ކުޅިވަރު

ފަހަތުން އަރާ މޮންޒާ ބަލިކުރުމަށްފަހު އިންޓަ މިލާނުން ލީޑު ފުޅާކޮށްފި

ފަހަތުން އަރާ މޮންޒާ ބަލިކުރުމަށްފަހު އިންޓަ މިލާނުން ލީޑު ފުޅާކޮށްފި

އިންޓާގެ ފުރަތަމަ ގޯލު އާރނޮޓޮވިޗް ކާމިޔާބު ކުރަނީ، ފޮޓޯ: ރޮއިޓާސް

މިފްތާޙް މުޙައްމަދު

މިފްތާޙް މުޙައްމަދު

09 މާރިޗު 2025، 12:26

09 މާރިޗު 2025، 12:26

އިޓާލިއަން ސިރީ އޭގައި ރޭ އިންޓަ މިލާނުން ފަހަރުން އަރާ 3-2 އިން ލީގުގެ އެންމެ ފުލުގައި އޮތް މޮންޒާ ބަލިކުރުމަށްފަހު، ލީގުގެ އެއްވަނައިގައި އޮތް ލީޑު 4 ޕޮއިންޓަށް ފުޅާކޮށްފިއެވެ. އިންޓަ މިލާނަށް ލީޑު ލިބުނު ގޯލަކީ މޮންޒާގެ ކުޅުންތެރިއެއްގެ އަތުން ބައިކޮޅަށް ވަތް ގޯލެކެވެ.

މެޗުގެ ފުރަތަމަ ނުރައްކާތެރި ހަމަލާ އެފެއްދީ އިންޓާއިންނެވެ. އިންޓާގެ ފޯވާޑް، މާރކޯ އާރނޮޓޮވިޗް ބޮލުން ފޮނުވާލި ބޯޅަ މޮންޒާގެ ގޯލް ކީޕަރ، ސްޓެފާނޯ ޓުރާޓީ މަތަކުރުމުން، އެ ބޯޅަ ހޯދުމަށްފަހު އިންޓާގެ ލައުޓާރޯ މާޓިނޭޒް އަނެއްކާވެސް ގޯލަށް ފޮނުވާލިއެވެ. މާޓިނޭޒްގެ ހަމަލާ ގޯލަށް ވަތް ނަމަވެސް، ވީޑިއޯ އެސިސްޓެންޓު ރެފްރީ ނިންމީ، ގޯލަށް ފޮނުވާލުމުގެ ތެރޭގައި މާޓީނޭޒްގެ އަތުގައި ބޯޅަ ޖެހުމުން، އެއީ ގޯލެއް ނޫން ކަމަށެވެ.

މެޗުގައި މޮންޒާއިން ލީޑު ނެގީ 32 ވަނަ މިނެޓުގައި ސެމުއެލޭ ބިރިންޑެލީ ކާމިޔާބުކުރި ގޯލަކުންނެވެ. އަދި ފުރަތަމަ ހާފު ނިމުމުގެ ކުރިން އެ ޓީމުން ވަނީ އިތުރު ގޯލެއް ކާމިޔާބުކޮށް ލީޑު ފުޅާކޮށްފައެވެ. ހާފު ނިމެން މިނެޓަކަށް ވެފައިވަނިކޮށް މި ގޯލު ކާމިޔާބުކޮށްދިނީ، 30 ވަނަ އުފަން ދުވަސް ފާހަގަކުރަމުންދިޔަ ކެއިޓާ ބަލްޑޭއެވެ. 

ނަމަވެސް ފުރަތަމަ ހާފުގެ އިތުރު މިނެޓުގައި އިންޓާއިން ވަނީ ގޯލެއް ކާމިޔާބުކުރުމަށްފަހު މޮންޒާގެ ލީޑު ހަނިކޮށްފައެވެ. އެ ޓީމުގެ ހެންރިކް މިޚްތަރިޔާން ގޯލުގެ އޭރިއާ ތެރެއަށް ހުރަސްކޮށްލި ބޯޅަ، ޑެންޒެލް ޑަމްފްރީޒް ގޯލު އޭރިއާގެ ރޮނގު މަތިން ކަހަލަހޮތަކަށް ބޮލުން ގޯލުގެ ކުރިމައްޗަށް ހުރަސްކޮށްލުމުން، އާރނޮޓޮވިޗް ވަނީ ފުންމާލުމަށްފަހު ބޮލުން އެ ބޯޅަ ގޯލުގެ ތެރެއަށް ފޮނުވާލާފައެވެ. 

އިންޓާއިން މެޗުގެ ނަތީޖާ ހަމަހަމަކުރީ މެޗުގެ 64 ވަނަ މިނެޓުގައި ހަކާން ޗަޅަނޮގްލޫ ޕެނަލްޓީ އޭރިއާގެ ބޭރުން، ސެމީ ސާރކަލްގެ ތެރެއިން ގޯލުގެ ވާތް ފަރާތުން ތިރީ ކަނަށް ފޮނުވާލި ބާރު ހަމަލާއަކުންނެވެ. 

އިންޓާއަށް ލީޑު ލިބުނީ މެޗުގެ 77 ވަނަ މިނެޓުގައި މޮންޒާގެ ގޯލު ކުރިމައްޗަށް ހުރަސްކޮށްލި ބޯޅަ މާޓިނޭޒް ބޮލުން ގޯލަށް ފޮނުވާލަން އުޅުމުން، އެ ހަމަލާ ހުއްޓުވަން މަސައްކަތްކުރި ޖިއޯޖޮސް ކިރިއަކޮޕޮލޮސް ބޮލުގައި ޖެހުމަށްފަހު ގޯލާ ދިމާލަށް ދިއަ ބޯޅަ ޓުރާޓީ މަތަކުރި ނަމަވެސް، އެ ބޯޅަ ގޯލުގެ ރޮނގު ހުރަސްކޮށްފައިވާކަމަށް ރެފްރީ ނިންމުމުންނެވެ. 

މި ނަތީޖާއާއެކު އިންޓާ އޮތީ 28 މެޗުން 61 ޕޮއިންޓު ހޯދާފައެވެ. އަދި ދެވަނަގައި އޮތް ނަޕޯލީއަށް 57 ޕޮއިންޓު ލިބިފައިވާއިރު، އެ ޓީމަށް އެއް މެޗުގެ އެޑްވާންޓޭޖެއް އެބައޮތެވެ. 

މި ލިޔުން ކިޔާލުމުން

Ads by MSS