިތި ޤުރުޢާނުން ދަލީލު ދައްކަވަމުން އައްޝައިޙާ މަރްޔަމް ޝަބާނާ ޙިއްސާކުރެއްވިއެވެ.

އަޅުކަންތައް އަދާކުރުމުގައި އަހަރެމެން ރައްކާތެރިވާންޖެހޭ ދެވަނަ ކަމަކީ، ރަސޫލާ  صـلّى الله علـيـه وسـلّم ހަދީޘްކުރައްވާފައިވާ ގޮތަށް އަޅުކަންތައް އަދާކުރުމަށެވެ. އެގޮތުން ކޮންމެ އަޅުކަމެއްގައި ވެސް ރަސޫލާގެ ސުންނަތަށް ޢަމަލުކުރުމަކީ، އެ ޢަމަލެއް މާތްﷲގެ ހަޟްރަތުގައި ޤަބޫލުކުރައްވާނެ އަސާސެވެ.

އެހެންކަމުން، އަޅުކަންތައް އަދާކުރުމުގައި މި ދެ ކަންތަކަށް ސަމާލުވުމަށް، އައްޝައިޙާ މަރްޔަމް ޝަބާނާ ވަނީ އިލްތިމާސްކުރައްވާފައެވެ. އެހެން ނޫންނަމަ އެ ޢަމަލުތަކުގެ ދަރުމަ ނުލިބި، އެއީ ބޭކާރު ޢަމަލަކަށް ވެގެން ހިނގައިދާނެކަމަށް ވިދާޅުވިއެވެ.