ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމަކީ ރައީސްގެ ނިންމެވުމެއް ނޫން: މެޖޯރިޓީ ލީޑަރު

ސުޕްރީމް ކޯޓުގެ ފަނޑިޔާރުންގެ އަދަދު ކަނޑައެޅުމާ ގުޅޭގޮތުން ޤާނޫނަށް އިސްލާހު ގެނައުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ނިންމެވުމެއް ނޫން ކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެއެވެ.

ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމާ ގުޅިގެން ބައެއް ފަރާތްތަކުން ސޯޝަލް މީޑިއާގައި ދައްކަމުންދާ ވާހަކަތަކަށް ރައްދު ދެއްވުމުގެ ގޮތުން އެކްސްގައި ކުރެއްވި ޕޯސްޓެއްގައި ފަލާހު ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރަށް މަޖިލީހުގެ ފުރިހަމަ އަޣުލަބިއްޔަތު ލިބިފައި އޮތް ނަމަވެސް ޝަރުޢީ ނިޒާމަށް އެމަނިކުފާނު ނުފޫޒު ނުފޯރުއްވާ ކަމަށެވެ.

ފަނޑިޔާރުގޭގެ ޢަދަދު ކަނޑައަޅަން މަޖިލީހުން ޤާނޫނަށް އިސްލާހް ގެނައުމަކީ އެމަޖިލީހަށް ޤާނޫނުއަސާސީ އާއި ޤާނޫނުތަކުން ލިބިދޭ މުޠުލަޤު ބާރެއް. އެއީ ރައީސުލްޖުމްހޫރިއްޔާ އަންގަވައިގެން މަޖިލީހުން ނިންމި ނިންމުމެއް ނޫން ފަލާހު 

މީގެ އިތުރުން، ރައީސް ޑރ. މުޢިއްޒުއަކީ ޑިމޮކްރަސީގެ ރޫލް އޮފް ލޯއަށް އިހްތިރާމް ކުރައްވާ، އިންސާފުވެރިކަމާއި ޢަދުލުވެރި ކަމާއެކު ވެރިކަން ކުރައްވާ ވެރިއެއް ކަމަށްވެސް ފަލާހު ވިދާޅުވިއެވެ.

ފަލާހުގެ މި ބަސްތައް އައިސްފައިވަނީ، ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމަކީ ޝަރުޢީ ދާއިރާއަށް ނުފޫޒު ފޯރުވުމަށް ރައީސުލްޖުމްހޫރިއްޔާ ނިންމެވި ނިންމެވުމެއް ކަމަށް އިދިކޮޅު ފަރާތްތަކުން ތުހުމަތު ކުރަމުންދާ ދަނޑިވަޅެއްގައެވެ.