ދަނޑުވެރިންނަށް ވިޔަފާރީގެ ފުރުޞަތުތައް އިތުރުކުރުމަށް މަސައްކަތް ފަށައިފި

ދަނޑުވެރިކަމުގެ ދާއިރާގައި މަސައްކަތްކުރާ ފަރާތްތަކަށް ވިޔަފާރީގެ ފުރުޞަތުތައް އިތުރުކުރުމަށް ސަރުކާރުން މަޝްވަރާތައް ފަށައިފިއެވެ. މި މަޝްވަރާތައް ކުރިއަށް ގެންގޮސްފައިވަނީ ދަނޑުވެރިކަމާއި ދިރޭތަކެއްޗާބެހޭ ވަޒީރު ޑރ. މަރްޔަމް މާރިޔާ، މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީ ޒޯން (އެމް.އައި.ޑީ.އެފް.ޒެޑް) އަދި އެގްރޯނެޓްގެ ބޭފުޅުންނާއެކު ބޭއްވި ބައްދަލުވުމެއްގައެވެ.

ދަނޑުވެރިކަމާބެހޭ ވުޒާރާއިން މަޢުލޫމާތު ދެއްވިގޮތުގައި، މި ބައްދަލުވުމުގައި ދަނޑުވެރިން އުފައްދާ ތަކެތި އަގުހެޔޮކޮށް ބާޒާރަށް ގެނެވޭނެ މަގުފަހިކުރުމާއި މާރކެޓު ހޯދައިދިނުމާގުޅޭގޮތުން މަޝްވަރާކޮށްފައިވެއެވެ. އަދި އެކި އިދާރާތައް ގުޅިގެން ކުރެވޭ މަސައްކަތުން، ދަނޑުވެރިންނަށް މި ދާއިރާގައި ހުރި ފުރުސަތުތައް ފަހިކޮށްދީ، ލިބޭ އާމްދަނީ އިތުރުވެ އޭގެ ސަބަބުން ދިރިއުޅުމުގެ ފެންވަރު ރަނގަޅުވެގެންދާނެކަމަށް އެ ވުޒާރާއިން ވިދާޅުވެފައިވެއެވެ.

ދަނޑުވެރިކަމުގެ ދާއިރާގައި ޒުވާނުންގެ ހިއްސާ އިތުރުކުރުމަށް އަދި އެ ދާއިރާއިން ޒުވާނުންނަށް ބޭނުންވާ އެހީތެރިކަން ފޯރުކޮށްދީ، ޒުވާނުން ބާރުވެރިކުރުމަށް ގިނަ މަޝްރޫޢުތަކެއް ކުރިޔަށް ގެންދިއުމަށް މި ސަރުކާރުން ގިނަ މަސައްކަތްތަކެއް ދަނީ ކުރަމުންނެވެ. ނަމަވެސް، މި ދާއިރާ ކުރިއެރުވުމަށް ވަރަށް ގިނަ ގޮންޖެހުންތައް ހުރިކަމަށް ވަޒީރު ޑރ. މާރިޔާ ވަނީ މީގެކުރިން ފާހަގަކުރައްވާފައެވެ.

Minister Dr Maryam Mariya @mmaryambu , met with members of Maldives Industrial Development Free Zone (MIDFZ) and AgroNat, to collaborate on improving supply chain management. This collaboration would bring agribusiness opportunities to small farmers, helping them access better… pic.twitter.com/NDkr0KwLdM

— Ministry of Agriculture and Animal Welfare (@MAAWmv) March 7, 2025

ދަނޑުވެރިކަމުގެ ސިނާޢަތް ފުޅާކުރުމަށް ސަރުކާރުން ކަނޑައަޅާފައިވާ އަމާޒަށް ވާސިލްވުމަށް އެހީވުމަށް ޤައުމީ ޔުނިވަރސިޓީއާއި ގުޅިގެން ގިނަ މަސައްކަތްތަކެއް ދަނީ ކުރަމުންނެވެ. އެގޮތުން ދަނޑުވެރިކަމާ ގުޅޭ އެޑްވާންސް ލެވެލްގެ ކޯސްތައް މިހާރުވެސް ފަށާފައިވާއިރު، ޑިޕްލޮމާއާއި ޑިގްރީ ފެންވަރުގެ ކޯސްތައް ފެށުމަކީ އަމާޒެކެވެ. އަދި އެކަމަށް ޚާއްސަ ފެކަލްޓީއެއް ޤާއިމުކުރުމުގެ މަސައްކަތްވެސް ދަނީ ކުރަމުންނެވެ.

މި މަސައްކަތްތަކުގެކުގެ ސަބަބުން ދިވެހިރާއްޖޭގެ ދަނޑުވެރިކަމުގެ ދާއިރާއަށް އައު ކުރިއެރުންތަކެއް ލިބި، ދަނޑުވެރިންނަށް އިތުރު ފުރުޞަތުތަކެއް ހުޅުވިގެންދާނެކަމަށް އުއްމީދު ކުރެވެއެވެ.