ސްކޮޓްލޭންޑުގައި ކުޑަކުއްޖަކު މަރާލި މައްސަލައެއްގައި 18 އަހަރު ނުވާ ދެ ކުދިން ހައްޔަރުކޮށްފި

ސްކޮޓްލޭންޑުގައި ކުޑަކުއްޖަކު މަރާލި މައްސަލައިގައި 18 އަހަރު ނުވާ ދެ ކުދިން ހައްޔަރު ކޮށްފިއެވެ.

އެ ޤައުމުގެ މީޑީއާތަކުން ރިޕޯޓުކޮށްފައިވާ ގޮތުގައި، މި ހާދިސާގައި މަރާލާފައިވަނީ އުމުރުން 15 އަހަރުގެ އަމެން ޓެކްލާ ނަމަކަށް ކިޔާ ކުއްޖެކެވެ. އަދި އަމެން ޓެކްލާ މަރާލި މައްސަލާގައި ހައްޔަރުކޮށްފައިވަނީ ޢުމުރުން 14 އަހަރާއި 15 އަހަރުގެ ދެ ފިރިހެން ކުދިންކަމަށް އެ ޤައުމުގެ މީޑިއާތަކުން ވަނީ ރިޕޯޓުކޮށްފައެވެ.

އަމެން ޓެކްލާ މަރާލާފައިވަނީ ސްކޮޓްލޭންޑުގެ ގްލާސްގޯ ސިޓީގެ މަގެއް މަތީގައިކަމަށް އެ ޤައުމުގެ ފުލުހުން މަޢުލޫމާތު ދެއެވެ. ފުލުހުން ބުނިގޮތުގައި، ހަށިގަނޑުގައި އެކި ޒަޚަމްތަކާއިއެކު އަމެން ޓެކްލާ ފެނިފައިވަނީ މިދިޔަ ބުދަ ދުވަހުގެ ރޭ 10:30 ހާއިރުއެވެ. އަދި އެ ކުއްޖާގެ ހަށިގަނޑު ފެނުމާއިއެކު ފުލުހުންނާއި އެމްބިއުލާންސް އެ ސަރަޙައްދަށް ގޮސް ޙަރަކާތްތެރިވާން ފެށިކަމަށް ނޫސްތަކުން ވަނީ ރިޕޯޓުކޮށްފައެވެ. ނަމަވެސް، ފުލުހުންނާއި މެޑިކަލް ޓީމުން އެތަނަށް ދިޔައިރު ވެސް އަމެން އޮތީ މަރުވެފައެވެ.

ސްކޮޓްލޭންޑުގެ ފުލުހުން ބުނިގޮތުގައި، މި މައްސަލާގައި ކުޑަ ދެ ކުދިން ވަނީ ހައްޔަރުކޮށްފައެވެ. ނަމަވެސް، މި ދެ ކުދިންނާއި ގުޅޭ އެއްވެސް މަޢުލޫމާތެއް ޢާންމުކުރެވޭނީ އަމެން ޓެކްލާގެ ޕޯސްޓްމޯޓަމް ރިޕޯޓަށްފަހުކަމަަށް ފުލުހުނާއި ހަވާލާދީ މީޑިއާތަކުން ވަނީ ރިޕޯޓުކޮށްފައެވެ. މީގެ އިތުުރުން، ފުލުހުން ވަނީ މި ޙާދިސާ ހިނގާފައިވާ ވަގުތުގައި އެ ސަރަޙައްދުގައި ތިބި މީހުންނާއި، ސީސީޓީވީ ފޫޓޭޖް ލިބިފައިވާ މީހުން އެ މީހުން އަތުގައި ހުރި މަޢުލޫމާތުތައް ހިއްސާކުރުމަށް އިލްތިމާސްކޮށްފައެވެ.

މި ޙާދިސާއާއި ގުޅިގެން ސްކޮޓްލޭންޑުގެ ކަމާ ގުޅުންހުރި އިދާރާތަކުންވަނީ އަމެން ޓެކްލާގެ ޢާއިލާއަށް ތައުޒިޔާ ފޮނުއްވާފައެވެ. އަދި މި މައްސަލައަކީ ސީރިއަސް މައްސަލައެއްގެ ގޮތުގައި ތަހުޤީޤުކުރަމުންދާ މަސައްލައެއްކަމަށް ބުނެ، މިކަމާއި ގުޅިގެން ޢާންމު ރައްޔިތުންގެ ފަރާތުން ދެވެން އޮތް އެހީތެރިކަމާއި އެއްބާރުލުން ދިނުމަށް ކަމާ ބެހޭ އިދާރާތަކުން ވަނީ އެދިފައެވެ.

އަމެން ޓެކްލާއަކީ ގްލާސްގޯގެ ސެންޓް ތޯމަސް އެކުއިނަސް ސެކަންޑްރީ ސްކޫލުގައި ކިޔަވަމުން އައި ދަރިވަރެކެވެ. އަދި މި ކުއްޖާއަކީ ރަނގަޅު ދަރިވަރެއް ކަމަށް އޭނާއަށް ކިޔަވާދޭ ޓީޗަރުން ވަނީ ފާހަގަކޮށްފައެވެ.